Kpra Ŋumu Wre Ŋgahaa
2
Ŋga Pentecost ble kre na to kre, na bitumblɔ pre, na shɔnlifɛɛnlɛ pre kro fni titɛɛ.
2 Titɛɛ kre nu, gblee kpɔɔ ka na tin mu yiri nyjeeri imi na fuflɛ kpɔɔ gbuun ŋga, mna pan mu katoo ŋga nu pra nyi kre nyi.
3 A yirɛ yɛ naa ndile woni na kanhun yi na pe nyina. A yira yɔɔlɛ mna to to pe ndrɛ na.
4 A Kpra Ŋumu wre na pe kro nyi, titɛɛ kre nu, a praa yolo fɔnyi yuu, imi na Kpra Ŋumu wre na pe ŋga kro.
Yolo Fɔnyi Yire Ŋgahaa
5 Kre nyjila kre, na Judae mblɛ praa Nyiɛkpɔɔ fiɛ, mu yiri waŋgrɛ kro nu kree wa Jerusalem na wa.
6 Ŋga kra pan ma kre, lenɛɛrɛ naa wa wa, a bie na ye pe na, imi pra loo na leele pre, pe kro chiɛ yolo yuu kre.
7 A kra pe kro pe kepee ni, a pra kna mbo, “E le, leele mblɛ pe paara ŋga kro, Galilee na ma pe yiri kree?
8 A mni ki pe, a pe kro ja mu na o chiɛ yolo yuu ŋga hin?
9 Leele mblɛ praa wa wa na lɛ, Parthian leele, na Mede leele, na Elam leele, na Mesopotamia leele, na Judea leele, na Cappadocia leele, na Pontus leele, na Asia leele,
10 na Phrygia leele, na Pamphylia leele, na Egypt leele, na Libya ŋga ki mbra Cyrene na kre leele, na fumblɔ mblɛ pe yiri Rome na.
11 Na Judae, na leele mblɛ pe chinɛ mu pan mu le Judae sumiɛ nu. Na Crete leele, na Arabia leele ni kro. A praa yuu mbo, ‘O loo a pra kekpɔɛ nyjɛ Nyiɛkpɔɔ pe yuu o yolo nu.’”
12 A kra pe kro pe kawako ni, a pe nsra chin ŋga pie yo, a pra kna na peyɛ wie mbo, “A kee nyjɛ pe pini ŋga nɔɔ yi ŋgi hin?”
13 A pe plɛ naa pe pini na tɛɛ mbo, “Simi pe gbɔ mu to.”
Peter Paarahaa
14 Na Peter na kɛmbɔnunu pre wa mu yire, a Peter na paara gedeŋge lenɛɛrɛ pre pan mbo, “O wolo Judae, na e mblɛ ee wa Jerusalem na kro, e kee ŋga loo. E ti kee ŋga mbe yo ŋga le e ndie.
15 Leele mblɛ e nya ŋga, simi ma pe gbɔ mu to, imi na e jawa kre, bnimi nyu ŋga, kie pe nyjila kɔɔnanyjirɛ yi ŋga, simi gbɔ nyjila ma.
16 Kre kee ŋga Nyiɛkpɔɔ keenyanyofun Joel na nya mu yo kre mbo,
17 ‘Nyiɛkpɔɔ na yo na,
ble nyjɛ yie kro tɔ yire nu kre,
mbe ni Ŋumu kna mbe wo ndro kro na,
mbe e bibilɛ, na e bichiɛlɛ na Nyiɛkpɔɔ
kee nyaa mbra yuu,
mbe nyanyjɛbɛɛlɛ na ni kee nyaa nyiɛlɛ na,
mbe e loplombo na ŋunɛ ŋunu.
18 Yire ble yire nu kre,
ni sumifɛɛnlɛ, bilɛ na chiɛlɛ,
na mbe ni Ŋumu kna mbe wo,
mbe pra ni kee nyaa mbra yuu.
19 Mbe kawako kee pe nyiɛ yiɛ na,
mbe yi yɛ pe waŋgrɛ nu tra yiɛ na.
Nyimi na kanhun na wree we lawee tɔ.
20 Mbe ndram wɔ lafo na,
mbe nyiɛpɔ kaari nyimi,
mbe o Tafun yɛnyiŋge ble kpɔɔ kre,
mbe ki chiin da.
21 Kie pan na ŋmba we o Tafun wre mɛɛ yeeri kre,
pie ufun ŋmaa shɔ.’”a
Yesu Kunnyiɛ
22 A Peter na yo mbo, “Israel leele, e ni kee ŋga loo. Yesu Nazareth wo wre, blɔ ŋmba Nyiɛkpɔɔ na wɔ mu e nyina, mna yire u na mu kekpɔɛ, na kawako kee pe e lalaa, a yire titi na nya kre,
23 wre Yesu ŋmba, e yire kolo ŋga Nyiɛkpɔɔ yo mu tɛɛ, na kee ŋga Nyiɛkpɔɔ chin mu tɛɛ fa kre na, mna u wɔ mu le leele mblɛ pe nsra Nyiɛkpɔɔ mbra li kɛɛ, a pra u gbo kanyana kumu kaan kre na.
