Yesu Na U Kotɔmblɔ Jeelee Je
13
Ki ble ŋga nyiŋge we se mbe pe kɛ le Klɛntro ble lie yire nu kre, Yesu na chin na u nyjila da mbe u yili waŋgra nu mbe sɛ u Lɛ wre pan. Wra waŋgra ŋga leele mblɛ pra pe u wolo pre kori nyjila kro nu, a pan wra pe kori mna sɛ su u kumu ble.
2 Ki yilakɔŋgɔ kre, ŋga wre na u twanfɛɛnlɛ pre na tni na lii kre, na Sutna le Judas, Simon Iscariot pɔ wre nu, na ki fna u Yesu wɔ mbe ŋga.
Jesus washes disciples feet (John 13:1-17)
3 Yesu na chin na u Lɛ u ŋga jaŋga kro, mna chin na Nyiɛkpɔɔ pan u yiri mu pan, a Nyiɛkpɔɔ wre pan we ndru mbe sɛ.
4 Yesu na yiri sro na, mna u dodoŋgi wɔ mu tɛɛ, mna gbofu wru mu pɔ sɛlɛ.
5 Bawa wra nyumu kna mu le taa kpɔɔ nu, mna u twanfɛɛnlɛ pre jeelee je, mna gbofu kre tɛɛ mu pe jeelee wɔ.
6 Ŋga wra da Simon Peter na kre, a Peter na kna mu yo mbo, “Ni Tafun, mi jeelee mu paan mbe je ŋgaa?”
7 A Yesu na kna mu yo u pan mbo, “Ŋga ni pini fuŋgaami ŋga, mu n ki chin, la, mu ki chin mbakɔ.”
8 Peter na kna mbo, “Mba ti mu ni jeelee je fio.”
A Yesu na yo u pan mbo, “Na ni n mu jeelee je, kena mu n pe ni twanfun.”
9 Simon Peter na kna mu yo Yesu pan mbo, “Ni Tafun, kena maa ni jeelee chiin je hin, la, ni kɛnyi na ni ndra kro je mu ya.”
10 A Yesu na yo mbo, “Ŋmba u weli kre, mu chin na u yili, ki n shian na we weli poŋgo, fɔna u jeelee chiin. E kro weli mu yili, fɔna ndro nunu.”
11 Ki nyjila kre, na u chin ŋmba we u wɔ mbe ŋga, kre kra tia wra yo mbo, “E kro yili, fɔna ndro nunu.”
12 Ŋga wra pe jeelee yire je mu kɔ kre, a wra ndru mu u dodoŋgi kre wru mu le, mna tni u tnihaa lihaa wa, mna pe wie mbo, “Kee ŋga ni pe e na ŋga, e ki nɔɔ chiin?
13 E ni yeeri Nyinafun, na e Tafun, a ki pe kpra, na e ni yeeri ma. Ŋgi na hin? Mi wi yɛŋgɛ.
14 Mi wi e Tafun, na e Nyinafun, a ni e jeelee je fuŋgaami. Kena pan ki fna mbe e na eyɛ jeelee jee na.
15 Ni ki pe mu e nyina, mbe e na pini ma na.
16 Kpra na, ni yuu e pan na, tnu n wɛ u tafun na, a pan chɔɔ bituŋu n wɛ ŋmba u u tun na.
17 Na e yire kee nyjɛ chin, na yi pini kre, e wo yi dwamu.
18 E kro na ma ni nyi. Ni mblɛ ni wɔ chin, imi kie pe mbe Nyiɛkpɔɔ kee ŋga pe nyunɔ mu tɛɛ kre pe kpra, mbo,
‘Ndro ŋmba mi na wre kɛ leni na lii wre,
u kaari ni loŋgo.’a
Jesus predicts betrayal (John 13:18-38)
19 Ni kre kee ŋga yuu e pan, mbe ki ble chiin da, na kia pe kre, mbe e shɔ mbe li na mi wi Kristo wre.
20 Kpra na, ŋmba we ni bituŋu shɔ kre, u ni shɔ. A ŋmba we ni shɔ kre, u ŋmba u ni tun wre shɔ na.”
Yesu Na U Wɔŋgafun Nyina
21 Ŋga Yesu na yire kee nyjɛ yo mu kɔ kre, u gbun na u fiiri, a wra yo mbo, “Kpra na, ni yuu e pan, e wa we ni wɔ mbe ŋga.”
