2 E eyɛ dɔɔ ta sisampefɛɛnlɛ pre haa, nyikaanla pre, mblɛ pe yuu na, na pe n lewo fɛŋgɛ kun pia u shɔ kre.

3 Wre mblɛ o yire Kpra Ŋumu wre na, na Nyiɛkpɔɔ sumi, mu na Kristo wre kaan mɛɛ, mu chin na fɛŋgɛ kuun wa jaa o ŋga ŋmaa kre, wre lɛ Nyiɛkpɔɔ sumifɛɛnlɛ titie pre, a o n na oyɛ kpɔɔri na ki ni.

4 Na ki pe na tnu naa wa yire paala kolo nyjɛ nu kre, kaa mi nii tnu ni kpɔɔ mu wɛ ndro kro na. Na wejikaara kepele kaa wa mbe lewo uyɛ taa ki na kre, ka mi nii ka ni.

5 Ŋga pra ni se, ni ble kɔɔnatarɛ na pra ni fɛŋgɛ kun. Israel ndro wi mi, a Benjamin sele ndro wi mi. Hebrew ndro titi wi mi. A na o le mbra kolo na kre, Pharisee wi mi.

6 Ndaa gbeŋmba mu Kristo leele pre fiŋge, a ndro nsra ni kefɔɔn ka ta mu yo Pharisee mbra kolo na.

7 La, yirɛ nyjɛ yie na pe ni tnu yirɛ yire kooloe nyjɛ na kre, ni yi jawa yirɛ waara Kristo wre ndra na.

8 Kpra titi yi na ni yirɛ nyjɛ ni ta kro le yirɛ wɛɛ, chiɛn ŋga ni Kristo wre chin na ni Tafun wi kre ndra na. Ni le na ki nyu mu wɛ yirɛ kro na. U ndra na kre, ni yirɛ kro wa, na yi le na kafuŋgo yirɛ yi, mbe ki ti ni Kristo ta mbe yii kɛ shiin,

9 mbe mi na wre pe nunu. Ki n pe kee chichie ŋga ni pe mbra kolo na kre ki ni pe cheche, la, ŋga ni Kristo shɔnli kre yi. Shɔnlie na Nyiɛkpɔɔ lewo fraka.

10 Ŋga ni chaa kro yi, na mbe Kristo wre chin, mbe jaŋga ŋga kii wa u kunnyiɛ nu kre chin, mbe u kanyana kre ka nya, mbe ku imi na wra ku kre.

11 Na kie tna Nyiɛkpɔɔ pan kre, mbe ni kunnyiɛ ta.

12 Ni n na yuu na ni ta, ndee ni nyu mu kɔ. La, nii wa na wii na ni kɛ we to ŋga na Kristo Yesu ni wru mu pe u wo kre na.

13 Ni wolo, yi n to ni kɛɛ tun, la, kee nunu ŋga ni pini yi na, ni nyjɛ yi tro yire kro kee fɛɛ, na wii na shie ŋga kii wa yiɛ kre pan.

14 Ni wii mbe sɛ kɔ, na ni kɛ we to nyjeeri yeeree ŋga na Nyiɛkpɔɔ yire Yesu Kristo na mu ni yeeri kre na.

15 Ki fna mbe wre mblɛ o lɛ Yesu kee nu kre, mbe o na pini ma. A na e plɛ kefɔnyi jawa kuraa kre, Nyiɛkpɔɔ we yi wɔ chasi mbe e nyina.

16 La, mna o da kre, e ti o ki yii kɛshiin.

17 Ni wolo, e ni kepele kro tuan. O kee chiriri pe mu tɛɛ e pan mbe e le mbe o tuan. Kena e ndie tɛɛ mblɛ pe taa ki na kre pan.

18 Ni klu mu yire kee nyjɛ yo e pan gbee tataara, a fuŋgaami ŋga, ni yi yuu na yotunyi ni nyiɛlɛ. Lenɛɛrɛ wa, a pe kepele tia pe pe Kristo kumu kre loŋgoolo.

19 Pre leele mblɛ, pe kɔlɔ yi na pie pe sro. Ŋgi na hin? Pe wejiyirɛ pe sumi. A pe nyifɛɛrɛ lawee pe yiɛ shio. A yirɛ nyjɛ yii wa tra mna kee pe jawa.

20 La, wre rɛ, o pe nyjeeri biile. A o tni chiriri na o Ŋmaashɔfun Yesu Kristo wre sri mbe u yiri nyjeeri wa mbe pan.

21 Na waa pan, we o wejikaara ŋga kie ku kre chinɛ, mbe ki ti o yɛnyiŋge ta na wre titi wo yi, jaŋga ŋga u tɛɛ na yirɛ kro yiri na leni uyɛ jaara kre ni.