Kristo Wi Kolo Kre
14
Yaa ti mbe e gbun na yɔɔlɛ e na. E Nyiɛkpɔɔ shɔ e li, e mi titi shɔ e li na.
2 Nyinyii wa ni Lɛ katoo tataara. Na yɛŋgɛ ma, mba na yo na ni shie mbe sɛ lawee gbeele e pan.
The only way to God (John 14:1-14)
3 A na ni sɛ lawee gbeele e pan mu kɔ kre, mbe ndru mbe pan, mbe e wru mbe sɛ ni lawee, kena mna ni nyi kre, bawa ee tni na.
4 E mna ni shie kre haa chin, mu ki kolo chin.
5 Thomas na kna mbo, “Ni Tafun, na o n chin mna mu shie, kena mni oo pe mbe kolo chin hin?”
6 A Yesu na kna mu yo u pan mbo, “Mi wi kolo kre, na kpra kre, na ŋmaa, ndro wa ja mbe sɛ ni Lɛ wre pan, fɔna u tro ni na.
7 Na e ni chin kre, ee ni Lɛ wre chin na, a fuŋga, e u nya, mu u chin.”
Kristo Na U Lɛ Wre Pe Ndro Nunu
8 Philip na yo u pan mbo, “O Tafun, o nyina o Lɛ wre, na o wre nya, kena o kɔ.”
9 A Yesu na kna mbo, “Philip, mi na yiree wa mu tni fafa ŋga na, kena e n ni chin tuun? Ŋmba u ni nya kre, u Ndoo wre nya. A mni a e ndru na yuu na, ‘O nyina Ndoo wre na hin?’
10 Philip, kena mu n shɔ mu li na nii wa Ndoo wre nu, a Ndoo wree wa ni nu ra?” Wra yo u twanfɛɛnlɛ pre pan mbo, “Kee nyjɛ ni yuu e pan ŋga, mi pan ma yi yiri. Ndoo ŋmba uu wa ni nu wre u u tnumu tuni.
11 E shɔ e li na nii wa Ndoo wre nu, a Ndoo wree wa ni nu. Na pan ma naa, e ni tnumu nyjɛ ni tuni yire le, e shɔ e li.
12 Kpra na, ni yuu e pan, ŋmba we ni shɔ mbe li kre, we ja mbe tnumu nyjɛ ni tuni ŋga tun, hali we jaa kekpɔɛ pe mbe wɛ nyjɛ ni pini ŋga na. Ŋgi na hin? Ni shie Ndoo wre jaara.
13 Yira ŋga ee tali ni mɛɛ nu kpan, mbe ki pe, imi kie pe mi ndra na, mbe leele Ndoo wre ŋga yɛnyiŋge.
14 Yira ŋga ee tali ni mɛɛ nu kpan, mbe ki pe.”
Kpra Ŋumu Wre Kee
15 “Na e ni kori, ee li ni mbra na.
Jesus talks about the Holy Spirit (John 14:15-31)
16 Mbe Ndoo wre tali, mbe u e ŋga Yafun wa na. Kpra Ŋumu wre, mbe yire na wre tni nyjila kro nu.
17 Waŋgra leele wa ja mbe u yii. Ŋgi na hin? Pia u nya, mbaa yo chiin pie u chin. La, yire u chin, ŋgi na hin? Yire na wre ee wa mu tni, a uu wa e nu.
18 Mba e ti bijile, la, mbe ndru mbe pan e pan.
19 Ki kro chiɛri mbe waŋgra leele wa ni nya na, la, yire we ni nya. Ŋga nii ŋmaa ni ŋga, ee ŋmaa ta.
20 Ki ble kre, ee chin na nii wa ni Lɛ nu, a ee wa ni nu, a nii wa e nu na.
21 Ŋmba we ni mbra shɔ, mbe li yi na kre, wre wi ŋmba u ni kori. A ŋmba u ni kori kre, ni Lɛ wre u kori, a mi titi we ufun kori na, mbe niyɛ wɔ mbe u nyina.”
Chaara
22 Judas, Yesu wɔŋgafun wre mɛɛfun wre na yo mbo, “Ni Tafun, mni mbe mu muyɛ wɔ mbe o nyina, a ma muyɛ wɔ mbe waŋgra leele nyina hin?”
23 A Yesu na kna mbo, “ŋmba u ni kori kre, we li ni kee kre na. Ni Lɛ we u kori na, mbe mi na ni Lɛ kro paan tni u nu.
24 Ŋmba u n li ni kee na kre, u n ni kori, a kee ŋga e ndru ŋga, ni wo ma, ni Lɛ ŋmba u ni tun wre nyu kee yi.”
Nyinafun Kpɔɔ Wi Kpra Ŋumu Wre
25 “Ni yire kee nyjɛ yo e pan, nyjila ŋga ni mi na yiree wa ŋga.
26 La, Kpra Ŋumu ŋmba ni Lɛ we tun na ni mɛɛ ni, mbe u paan ya e na wre, we e nyina yirɛ kro, mbe e sɔɔnri kee nyjɛ ni yo e pan ŋga krɛrɛ.
27 Wejinyiŋge nu ni e ti. Mi titi wejinyiŋge ni e ŋga, ki n pe na ŋga waŋgra kaan kre ka ni e ŋga. Yaa na kawa kee ka ni, a yaa shia fiɛ.”
Kristo We Sɛ U Lɛ Wre Pan
28 “Ni ki yo e pan a e loo na ni shie, la, mbe ndru mbe pan e pan. Na e ni kori, e yiɛ we shɔ na ni shie Ndoo wre pan, ŋgi na hin? U wɛ mi na.
29 Ni yire kee nyjɛ yuu e pan, mbe yi chiin pe, imi kie pe na yi waa pan, mbe e shɔ mbe li.
30 Mba paara na e ni titnɔŋɔ na. Ŋgi na hin? Waŋgra ŋga tafun wre paan, u n jaŋga ni mi na.
31 La, waŋgra leele fna mbe chin na ni Ndoo wre kori, kre ki tia ndaa nyjɛ u yo ni pe kro pini. E yiri mna mbe o sɛ.”