22 Kra tia twanfɛɛnlɛ pre na kna na peyɛ yiɛ le poŋgo, pe nsra chin ŋmba na u nyi.
23 Twanfɛɛnlɛ pre nunu ŋmba Yesu na kori titi wre, na uu wa mu tni mu mbra wre Yesu na.
24 A Simon Peter na u kɛ tɛɛ mna paara u pan mbo, “U wie ndro ŋmba kee u yuu ŋga.”
25 A twanfun wre na flo mu da Yesu na, mna u wie mbo, “Ni Tafun ŋmbi na mu nyi hin?”
26 A Yesu na kna mbo, “Ŋmba mbe paanu ŋga ni mbe ŋga kre, wre wi.” Bawa wra paanu kre ka kun, mna ki ni mu Judas, Simon Iscariot pɔ wre ŋga.
27 Ŋga Judas na paanu kre shɔ to, titɛɛ kre nu, a Sutna na le u nu.
A Yesu na yo u pan mbo, “Kee ŋga mu chaa mbe pe kre, muyɛ wru nyaanyaa mu ki pe.”
28 Twanfɛɛnlɛ hamblɛ pre nsra kee ŋga wra yo Judas pan kre nɔɔ loo.
29 Ŋga Judas na pe pe swatɛɛfun kre, plɛ naa jawa na, yoo Yesu yo u pan na u sɛ yirɛ nyjɛ yi shian lɔ, mbe pe tɛɛ mbe ble kpɔɔ kre li, ndee aada u yo na u sɛ shianfɛɛnlɛ ŋga yaka.
30 Ŋga Judas na paanu kre shɔ to, a wra yili fimi na. Ki nyjila kre na ble wɔ.
Mbra Fɔŋgɔ
31 Ŋga Judas na sɛ kre, a Yesu na yo mbo, “Fuŋga Lewo Biblɔ wre yɛnyiŋge ta, a wre nu Nyiɛkpɔɔ we yɛnyiŋge ta na.
32 A na Lewo pɔ wre ndra na Nyiɛkpɔɔ yɛnyiŋge ta kre, kena Nyiɛkpɔɔ we ti mbe leele Lewo Biblɔ wre yɛnyiŋge nya poŋgo, kia mu.
33 Ni biile, mi na yire wa tni mbe mu na. Ee kɔ mbra ni chaa, la, kee ŋga ndaa yo Judae pre pan kre, ni yuu e pan, na yaa jaa sɛ mna ni shie kre.
34 Mbra fɔŋgɔ ŋga ni e kaan yi na, e eyɛ kori. Imi na ni e kori kre, pan ki fna e eyɛ kori na.
35 Na e eyɛ kori ma kre, ndro kro we chin na e pe ni twanfɛɛnlɛ yɛŋgɛ.”
Peter We Kaala Na U N Yesu Chin
36 Simon Peter na u wie mbo, “Ni Tafun, sena mu shie hin?”
A Yesu na kna mbo, “Ma jaa taa ni na fuŋgaami mbe sɛ mna ni shie kre, la, mu kɔɔ taa ni na mbakɔ.”
37 A Peter na kna mbo, “Ni Tafun, mni a mba jaa taa mu na fuŋgaami hin? Na kumu yi kuraa, mbe ku mu ndra na.”
38 A Yesu na kna mbo, “Mu muyɛ kna na mu ku mi ndra naa? Kpra na, ni yuu mu pan, ŋgoplɔ wa nyɛni, na mu kaala gbee taarɛ na mu n ni chin.”