Sumifɛɛnlɛ Sumiɛ
2
Ŋga ki yiɛ klu yi na, e na nyiɛtali kpɔɔ e na leele kro kaan, e Nyiɛkpɔɔ tali mbe u pe fooro chin, e na Nyiɛkpɔɔ kaan mboo kee nyjɛ we pee pe ŋga yire ndra na.
2 E na nyiɛtali e na ŋulo, na jaŋgafɛɛnlɛ kro kaan, mbe ki ti o jaa tni komm, na wejinyiŋge ni, mbe jaa Nyiɛkpɔɔ sumi buuro kolo na.
3 Kre nyiɛtalaa ŋga nyu, mu tna o ŋmaashɔfun Nyiɛkpɔɔ wre pan.
4 Nyiɛkpɔɔ chaa mbe ndro kro ŋmaashɔmu ta, mbe kpra kre chin.
5 Ŋgi na hin? Nyiɛkpɔɔ wree nunu, a Yesu Kristo wre u lewo na Nyiɛkpɔɔ lalaa gbeele.
6 Wre wra u ŋmaa tɛɛ mu sra wɔ mu lewo ŋga, kre kee ŋga na pe nyjila ŋga ki fna nu, mu nyina na Nyiɛkpɔɔ chaa mbe lewo kro ŋmaa ta.
7 Kre kra tia pra ni wɔ bituŋu, a ndaa sɛ leele mblɛ pe n pe Judae pre nyina shɔnlie na kpra kee kre. Kala ma ni fnɛ, kpra titi ni yuu kre.
8 Ni chaa lawee kro nu mbe bilɛ kɛnyi nyjɛ yi n le nɛɛrɛ nu yire nyjeeri mbe nyiɛtali, a ki n fna mbe krɔ, ndee kakrɔ kee kaa wa e nu.
9 Pan chɔɔ ni chaa mbe chiɛlɛ na dodonyi nyjɛ yi fna leni, mbe pe yiɛto, mbe peyɛ nyjii, pia na pe ndrɛ nyjuro pini ka sembremu mbra chaa mbe yi nyu mbe tro. A pia na swa nyiɛ yirɛ, ndee dnɛ chichiele saanrɛɛ teeri mbra peyɛ sani, a pia na dodonyi nyjɛ ndrɔ yi sheli mu tro leni.
10 La, pe ti mbe pe kepele nyu na chiɛlɛ mblɛ pe Nyiɛkpɔɔ sumi lɛ.
11 Chiɛlɛ fna mbe chin na ki fna mbe pra pieri, mbe peyɛ nyjii, mbe tuan.
12 Ndaa ti mbe chiɛlɛ bilɛ nyina, ndee mbe jaŋga ta pe na, pe fna mbra pieri.
13 Ŋgi na hin? Adam pra klu mu gbeele, mna chin mu Eve gbeele.
14 Adam ma wɔɔ wre na fana, la, Eve wɔɔ wre na fana mna tia wra Nyiɛkpɔɔ mbra taan.
15 Ki tia Nyiɛkpɔɔ tia chiɛlɛ na kala nyaa sehaa, la, na pe u shɔnli, mu peyɛ nyjii, mu pe cheche, mu koroo ta kre, we pe shɔ.