Koroo
2
Kena ŋga e tni Kristo mɛɛ nu ŋga, ki e leni gbeŋmbaa ŋgaa? Kena eyɛ koroo kre e gbeŋmba ŋgaa? Kena o kro nunu Nyiɛkpɔɔ Ŋumu wre nu ŋgaa? Kena eyɛ kee eyɛ shian ŋgaa?
2 Kena e tni lɛɛ nunu ni, e eyɛ kori, mbe e nyu, na e jawala pe nunu, mbe ki ti ni yiɛshɔ kpɔɔ.
3 A wa waa na wii wre nunu wo na, ndee mbra chaa mbe pe chin na u wɛ u ŋmbilɛ na, la, e eyɛ nyjii e na leele kro kaan yiɛ.
4 Wa waa na wre chiin kala jawa, la, e na e ŋmbilɛ kee jawa na.
Yesu Nyjiimu
5 E ti Yesu Kristo kepele na u jawala ŋga kraa wa u pan kre tni e nu.
6 U kepele kro nu kre,
pan wra nyi na Nyiɛkpɔɔ wi.
U nsra uyɛ kpɔɔ
na wre na Nyiɛkpɔɔ we yila.
7 La, wra kre kpɔɔmu kre tɛɛ mbɛɛ na
mna uyɛ pe sumifun.
A pan pra u se na lewo wi,
8 a wra uyɛ nyjii mna ndie tɛɛ u Lɛ wre pan,
mna sɛ ku kanyana kumu kaan kre na.
9 Kre kee ŋga ndra na Nyiɛkpɔɔ na u nyi
mna u ŋga kpɔɔmu, na mɛɛ ŋga ki wɛ mɛɛ kro na.
10 Kre ndra na, mblɛ pee wa nyjeeri,
na tra yiɛ na,
na mblɛ pee wa tra tapan kro fna, na pe Yesu mɛɛ loo kre,
mbe pe kosie kan,
11 mbe yo na Kristo wi o Tafun,
mbe ki ti mbe u Lɛ Nyiɛkpɔɔ wre mɛɛ ta.
Ŋmaashɔmu
12 Kena ni wolo, imi e na ja mu kro mu ndie tɛɛ ni pan Nyiɛkpɔɔ kee kre na nyjila ŋga ni ndaa wa e jaara kre, yaa ti mbe ki pe nyjila ŋga ni nii wa e nu chiin, la, ni sɛɛ kɔkro kre, e ndie tɛɛ, e fiɛrɛ na buuro wru, e e ŋmaashɔmu tnumu tun e kɔ.
13 Ŋgi na hin? Nyiɛkpɔɔ wa na tnumu tuni e nu, imi kie pe mbe e jaa e chaara tɛɛ mbe ŋga wre titi chaa pe.
Nɔɔloo, Wejinyiŋge Na Yɛshɔɔrɔ
14 Kee ŋga ee na pini kro, yaa na taanri, ndee mbra kebɛɛlɛ wie.
15 Imi kie pe mbe pia e kee sisaa ka taa yo, mbe e pe cheche na Nyiɛkpɔɔ biile lɛ yire, a ee wa mu tni waŋgra leele sisampefɛɛnlɛ mblɛ pe n fraka nu. E fniŋge pe nu imi na wɔɛlɛɛ fniŋge nyjeeri kre,
16 ŋga e ŋmaa kee kre yii na pe kaan kre ndra na pan ki fna e pe, kena na e pe ma kre, mbe kee ta mbe niyɛ kpɔɔ, na Yesu waa ndru mu pan shiin wo, ŋgi na hin? Kie nyina na ni tnumu ŋga ni yɛnyiɛ tɛɛ mu tun kre n pe waara.
17 Kena na pe ni gbo mu ni nyimi ya e shɔnlie na, na sra yirɛ yi kre, ki tna ni pan, na mi na e kro we ni yɛshɔɔrɔ kre li.
18 A pan chɔɔ ni chaa mbe e yiɛshɔ, mbe mi na yire e yɛshɔɔrɔ li.
Timothy Sɛ Philippi Na
19 Ni kaan na Yesu Kristo we ti ni jaa Timothy tun e pan nyaanyaa, mbe ki ti na waa ndru mu pan mu e mandiɛ taan bɔ ni pan kre, mbe ki ni le faŋga.
20 Ni n ndro wa ni mu ya niyɛ na, a mi na wre jawalaa nunu, a e kee u shian na Timothy wi.
21 Leele kro wii pre titi keshiɛn na, a ki n pe Yesu Kristo kee na pe wii.
22 A yire titi, e Timothy chin imi na u kepele nyu mu da, na imi mi na wre nyaari, a u ya ni na, na ndro na u pɔ wi mu ketaan kre yo.
23 Na mbaa kee nyjɛ yie ni da wa nya kre, mbe u tun e pan nyaanyaa.
24 A ni shɔnli na Yesu Kristo we ni ŋga kolo nyaanyaa mbe ni pan wa na.
Epaphroditus
25 A ni ki jawa na ki pe keshian na mbe ti mbe o ŋmbrɔ Epaphroditus ndru mbe pan e jaara. Yire e na tia wra pan mu ya ni na, a mi na wre na tnumu nunu tun, a wra wi mu ya ni na.
26 A fuŋgaami e kro la u ta, a wra e chaa mbe ya. U jawala u tɔɔra. Ŋgi na hin? E na loo na u yaa.
27 A wra yaa yɛŋgɛ, kra kro fiɛn mbe wra ku. La, Nyiɛkpɔɔ na nyu u na, a mi na wre kro na Nyiɛkpɔɔ na nyu. Ŋgi na hin? Nyiɛkpɔɔ nsraa chaa mbe ni fooro kee nɛɛ ni na mbe tro.
28 Ki tia ni chaa mbe ti u ndru mbe pan mbe e u nya. Ni chin na na e u nya kre e yiɛ we shɔ, a kia ni shian na.
29 E ŋmbrɔ wi o Tafun mɛɛ nu, kena e u yii na yɛshɔɔrɔ ni. A na e ndro nya ma na wre wi kre, e u ŋga buuro.
30 Ŋgi na hin? Wra wejiwrɛ nya, a kra kro fiɛn mbe wra u ŋmaa wa mbe fun Kristo tnumu ŋga na e na u tun ni pan kre na.