24 Wre Nyiɛkpɔɔ nyi, mu kumu kanyana maŋa kre saan. Ŋgi na hin? Kumu nsra ja mu jaŋga li u na.
25 Wre kee David na yo mbo,
‘Ni Tafun wa ni yiɛ nyjila kro nu.
Uu wa ni kalie,
ki tia mba seeri.
26 Kre ndra na, ni gbun nyjii ni na,
a ni ndile saan ni nyuu kama.
Nii wa na kaan haa ni.
27 A wa ti ni kro faŋga nu,
a wa ti mbe u sumifun cheche wre,
mbe u fɔɔn wee.
28 A wre u ni nyina ŋmaa kolo,
mbe ni yiɛ shɔ u jaara.’b
29 Kena ni wolo, e ti ni o lɛ lopom David kee yo e pan mbe e loo. Wra ku, a pra u le, a u lehaa wa mna, mu pan mu su aŋga.
30 Nyiɛkpɔɔ keenyanyofun na wi, a ŋga wra chin na Nyiɛkpɔɔ da mu yo u pan na, u sele ndro we yiri mbe pan mbe tni u ŋujɔɔn kre na kre ndra na,
31 wra klu mu nya na kie kɔɔ pan ma, mnaa Kristo wre kunnyiɛ kre kee yuu mbo, ‘Pia u ti faŋga nu, a wa fɔɔn wee.’
32 Wre Yesu wre Nyiɛkpɔɔ nyi kre, a ki dansiɛfɛɛnlɛ lɛ wre.
33 Nyiɛkpɔɔ na u yire mu sɛ u tɛɛ u kalie, mu u ŋga Kpra Ŋumu wre, imi na wra nyu yo u pan kre, kre e loo, mu nya kre.
34 David nsra sɛ nyjeeri, ande wra yo mbo,
‘O Tafun na yo ni Tafun pan na,
tni ni kalie,
35 mu sɛ su nyjila ŋga nu
mbe ti mu mu jeelee taa mu loŋgoolo na.’c
36 Kena ki fna mbe Israel leele kro chin yɛŋgɛ, na Yesu ŋmba e na gbo wre, Nyiɛkpɔɔ u pe Tafun na Kristo wre.”
Leele Kagbenyi Taarɛ Pe Jawala Chinɛ
37 Ŋga pra kee kre loo kre, a kra pe yaa lolonyi nu, a pra kna mna yo Peter, na bitumblɔ hamblɛ pre pan mbo, “O wolo, ŋgi e yo o pe hin?”
38 A Peter na kna mbo, “E kro, e e jawala chinɛ, mbe o e ndrɛ je Yesu Kristo wre mɛɛ nu, mbe e sisam tinkɛɛ ta, kre ee Kpra Ŋumu wre kɛ yira kre ta.
39 Kpra Ŋumu wre kee Nyiɛkpɔɔ na yo mu tɛɛ wre, yire na e biile, na mblɛ pee wa haalee kro, na mblɛ o Tafun Nyiɛkpɔɔ we yeeri mbe pan u jaara pre kro wo wi.”
40 A wra kee tataara tɛɛ mu dansiɛrɛ li, mna paara mu pe nyina mbo, “E eyɛ wɔ e yili aŋga leele mblɛ pe n fraka ŋga nu.”
41 A mblɛ pra kee kre shɔnli pre, na tia pra pe ndrɛ je. Ki ble kre lam, pra leele kagbenyi taarɛ ta, mu ya peyɛ na.
Shɔnlifɛɛnlɛ Pre Tnɛɛ
42 A shɔnlifɛɛnlɛ pre na peyɛ wru mu bitumblɔ pre ŋga, a pra pe nyina Nyiɛkpɔɔ kee kre, mna nyu nunu na chaanlie, na nyiɛtalaa yii kɛ shiin.
43 A kra fiɛrɛ wo lenɛɛrɛ na, a Nyiɛkpɔɔ na bitumblɔ pre tɛɛ mu kawako kee pe tataara.
44 A mblɛ pra shɔnli pre kro naa fni lawee nunu nu, mnaa chaa na yira kro pini.
45 A pra pe krɔyirɛ prɛ, mu yi yɔɔlɛ mu peyɛ ŋga imi na kra pe shian mu da.
46 A blenyini ŋga, pan praa fni pe Suminyuŋgo lawee vankam kre nu, na chaa Nyiɛkpɔɔ sro, na pre titi sro lii pe katoe nu. Pan praa yɛshɔɔrɔ, na lɛɛ nunu teeri na chaa na lii.
47 A pe kro naa Nyiɛkpɔɔ kaan mɛɛ, mna yɛnyiŋge ta ndro kro pan. Blenyini ŋga, pan o Tafun Nyiɛkpɔɔ wre naa mblɛ ŋmaa praa shio pre yaa pe na.