Kania Kre Tnumu
5
Ŋga Nyiɛkpɔɔ biile mblɛ u kori lɛ yire ŋga, e gbeŋmba e na u tuan.
2 E ti mbe koroo tni e nu, imi na Kristo o kori, mu yila o na mu ku kre. U kumu kre pe na yira ndiom taan ŋga pe tɛɛ mu sra wɔ mu Nyiɛkpɔɔ ŋga, a u yiɛ shɔ ki na yi.
3 Ŋga e ta mu pe Nyiɛkpɔɔ leele ŋga, yaa ti mbe pe tiɛrɛɛ, ndee nɛɛrɛ kee, ndee jajaara kee ka loo e nu. A yaa na yi kee yuu, ŋgi na hin? Yire kee nyjɛ n fna na Nyiɛkpɔɔ leele ni.
4 A yaa ti mbe kee sisaa, ndee jijiere paaraa, ndee mbe kefuɛn na yilii e nyuu. La, e na Nyiɛkpɔɔ kaan mboo.
5 Yire titi e ja mu chin na, tɛtiɛrɔɔ, ndee nɛɛrɛ kee pefun, ndee jajaarafun wa le Nyiɛkpɔɔ ŋunumu kre nu, ŋgi na hin? Pan yirɛ kro jajaara nyi na sɛɛn sumiɛ yi.
6 Yaa shia ti mbe ndro kewɛɛ yɛ tɛɛ mbe e fana. Ŋgi na hin? Yire sisam nyjɛ ndra na Nyiɛkpɔɔ krɔkuɔn sisaa kre paan mblɛ ndie ki kan na kre.
7 Kena pre leele pre nyini, yaa da pe na kuraa.
8 Yire titi chɔɔ wɔmu nu e na nyi fa, la, ŋga e pan mu pe o Tafun wre wolo ŋga, kania na e nyi. Kena ki fna mbe e pe na kania wolo lɛ yire.
9 Ŋgi na hin? Kania ŋga kii wa e nu kre saara na, kee ŋga ki nyu, mu fraka, mu pe kpra, chiin ee na pini.
10 E gbeŋmba na ee nyjɛ yi o Tafun wre yiɛ nyi chin.
11 E eyɛ wɔ e yili wɔmu kewɛɛ nyjɛ leele pini yire nu. La, e yi wɔ fimi na.
12 Kee nyjɛ pe ndra na pini kre, yi kee yoo pe nyifɛɛrɛ ni kuraa mu tro.
13 Na e kee yire kro wɔ mu pan kania kre na kre, kie yi kee kro wɔ fimi na mbe ndro kro nya.
14 Yira ŋga kie yili wɔmu nu, mbe pan kania kre na kpan, kie nya chasi mbe pe kania kre wo, kre ki tia pe ki yo mu tɛɛ mbo,
“Ŋu ŋmba mu ŋunu kre nyi,
nyi mu yili kuulo nu,
Kristo we pe kania mbe mu ŋga.”
15 Kena e e tnimu dɔɔta, yaa pe na jijiele lɛ, la, e pe na kachimblɛ lɛ.
16 Kolo chiɛri ŋga ee ta kpan, e kee ŋga ki fna pe, ŋgi na hin? ble nyjɛ nu o nyi ŋga sheli.
17 Kena yaa pe na e n jawala ni, la, e gbeŋmba na ee kee ŋga o Tafun wre chaa mbe e pe chin.
18 Yaa simi gbɔ mbe to, kla lawee simi shie na lewo ni, la, e ti mbe Kpra Ŋumu wre tni e nu.
19 E na mɛɛ nyjɛ e koni na Nyiɛkpɔɔ kaan mɛɛ yire kee tɛɛ e na paara eyɛ pan. E na mɛɛ koni, e na o Tafun wre kaan mɛɛ e lolonyi nu.
20 Nyjila kro nu, e yire o Tafun Yesu Kristo wre mɛɛ na, e na O lɛ Nyiɛkpɔɔ wre kaan mboo kee kro nu.
Chiɛlɛ Na Pe Pilɛ
21 Leŋgefɛɛnlɛ, Kristo fiɛrɛ na, e eyɛ nyjii e eyɛ ŋga.
22 Chiɛlɛ, e eyɛ nyjii e e pilɛ ŋga, imi na e eyɛ nyjii mu Kristo ŋga kre.
23 Ŋgi na hin? Blɔ wree wa na jaŋga ni u chɔ na, imi na Kristo wree jaŋga ni u sumifɛɛnlɛ na kre, a Kristo wre titi wi sumifɛɛnlɛ mblɛ lɛ u wejiŋge kre ŋmaashɔfun.
24 Kre ndra na, ki fna mbe chiɛlɛ peyɛ nyjii poŋgo mbe pe pilɛ ŋga, imi na sumifɛɛnlɛ peyɛ nyjii mu Kristo ŋga kre.
25 Bilɛ leŋgefɛɛnlɛ, e e chiɛlɛ kori imi na Kristo u sumifɛɛnlɛ pre kori, mu ku pe tlo kre.
26 Mu yire u kumu kre na mu sumifɛɛnlɛ pre pe cheche, mu yire u nyu kee na mu pe ndrɛ je.
27 Imi kie pe mbe sumifɛɛnlɛ pre pe u wolo, mbe yiɛnyiŋge ta, mbe pe cheche, mbe nɛɛrɛ kee ka wa pe wa na.
28 Bilɛ leŋgefɛɛnlɛ fna mbe pe chiɛlɛ kori na pre titi wejinyi yi. Lewo blɔ ŋmba u u chɔ kori kpan, mu chin na u uyɛ kori.
29 Ndro n wa mu u wejiŋge pra, ndro kro u wejiŋge le chichie, mbe ki ŋga sro, imi na Kristo u sumifɛɛnlɛ pre pini kre.
30 Ŋgi na hin? O pe u wejiŋge kre kokoe yɛ.
31 Imi na Nyiɛkpɔɔ kee kre pe nyunɔ mu tɛɛ kre yo kre mbo, “Kre ndra na blɔ we u lɛ, na u lo ti, mbe wre na u chɔ sɛ mbra, mbe pe kro shiin pe wejikaara nunu.”a
32 Kre kee ŋga pe kpra kee ŋga ki ndra, a Nyiɛkpɔɔ ki wɔ mu nyina, a ni shɔ mu li na Kristo na sumifɛɛnlɛ pre kee ki yuu.
33 Kena ndro kro u u chɔ kori na u wejiŋge yi, mbe chlɔ kro na u plɔ nyifɛɛrɛ pini.