O Yili Kumu Nu Mu Sɛ Ŋmaa Nu
2
Jle kre e ndikana, na e sisam ndra na, e na ku.
2 Kre nyjila kre na waŋgra sisam kro e taa, mna ndie tɛɛ Sutna ŋmba u ŋunumu lii fuflɛ na kre pan. U ŋumu ki tnumu tuni leele mblɛ pe ndikana pini Nyiɛkpɔɔ kee na pre nu.
3 Pan o kro na nyi chɔ, mna taa o sisam niŋge kro. Mna taa kee nyjɛ o wejinyi, na o jawala naa chaa na. Pan Nyiɛkpɔɔ krɔ na kun na o ni na chɔɔ, ŋgi na hin? Pan o kepele na nyi na leele hamblɛ pre lɛ.
4 La, Nyiɛkpɔɔ foorochiɛn, na u koroo kpɔɔ mu tro.
5 Ki tia nyjila ŋga ni o ndikana na tia a o na ku, a wra yire Kristo na mu pan na o ni ŋmaa nu. Nyiɛkpɔɔ dumiɛ na ki yire a e ŋmaa ta.
6 Ŋga wre na Yesu Kristo pe nunu kre na, Nyiɛkpɔɔ wre na Kristo chaa mu nyi, mbe wre na wre sɛ ŋunumu li nyjeeri wa.
7 Nyiɛkpɔɔ na kre kee ŋga pe, mbe ki tɛɛ mbe mbakɔ nyjila ŋga kie pan mbe u u dumiɛ kpɔɔ kre, na u koroo ŋga ki yire Yesu Kristo na kre wɔ mbe o nyina.
8 Ŋgi na hin? Nyiɛkpɔɔ dumiɛ saara na, e yire shɔnlie na mu ŋmaa ta. Ki n pe kee nyjɛ e pe na yi, la, Nyiɛkpɔɔ wre u e kɛ ŋmaa kre.
9 Kena kee ka n wa mbe e ta mbe eyɛ kpɔɔ, ŋgi na hin? Kee ŋga e pe ma ki tia.
10 Nyiɛkpɔɔ u o gbeele mbe wre na Kristo pe nunu, mbe kee nyjɛ yi fna pe, yire kee yire, Nyiɛkpɔɔ klu mu yi pe mu tɛɛ mbe o tro yi na.
Wre Na Kristo Pe Nunu
11 Yire mblɛ pe nsra se Judae kre, Judae mblɛ praa peyɛ yeeri fɛnyi knumufɛɛnlɛ kre, pre praa e pini na e n fɛnyi knumu.
12 E sɔɔnri imi na e na nyi fa. Kre nyjila kre, na yire na Kristo haa le, kre nyjila kre, na fumblɔ lɛ yire, na e n chaa Israel leele mblɛ Nyiɛkpɔɔ na wɔ pre nu. Na e kɛ n chaa Nyiɛkpɔɔ nyu nunu pee ŋga nyu wra yo u leele pan kre nu. Kre nyjila kre na ee wa waŋgra ŋga nu finfin, na kaan haa ka n wa e pan, a e nsra Nyiɛkpɔɔ chin.
13 La, ŋga yire na Yesu Kristo pan mu pe nunu ŋga, yire mblɛ haa kra le kre, Kristo kumu tia a yire na Nyiɛkpɔɔ mbra aŋga.
14 Kristo wre titi u o ŋga wejinyiŋge, mu tia Judae, na mblɛ pe n pe Judae kro pan mu pe leele nunu. U yire wre titi wejiŋge na, mu yira ŋga kraa pre leele mblɛ lalaa yɔɔlɛ, mu pe pe loŋgoolo kre kla.
15 Wra Judae mbra yire, na yi kooloe tataara yire wɔ wa, imi kie pe mbe u ja mbe pre leele shiin mblɛ pe leele fumblɔ, mbe ti mbe Kristo na pre pe nunu, mbe ki pan na wejinyiŋge ni.
16 Kristo yire u kanyana kumu kaan kre kumu na mu loŋgooro ŋga kii wa wa kre wɔ wa, mu yire u kumu kre na chɔɔ, mu pre leele shiin pre pe leele nunu. Mu ndru mu pan na pe ni Nyiɛkpɔɔ jaara.
17 Kena Kristo na pan, mu ketaan ŋga ki paan na wejinyiŋge ni kre kpali ndro kro pan. Yire mblɛ e n pe Judae, a e haa na le na Nyiɛkpɔɔ ni kre, na Judae mblɛ pra mbra Nyiɛkpɔɔ na kro pan.
18 Kristo na ki yire a Judae, na mblɛ pe n pe Judae kro, a o kro Kpra Ŋumu nunu wre ta, mu pan o Lɛ Nyiɛkpɔɔ wre yiɛ.
19 Kena yire mblɛ e n pe Judae kre, waŋgra ka leele, ndee fumblɔ ma yire na, e pan mu pe Nyiɛkpɔɔ wre leele, na u sele leele.
20 Nyuŋgo ŋga nɔɔ bitumblɔ pre, na Nyiɛkpɔɔ kee nyanyofɛɛnlɛ pre na le kre, kre na yire chɔɔ yire na, a Yesu wre titi wi nyuŋgo kre ndra.
21 Wre u nyuŋgo kre yii mu mbra, mu tia kra gede, mbe sɛ pe Suminyuŋgo cheche mbe o Tafun Nyiɛkpɔɔ wre ŋga.
22 Kena ŋga yire na Kristo wre pe nunu ŋga, pe yire na hamblɛ pre chaa na e siin na nyuŋgo yi, mbe Nyiɛkpɔɔ yire u Kpra Ŋumu wre na mbe paan tni ki nu.