Biile Na Pe Sefɛɛnlɛ
6
Biile, ŋga e pe Kristo wolo ŋga, kee ŋga ki fna e pe yi na, ee li e sefɛɛnlɛ kee na.
2 Mu lɛ, na mu lo ŋga buuro. Nyiɛkpɔɔ mbra yire nu, ŋga chiin u le, mu u nyu yo mu taa ki na.
3 Mbo, “Na mu pe ma, mu kee kro we nyu mbe mu ŋga, a mu ŋmaa we tnu tra ŋga na.”a
4 Sefɛɛnlɛ, yaa na e biile pini mbe pe krɔ na kuun, la, e yire o Tafun wre na e na pe poorii, e na paara e na pe nyina.
Sumifɛɛnlɛ Na Tafɛɛnlɛ
5 Tinlɛ, e na lii e tafɛɛnlɛ kee na tra mna, fiɛrɛ na seeree, na loloŋgo nunu ni, e na pini to na Kristo e sumi.
6 Ki n pe nyjila ŋga ni pee wa e jaara mbra e pni chiin nu ki fna e na ŋga ki fna pini, la, na pe n wa e jaara kuraa kre, e lam nunu tɛɛ e tnumu ŋga Nyiɛkpɔɔ chaa tun, na Kristo tinlɛ lɛ yire.
7 E lɛɛ wɔ e sumi, yaa na jawa na lewo e sumi, la, e ti mbe e jawala pe na o Tafun e sumi.
8 E jawa na o Tafun wre we ndro kro ŋga u fɔtɔɔrɔ, na tnu wi ŋu o, na lepɔɔ wi ŋu o, we mu ŋga mu tnumu chichie ŋga mu tun fɔtɔɔrɔ.
9 Tafɛɛnlɛ, e na e tinlɛ pini chiriri, yaa na pe pini lamsusrom kee. E sɔɔnri na yire na e tinlɛ pre kro, ee Tafun ni nyjeeri, ŋmba wra ndro yiɛ le mbe u kpra kun wre.
Ŋunɔ Wiyirɛ Nyjɛ Nyiɛkpɔɔ O Kaan
10 Ŋga ki kro tɔ yi na, ŋga yire na o Tafun wre pe nunu kre ndra na, e yire u jaŋga kpɔɔ ŋga kii wa u nu kre na, e sheli.
11 E ŋunɔ wiyirɛ nyjɛ Nyiɛkpɔɔ e ŋga yire kro le, kre ee jaa yire mbe wi na Sutna fana kee yire ni.
12 Ŋgi na hin? Wre na leele ma o ta na wii, la, wre na lamsusrom ŋumufuɛn nyjɛ yii wa nyiɛ yiɛ na pre o ta. Pre pe ŋunumu, na jaŋga, na faŋga lii wɔmu waŋgra ŋga nu o nyi ŋga nu.
13 Kena e Nyiɛkpɔɔ ŋunɔ wiyirɛ le fuŋgaami, na ble sisaa kre waa to, mbe e ja mbe yire mbe wi na Sutna wre ni. Na e waa ja mu wi na u ni mu sɛ kɔ kre, mbe e jaa yire e yire haa.
14 Kena e eyɛ kna, e kpra wru e pe greree. E frakaa wru e pe ŋunɔ dodoŋgi.
15 E eyɛ kna, e sɛ ketaan ŋga ki paan na wejinyiŋge ni kre kpali, mbe ki pe na e kpawrɛ yi.
16 Nyjila kro nu e e shɔnlie pe na e ŋunɔ wiyira ŋga lewo yiri mbe ki u tɔ yi. Na e kre ta, Sutna wre snimi nyjɛ yi nyini kanhun yire kro, ka wa to e na.
17 Mbe e e ŋmaashɔmu pe e ŋunɔ juule, mbe Nyiɛkpɔɔ kee ŋga Kpra Ŋumu wre e ŋga kre pe e brɔfiɛn ŋunɔ wi wo.
18 Yire kee nyjɛ krɛrɛ, e na yi pini na nyiɛtalaa ni, mbe Nyiɛkpɔɔ ya e na. Kee ŋga kie pe kpan, e ki nyiɛtali imi na Kpra Ŋumu wre we e nyina. Yire kee nyjɛ ndra na, e eyɛ shie nyjila kro nu, yaa shia pra. Nyjila kro nu e ta nyiɛtali e na Nyiɛkpɔɔ leele kro kaan.
19 E na nyiɛtali e na ni kaan, na ni yo mbe paara, mbe Nyiɛkpɔɔ ni ŋga kee ŋga mbe yo, mbe ni gbun ta mbe ketaan kre kee ŋga ki ndra kre kee yo mbe leele loo.
20 Ketaan kre saara na pe tɔɔnrɔ mɛnyi le ni na. Kena e nyiɛtali, mbe ni gbun ta mbe ketaan kre kee yo imi na ki fna.
Shaaraa Haŋa
21 Tychicus, o ŋmbrɔ ŋmba o kori, a u pe o Tafun wre kpra sumifun wre, we paan ni kee kro yo e pan, mbe e chin ŋga nu ni nyi mna.
22 Kre na ni yila mu na u tuni, mbe u paan ŋga nu o nyi mna kro yo e pan, mbe ki ti gbun nyjii e na.