Kafinɛ Kee Nyinafɛɛnlɛ
4
Kpra Ŋumu wre ki yo chasi na, ble hɛnyi yire nu, leele plɛ we pe shɔnlie wa, mbe sɛ ndie tɛɛ kafinɛ ŋumu yire pan, mbe taa ŋumufuɛn kee nyjɛ pe nyina na.
2 Kafinɛfɛɛnlɛ na fanafɛɛnlɛ pe yire kee nyjɛ nyina, a na pe kalafnɛ pe n na lɛɛlɛ kee ka na.
3 Pre pe yuu na ki n fna mbe lewo leŋge, a sro yɛɛ wa yi n fna mbe lewo yi li. La, Nyiɛkpɔɔ wra yire sro yire gbeele, shɔnlifɛɛnlɛ mblɛ pe kpra kre nya kre, mbe pe nyiɛtali mbe mboo ŋga yi na, mbe yi li.
4 Yira ŋga Nyiɛkpɔɔ gbeele kro nyu, yaka n wa mbe o ki je, na o ki shɔ na mboo ŋgaa ni wala.
5 Ŋgi na hin? Nyiɛkpɔɔ kee kre na nyiɛtalaa we ti mbe ki pe cheche.
Yesu Kristo Sumifun Chiriri
6 Na mu mu wolo sumifɛɛnlɛ pre nyina yire kee nyjɛ kre, mu pe Yesu Kristo sumifun chiriri ŋmba u uyɛ pɔɔri shɔnli kee kre nu, mu taa kpra nyinaa na.
7 La, muyɛ wɔ chalɛɛlɛ mbuura kewɛɛ yire nu, mu gbeŋmba mu Nyiɛkpɔɔ sumiɛ kolo chiriri tuan.
8 Na mu mu wejiŋge fiŋge, ki nyu kolo ka na, la, na mu Nyiɛkpɔɔ sumiɛ kolo chiriri wru kre, tnuu wa ki nu kolo kro na, ŋgi na, kie mu ŋga fuŋgaami na mbakɔ ŋmaa.
9 Kre kee ŋga ni yo ŋga kpra kee yi, a ki fna mbe ndro kro ki shɔ mbe li.
10 Kre ki tia o na wii na tnumu tuni kpɔɔ, ŋgi na hin? O dankna Nyiɛkpɔɔ ŋmba u le wre na, wre wi ndro kro ŋmaashɔfun, la, mblɛ ŋmaa u shio titi lɛ shɔnlifɛɛnlɛ.
11 Yire kee nyjɛ, pe nyina yi yi, mu pe jaari yi na chichie.
12 Maa ti ŋga mu pe pɔ kre na, mbe ndro mu le na muu fiɛn, la, ti mbe shɔnlifɛɛnlɛ pre mu le, mbe mu tuan. Ti mbe mu paara, na mu kepele, na mu koroo, na mu shɔnlie, na imi mu pe cheche kre le mbe tuan.
13 Mu nyjila kro wru mna mu Nyiɛkpɔɔ kee kre pe nyunɔ mu tɛɛ kre tɔɔnri mna pe nyina pe fnihaa, mna paara pe pan, mna pe nyina mbe hɛ su na mbe pan.
14 Ŋumu kɛyirɛ nyjɛ wra mu kɛ nyjila ŋga ni Nyiɛkpɔɔ kee nyanyofɛɛnlɛ pre na paara, a loplombo pre na kɛ taa mu na kre, maa shia yi ka ti.