Yɛkulo Mblɛ Pee Wa Sumifɛɛnlɛ Nu
3
Ki pe kpra kee a pra ki yuu na, na lewo chaa mbe pe sumifɛɛnlɛ yɛklo kre, kena u tnumu chichie wru.
2 La, sumifɛɛnlɛ yɛklo fna mbe pe lewo ŋmba na kee ka n wa mbe lewo ta mbe yo, ki fna mbe u chɔ pe nunu, mbe u yiɛ to, mbe pe jawalafun, mbe pe lewo ŋmba u uyɛ nyjiri kee kro nu, mbe pe lewo ŋmba u fumblɔ yii mu chin, mbe pe lewo ŋmba we jaa leele nyina.
3 U n fna mbe pe gbɔgbɔɔ, ndee mbe pe lewo ŋmba uu nyanya, la, ki fna mbe u nyjii, mbe wa pe kakɔtuŋu, mbe wa pe lewo ŋmba yiɛ ki nyinai swa na.
4 U fna mbe pe lewo ŋmba u ja na u chɔ na u biile le chichie, mbe jaa ti u biile u ŋga buuro, mbe ndie tɛɛ u pan.
5 Na lewo wa jaa wre titi katoo leele le chichie, mni we pe mbe jaa Nyiɛkpɔɔ sumifɛɛnlɛ le hin?
6 U n fna mbe pe lewo ŋmba u chinɛ fɔŋgɔ, na kre ma, we uyɛ kpɔɔ mbe yire wa mbe to, imi na Sutna na to kre.
7 U fna mbe pe lewo ŋmba fimifɛɛnlɛ kaan buuro, imi kie pe mbe nyifɛɛrɛ ka nyini wa u gbo, mbe waa sɛ to Sutna pɛlɛ nu.
Sumifɛɛnlɛ Pre Loplombo
8 Sumifɛɛnlɛ pre loplombo pre fna mbe pe kepele nyu, mbe pe kpra ni, pe n fna mbe pe gbɔgbɔɔlɔ, pe n fna mbe pe yiɛ na nyinai swa na.
9 Pe ti mbe pe jawala saan pe na, mbe pe kpra kee ŋga kra ndra, a Nyiɛkpɔɔ ki wɔ mu pe nyina, a pe ki shɔ mu li kre yii kɛ shiin.
10 Ki fna mbe e pe kepele le chichie, na pe kepele nyu, mbe pe chiin sumi.
11 Pan chɔɔ pe chiɛlɛ fna mbe pe kepele nyu, pia na leele kro yuu, pe yiɛ fna mbe to, mbra kpra lii kee kro nu.
12 Sumifɛɛnlɛ lopom fna mbe u chɔ pe nunu, a ki fna mbe u jaa na u chɔ, na u biile le chiriri.
13 Loplombo mblɛ pe sumi chiriri kre, pe mɛɛ chichie taa, mbe jaa gbun ta mbe pe shɔnlie ŋga pe ta Yesu Kristo nu kre kee yo.
Kee Ŋga Kra Ndra
14 Ni shɔnli na kia mu, mbe pan e pan wa, la, ni chaa mbe e nyunɔ yire kee nyjɛ.
15 La, na kia pan na ni mu naa, hlɛ ŋga ni nyunɔi ŋga we ti mbe e chin kepele ŋga ki fna mbe lewo pe Nyiɛkpɔɔ sele nu, pre lɛ Nyiɛkpɔɔ ŋmba u le wre sumifɛɛnlɛ, a pre na kpra kre yire.
16 O sumiɛ ŋga kee Nyiɛkpɔɔ wɔ mu o nyina kre, ndro wa jaa yo na ki kee nsra shian.
Nyiɛkpɔɔ na kaari lewo,
a Kpra Ŋumu na tia o na u nya na u fraka,
a nyjeeri bitumblɔ na u nya,
a pra u kee kpali lawee lawee nu,
a pra u shɔ mu li waŋgra ŋga kro nu,
a wra sɛ nyjeeri.