4
O Tafun wre sumiɛ na pe yila mu mi Paul yii mu le nyuŋgo. Kena ni e tali, e ti mbe e tnimu nyu, mbe fna na yeeree ŋga pe e yeeri kre ni.
2 E eyɛ nyjii, e eyɛ tre tra, e na frɔ nyjila kro nu. E yire koroo na e na eyɛ yiri mbe e krɔ wa na kuun nyaanyaa.
3 Kpra Ŋumu wre wejinyiŋge ŋga u e ŋga mu tia e pe nunu kre, e gbeŋmba na ee ti mbe ki kro ma.
4 Wejiŋge ŋga nu o nyi kree nunu, a Kpra Ŋumu wre o ta wree nunu, a dankna ŋga o ta o yeeree kre nu kree nunu.
5 O Tafun wree nunu, a o shɔnliee nunu, a ndra jee nunu o ta,
6 a Nyiɛkpɔɔ wree nunu, a u pe o kro Lɛ, mu pe o kro Tafun, a uu wa o kro nu, na tnumu tuni o nu.
7 La, Kristo ndro kro ŋga u Ŋumu yirɛ nyjɛ u kaan kre imi na u chaa.
8 Imi na Nyiɛkpɔɔ kee kre pe nyunɔ mu tɛɛ kre yo kre mbo,
“Ŋga Kristo na jaŋga ta u loŋgoolo na kre,
wra sɛ nyjeeri wa,
mna yire wa mu leele ŋga Ŋumu yirɛ nyjɛ u kaan yire,”a
9 Na pe yo “wra sɛ nyjeeri wa” ki nɔɔ yi ŋgi hin? Ki nyina na Kristo na yire nyjeeri wa mu tii mu pan tra mna.
10 Kena wre ndro ŋmba wra yiri nyjeeri wa mu tii mu pan tra mna kre, wre chɔɔ wra ndru mu sɛ nyjeeri wa kre, imi kie pe mbe pe u nya yira kro nu waŋgra ŋga nu.
11 Wre chɔɔ u leele kaan Ŋumu tnumu yire. U plɛ wɔ a pe pe u bitumblɔ, mu plɛ wɔ Nyiɛkpɔɔ kee nyanyofɛɛnlɛ, a plɛ pe ketaan kre kpalifɛɛnlɛ, a plɛ pe Sɔfue, na nyinafɛɛnlɛ.
12 Wra yire kee nyjɛ krɛrɛ pe mu tɛɛ, imi kie pe mbe u Nyiɛkpɔɔ leele pre kro gbeele mbe pe ja mbe u tnumu ŋga ki fna tun, mbe ki ti sumifɛɛnlɛ mblɛ pe pe Kristo wejiŋge kre lɛ.
13 Na ki pan ma kre, o kro we yire shɔnlie, na Nyiɛkpɔɔ Biblɔ wre chiɛn na mbe pe nunu, mbe lɛ, mbe wre na Kristo wre paan pe nunu kolo kro na.
14 Kena waa pe biile na, mbe kafinɛfɛɛnlɛ kee nyjɛ pe nyina yire fuflɛ na o wru mbra shie mbra paan, pre leele mblɛ, pre pe yire pre titi kooloe nyjɛ pe cha na, mu tia leele na punu.
15 Na o taa kpra, na koroo na kre, kolo kro na oo lɛ, mbe pe na Kristo wi. Wre wi o ndra.
16 Wre na wejiŋge kokoe hɛnyi nyjɛ kro yire mu sooloe ta mu kan yi yɛ na, kena na wejiŋge kokoe yire kro tnumu tuni imi na ki fna kre, kena wejiŋge kre kro we yire koroo na, mbe kiyɛ yii mbe mbra, mbe lɛ.
Ŋmaa Fɔŋgɔ Ŋga Kristo Kaan
17 O Tafun wre mɛɛ nu ni kre kee ŋga mbe yo ŋga yuu na e jaari. Yaa ti mbe e tnimu pe na leele mblɛ pe n Nyiɛkpɔɔ chin pre lɛ na. Kewɛɛ yii wa pe jawala nu,
18 a ki tia pe jawala n nyaa Nyiɛkpɔɔ kee kre na. Ŋmaa ŋga Nyiɛkpɔɔ kaan kre, pe haa le na ki ni, ŋgi na hin? Pe ndie kan, ki tia pe n yaka chin.
19 Nyifɛɛrɛ ka n wa pe yiɛ na, ki tia chachaara kolo ŋga mu chin ŋga kro, pe troi ki na, na nɛɛrɛ kee nyjɛ mu chin ŋga kro pini.
20 Yire kee nyjɛ ma e tuan Kristo pan.
21 U kee e na loo, mna taa u kro, a pra e nyina kpra ŋga kii wa u nu.
22 Kena e laa e kelɛɛlɛ yire kro, yire kee yire yira tia e naa nyjɛ yi n fna pini. Yira e kla, mna e fana, mu tia e na taa e niŋge sisaa na.
23 E fna mbe e lolonyi na e jawala chinɛ, mbe yi pe fɔnyi.
24 Ki fna e yili eyɛ, mbe pe na Nyiɛkpɔɔ wi, mbe fraka mbe pe cheche.
25 Yaa na kala fnɛ na, ndro kro fna mbra kpra yuu u ŋmbrɔ pan, ŋgi na hin? O kro pe Kristo wejiŋge kre kokoe yɛ.
26 Na mu krɔ kun, maa shia sisaa pe, a maa ti mbe krɔ mu kun mbe yila paan to ki na,
27 a maa shia Sutna ŋga kolo.
28 Lewo ŋmba u juu kre, u juuro ti, u tnumu chiriri tun na u kɛnyi ni, mbe ki ti u jaa ya shianfɛɛnlɛ na.
29 Yaa ti mbe yolo fuɛn na yilii e nyuu. E na kee nyjɛ yi nyu, mbe jaa lewo le gbeŋmbaa yuu, mbe e nyu kee jaa ya lewo na.
30 A wa waa shia Nyiɛkpɔɔ Kpra Ŋumu wre pe mbe u yiɛ je, ŋgi na hin? Kpra Ŋumu wre ni Nyiɛkpɔɔ tɛɛ mu mu tnɔ, na u wo wi ŋu, a ble kaa wa na paan mbe u ti o oyɛ ta.
31 Yaa ti mbe e lɛɛ sro. E eyɛ wɔ e yili gbun shelee, na krɔ sisaa nu. Yaa na fuuru, ndee mbra leele tɛɛlɛ. A yaa ti mbe prara, ndee loŋgooro kee ka tni e nu.
32 La, e na nyɔɔ e eyɛ na, e eyɛ fooro chin, e na eyɛ sisam tii e na kee, imi na Nyiɛkpɔɔ yire Kristo na mu e sisam ti mu e kɛ kre.