Gbeŋmbaa Lee
4
Kena ni wolo Kristo leele, ni e kori na e chaa mbe nya, yire lɛ ni yɛshɔɔrɔ na tnu ŋga ni ta. E yire gbiŋmbi o Tafun mɛɛ nu.
2 La, Euodia na Syntyche rɛ, ni e tali, ŋga ee wa o Tafun wre mɛɛ nu ŋga, e tni na nyu nunu ni.
3 A ŋu ni ŋmbrɔ chichie, ni chaa mbe mna yaa pre chiɛlɛ mblɛ na. Ŋgi na na hin? Mi na pre tnumu tun, mu ketaan kre kpali mu tro, na Clement, na u ŋmbilɛ hamblɛ pre kro. Pe kro mɛɛ wa Nyiɛkpɔɔ ŋmaa hlɛ kre nu.
Yɛshɔɔrɔ, Nyjiimu Na Nyiɛtalaa
4 E ti mbe e yiɛshɔ o Tafun wre mɛɛ nu. E ti mbe e yiɛshɔ, ni ki yuu shiin wo na, e ti mbe e yiɛshɔ.
5 E ti mbe leele kro e nyjiimu chin. O Tafun wre pan nyjila da.
6 Yaa ti mbe yaka e shian, la, e nyiɛtalaa kro nu, e na e keshian kro yuu Nyiɛkpɔɔ pan, e na u kaan mboo.
7 Na e pini ma kre, Nyiɛkpɔɔ wejinyiŋge ŋga nɔɔ lewo wa jaa chin kre we ti e lolonyi na e jawala kro Yesu Kristo na.
Jawala Chichie Na Tnimu Chichie
8 Ni wolo, ni kee ŋga ki kro tɔ yi na, e na kpra kee, na kee nyjɛ nu mɛɛ chichie nyi, na kee nyjɛ yi fraka, na nyjɛ yi pe cheche, na nyjɛ nu koroo nyi, na kee chichie kro,
9 na kee nyjɛ ni e nyina, na nyjɛ e loo ni pan, na kepele nyjɛ e nya ni pan kre, e taa yi na. Mbe wejinyiŋgefun Nyiɛkpɔɔ wre tni e nu.
Mboo Ŋgaa
10 Ni yiɛshɔ o Tafun wre nu tataara na e ndru na ni kee sɔɔnri. E naa ni sɔɔnri fa kama, la, kra kɔ mu da nyjila ka nu a e n na ki kolo ta na.
11 Shian ma ki ni shian a ki tia ndaa yuu ma. Ni kee tataara tuan, a ki tia tnimu ŋga nu ni nyi kro ni yiɛ nyi.
12 Na ki ni shian, ni chin imi mbe niyɛ pe mbe da, a na ni ta nɛɛrɛ, ni chin imi na mbe niyɛ pe. Ni yire kee nyjɛ krɛrɛ tuan, ki tia kolo kro, na nyjila kro nu kre, na klo ni ta o, na ni yɔɔ o, na ni ta o, na ni shian o, ki tna ni pan.
13 Kristo jaŋga kre u ni ŋga kre tia ŋga kie ni da kro, mbe jaa ki pe u mɛɛ nu.
14 La, kra nyu na e na ya ni na ni kanyana nyjila.
15 Yire Philippi leele chin na ŋga ndaa klu mu ketaan kre yo mna yili Macedonia na kre, yire chiin na lɛ sumifɛɛnlɛ mblɛ pra yaa ni na, na ni kaan na shio ni pan.
16 A ŋga ndaa wa Thessalonica na kre, e naa shie na ni kaan yirɛ nyjɛ yira ni shian wa nyjila kro nu.
17 Ki n pe yirɛ na ni yiɛ nyina, la, tnu ŋga ee ta Nyiɛkpɔɔ pan kre ni chaa mbe e ta.
18 Ŋga ni pe mu e ŋga kre, e ki fɔlɔ tɔ, hali mu tɔ mu wɛ ŋga ni pe na. Yirɛ nyjɛ e Epaphroditus ŋga a u pan mu ni ŋga kre, yi nɛɛ ni pan, a yaka n ni shian na, a yi nyu mu tna Nyiɛkpɔɔ pan.
19 A Nyiɛkpɔɔ we e ŋga ŋga ki e shian kro. Uu yirɛ chichiele ni tataara mu yire Yesu Kristo na, na o kaan yi yi.
20 Kena e ti mbe o o Lɛ Nyiɛkpɔɔ wre ŋga yɛnyiŋge nyjila kro nu. Ami.
Shaaraa
21 E Nyiɛkpɔɔ leele mblɛ pe pe Yesu Kristo wolo pre shaari ni pan. O wolo mblɛ pee wa mna kre kro e shaari.
22 Nyiɛkpɔɔ sumifɛɛnlɛ mblɛ pee wa mna kre e shaari, ki titi kre, sumifɛɛnlɛ mblɛ pee wa waŋgra kro tafun Caesar katoo pre e shaari na.
23 Yire na Kristo dumiɛ e tni kro. Ami.