Leele Mblɛ Pe N Pe Judae Nu Paul Na Tnumu Tun
3
Yesu Kristo saara na pe mi Paul yii mu le nyuŋgo mna, mbo ni yo na yire mblɛ e n pe Judae pre, na e pe Nyiɛkpɔɔ leele.
2 Ni shɔ mu li na e loo na Nyiɛkpɔɔ u yire u dumiɛ saara na, mu ni ŋga kre tnumu ŋga na ni ki tun e nu.
3 Nyiɛkpɔɔ na u kee ŋga u ndra kre wɔ mu ni nyina, ni klu mu ki kee ka nyunɔ fa chiɛri.
4 Kee ŋga ni nyunɔ kre, na e ki tɔɔnri, ee nɔɔloo ŋga ni ta Kristo wre kee ŋga ki ndra kre nu kre ka tuan.
5 Fa kre, Nyiɛkpɔɔ nsra leele nyina kre ndra ndra kee ŋga. La, fuŋga Nyiɛkpɔɔ yire u Kpra Ŋumu wre na mu kee kre wɔ mu u bitumblɔ cheche, na u kee nyanyofɛɛnlɛ pre nyina.
6 Kekpra kre yi na, ki yire ketaan kre na, a leele mblɛ pe n pe Judae pre pan mu dwamu ŋga Nyiɛkpɔɔ we Judae ŋga kre ka ta. Pe pan mu pe nunu wejikaara nunu nu, mu pan mu Nyiɛkpɔɔ nyu ŋga wra yo na we ti ki yire Yesu Kristo na mbe pan kre ka ta.
7 Nyiɛkpɔɔ u yire u dumiɛ na mu ni pe ketaan kre sumifun. U faŋga ŋga ni u tnumu tuni kre na u yire mu ni pe ma.
8 Nyiɛkpɔɔ leele pre kro nu, mi wi pe kotɔŋu, a nde mi Nyiɛkpɔɔ ŋga kre kolo ŋga na ni ketaan kre yo leele mblɛ pe n pe Judae pre nu, mbe pe nyina dwamu kpɔɔ ŋga kii wa Kristo jaara.
9 Mbe leele kro nyina imi na Nyiɛkpɔɔ kee ŋga u ndra kre tnumu tuni mu da. Nyiɛkpɔɔ ŋmba wra yirɛ kro gbeele kre, wra u kee kre ndra fa,
10 imi kie pe mbe fuŋgaami nyjila ŋga nu o nyi ŋga, mbe ki yire sumifɛɛnlɛ pre na, mbe jaŋgafɛɛnlɛ, na faŋgafɛɛnlɛ mblɛ pee wa nyjeeri wa kro Nyiɛkpɔɔ kachindɛ nya kooloe tataara na.
11 O Tafun Yesu Kristo na Nyiɛkpɔɔ yire mu kre jawala ŋga pe mu tɛɛ.
12 Na Yesu na o kro pan mu pe nunu, a o u shɔ mu li kre, oo oyɛ ta, mbe gbun ta mbe sɛ Nyiɛkpɔɔ yiɛ.
13 Kena ni e tali, yaa ti mbe e sɔɔnrɔ ku na ni kala nyaa e ndra na. Nyjɛ ni nyaa ŋga krɛrɛ, tnu ŋga ee ta ndra na yi.
Kristo Koroo
14 Kre kee ŋga ndra na, ndaa kosie kan tra o Lɛ Nyiɛkpɔɔ wre yiɛ.
15 Wre Ndoo wre pan sele ŋga kii wa nyjeeri, na ŋga kii wa tra kro ki mɛɛ ta.
16 Ndaa Nyiɛkpɔɔ tali mbe u yire u yɛnyiŋge dwamu kre na, mbe yire u Kpra Ŋumu wre na mbe e ŋga faŋga,
17 mbe ki ti mbe Kristo wre yire e shɔnlie na mbe paan tni e nu. Ni Nyiɛkpɔɔ tali na u ti mbe e yire koroo na mbe didinyi kan.
18 Kre kie ti mbe yire na Nyiɛkpɔɔ leele kro jaŋga ta, mbe nɔɔloo ta, mbe chin imi na Kristo koroo kpɔɔ mu da.
19 Nyiɛkpɔɔ u ti mbe e Kristo wre koroo ŋga ki kpɔɔ mu wɛ lewo jawala na kre chin, mbe Nyiɛkpɔɔ wre titi paan tni o nu.