Imi Yɛklo Fna Mbe Shɔnlifɛɛnlɛ Le
5
Maa shia fuu lopom na, la, buuro tɛɛ mu paara u pan na mu lɛ wi. Paara nyanyjɛbɛɛlɛ pre pan na mu ŋmbilɛ lɛ,
2 mna paara chiɛlɛ pre pan na mu loolo lɛ, mna paara bichabɛɛlɛ pre pan na mu jaala lɛ imi na ki fna.
3 Ta lekuchiɛlɛ titie pre kaan buuro.
4 Na lekuchɔ waa wa na biile ni, ndee na nanae ni kre, pe fna mbe yire pe katoo mbe Nyiɛkpɔɔ sumiɛ kolo chiriri tuan, mbra lekuchɔ wre le imi na wra klu mu pe le kre, ki pan pee na Nyiɛkpɔɔ yiɛ shɔ.
5 Lekuchɔ kprafun ŋmba a u n wa ndro ni wra u le kre, wre u kaan Nyiɛkpɔɔ na, mbra Nyiɛkpɔɔ tali mbe u ya u na lafo na blee.
6 La, lekuchɔ ŋmba u uyɛ wru mu taa wejiniŋge yirɛ kro kre, u le chɔ, nde u ku.
7 Sumifɛɛnlɛ pre nyina yire kee nyjɛ, mbe ndro wa pe kee ka ta mbe yo.
8 La, na wa n u katoo ndro, ndee wre titi sele ndro le kre kolo ŋga na kre, kena u shɔnlie kolo wa, u fun sisam wɛ ndro ŋmba u n shɔnli na.
9 Maa shia lekuchɔ ŋmba u n li yɛlɛ fuloe taarɛ kre tɔɔnri mbe chaa lekuchiɛlɛ nu. A ki fna mbe u pe blɔ nunu leŋgefun,
10 a u pe ndro ŋmba ndro kro u chin na u kepele nyu, mu pe chlɔ ŋmba u u biile pɔɔri chichie, mu fumblɔ yii mu chin, mu na Nyiɛkpɔɔ leele shio u katoo, mu na yaa kanyanafɛɛnlɛ na, mu ja na chichie ŋga mu chin ŋga kro pini.
11 La, maa shia lekuchiɛlɛ bichabɛɛlɛ tɔɔnri mbe ya lekuchiɛlɛ na, ŋgi na hin? Na leŋgeere niŋge pe yii pe ja na laari Kristo kro,
12 na ndro pe ma, kena u u danyi jle nyjɛ u da kre pimi li.
13 Kre kro ni pe gbashia tuan, mbe yiri mbra kila kalonyi nu. Ŋga ki n prɔ kuraa yi na, pe leele kro yuu, na nyu leni leele kee nyjɛ nu pe n fna nu, kaalɛɛ nyjɛ yi n fna yo wee kro pe yi yuu.
14 Kena pre bichabɛɛlɛ pre, ni jawa na mbe pra ndru mbra leŋge mbe se, mbra pre titi biile le, mbe ki ti mbe o loŋgoolo wa o kee sisaa ka ta mbe yo.
15 Lekuchiɛlɛ plɛ laa mu sɛ taa Sutna kro.
16 Kena na chlɔ waa wa mu pe shɔnlifun, a lekuchiɛlɛɛ wa u sele nu kre, u gbeŋmba wra pe le, waa pe wru mbe wa sumifɛɛnlɛ pre na, wra pe le mbe ki ti sumifɛɛnlɛ pre kolo ta mbra lekuchiɛlɛ mblɛ pe n lefɛɛnlɛ ni pre le.
17 Sumifɛɛnlɛ pre loplombo mblɛ pe tnumu tuni imi na ki fna kre, e pe ŋga buuro kpɔɔ, mblɛ pe tnumu tuni kpɔɔ na kee kre kpali na leele nyina kre.
18 Ŋgi na hin? Nyiɛkpɔɔ kee kre pe nyunɔ mu tɛɛ kre nyina mbo, “Na nuu nyaari bleju nu, na yi tru, maa shia u nyu pɔ,” a “Tnumutunfun fna na u fɔtɔɔrɔ ni.”a
19 Na ndro pan mu lopom wa kee sisaa ka yo, yaa shia ki shɔ mbe li, fɔna dansiɛfɛɛnlɛ shiin, ndee taarɛɛ wa ki na.
20 Na wa sisaa pe kre, e u yiɛ kee yo u pan leele pre kro yiɛ na, mbe ki ti mbe hamblɛ pre fiɛ.
21 Ni yire Nyiɛkpɔɔ na Yesu Kristo, na nyjeeri bitumblɔ yiɛ, na yuu mu pan na mu li kee nyjɛ ni yo ŋga kro na. A maa shia fiɛlɛ mbe wa gbun na pimi ni, ndee mbe ndro yiɛ le mbe chiin kee ka pe.
22 A maa shia fiɛlɛ mbe kɛ taa ndro na, mbe u wɔ na u Nyiɛkpɔɔ tnumu ka tun. Maa shia muyɛ le wa sisam nu, muyɛ pe cheche.
23 Mu lɛɛ yira, na ŋga mu yaa nyaanyaa kre ndra na, maa na nyumu chiin gboo, ta simi gboo fiɛn fiɛn.