Kachimblɛ Pre
2
Pra Yesu se Bethlehem ŋga kii wa Judea tra nu kre na, kre nyjila kre, na Herod wi ŋunu kre tra kre nu. Ŋga pra Yesu se kre, kachimblɛ plɛ na yiri yilafinhaa mna pan Jerusalem na,
2 mna pan na wie mbo, “Sena Judae ŋunu ŋmba pe se wre nyi hin? O u wɔlɔ nya yilafinhaa na paan mbe u sumi.”
Visit of the Magi (Matthew 2:1-23)
3 Ŋga ŋunu Herod na kee kre loo kre, gbun na yɔ u na, a kra wre na Jerusalem leele kro jawala tɔɔra.
4 A wra Judah srawɔfɛɛnlɛ loplombo, na nyinafɛɛnlɛ pre kro yeeri mu ble, mna pe wie mbo, “Chia ŋgi na pra yo na pie Kristo wre se kre hin?”
5 A pra kna mbo, “Bethlehem ŋga kii wa Judea tra nu kre na. Pan Nyiɛkpɔɔ keenyanyofun wre na ki nyunɔ mu tɛɛ, mbo,
6 ‘Ŋu Bethlehem ŋga muu wa Judah tra nu,
mu ŋunumu n pe fiɛn Judah ŋulo nu.
Ŋgi na hin? Ŋu sele nu ŋunu we yiri
mbe paan ni leele Israel wolo pre le.’”a
7 Ŋga kra pan ma kre, ŋunu Herod na kachimblɛ pre yeeri brɛmm mna pe wie nyjila ŋga nu wɔlɔ kre na yili.
8 A wra yo pe pan mbo, “E sɛ pɔ wre haa cha chiriri. Na e waa u nya, e ndru e pan e yo ni pan, mbe ni sɛ u sumi ka na.”
9-10 Ŋga pra ŋunu wre kee kre loo mu kɔ kre, a pra to kolo. Ŋga praa shie to, a wɔlɔ ŋga pra nya yilafinhaa kre na yili mu yiɛ klu pe pan, mna sɛ yire katoo ŋga nu pɔ wre na nyi kre ndra na, a pe yiɛ na shɔ mu tro.
11 A pra sɛ le katoo wa mna pɔ wre, na u lo Mary nya, a pra kosie kan u yiɛ, mna pe tuuro zaanri mna u kɛ swa nyiɛ, na tlade, na kroboo.
12 Ŋga praa wa wa kre, ki ble ka blee Nyiɛkpɔɔ na pe jaari ŋunɛ nu na pia shia ndru mbe sɛ tro Herod lawee na. A kra tia pra tro kolo fɔŋgɔ na mna sɛ pe chia.
Pra Fɛ Mu Sɛ Egypt Tra Nu
13 Ŋga kachimblɛ pre na yili wa mna sɛ kre, nyjeeri bituŋu wa na uyɛ wɔ mna Joseph nyina ŋunɛ nu mbo, “Yiri mu pɔ wre, na u lo wru mu fɛ mu sɛ Egypt tra nu. E sɛ tni wa e sɛ su nyjila ŋga nu mbe yo na, e ndru e pan. Ŋgi na hin? Herod pɔ wre chaa mbe gbo.”
14 A Joseph na yiri blee kre, mna pɔ wre, na u lo bali mna yili chia kre na mna sɛ Egypt tra nu.
15 Bawa pra tni mna sɛ su nyjila ŋga nu ŋunu Herod na ku. Kre kee ŋga na pe mna tia Nyiɛkpɔɔ kee ŋga wra yire u keenyanyofun wre na mna yo kre na pe kpra, mbo,
“Ni ni Biblɔ yeeri mu yili Egypt tra nu.”b
Pra Bethlehem Biile Fiɛnfiɛn Gbo
16 Nyjila ŋga ŋunu Herod na nya na kachimblɛ pre u fana kre, u krɔ na kun kpɔɔ. A wra leele tun na pe sɛ bibilɛ mblɛ pee wa Bethlehem na ki mbɛɛlɛ chiɛ yire na kro gbo, pe mblɛ pe li yɛlɛ shiin, na mblɛ pe n ta mu da tun kre kro, mu yire ŋga ble wra kee kre loo kachimblɛ pre pan kre na.
17 A kee nyjɛ Nyiɛkpɔɔ kee nyanyofun Jeremiah na yo kre na pan ma mbo,
18 “Mana kpɔɔ ka yilii Ramah na,
nyɛnɛɛ na fooro kpɔɔ kee yi,
Rachel u biile nyɛni, a pia jaa u bre.
Ŋgi na hin? U biile pre n wa na.”c
Pra Ndru Mu Yili Egypt Tra Nu
19 Herod kumu kɔkro kre, Nyiɛkpɔɔ bituŋu na uyɛ wɔ mna Joseph nyina ŋunɛ nu Egypt tra nu mbo,
20 “Yiri mu pɔ wre na u lo wru mu ndru mu sɛ Israel tra nu. Mblɛ pe pɔ wre chaa mbe gbo kre, pe ku.”
21 A Joseph na yiri mu pɔ wre na u lo wru mna sɛ Israel tra nu.
22 A ŋga Joseph na loo na Archelaus sɛ u lɛ Herod krɔ li mu ŋunumu li Judea tra nu kre, kra tia fiɛrɛ na u yii, a wraa fiɛ na we sɛ wa. Ŋga kra pan ma kre, Nyiɛkpɔɔ na u jaari ŋunɛ nu, a wra sɛ Galilee tra nu,
23 mna sɛ tni Nazareth chia kre na. Kre kee ŋga na pe, mna tia kee ŋga Nyiɛkpɔɔ kee nyanyofɛɛnlɛ pre na yo mu tɛɛ kre na pe kpra mbo,
“Pie u yeeri Nazareth wo.”