Fna Wa Tra Haa
3
Ki ble ka, na kie pe nyjila taarɛ lafo na, pe nyiɛtali nyjila, a Peter, na John na chaa na shie pe Suminyuŋgo wa.
2 Kre nyjila kre, na blɔ wa, fna wi mu yire u bimi, a praa u tru blenyini na shie na teeri Suminyuŋgo kre jlonwee nyu ŋga praa yeeri Chichie kre na, mbe wra leele mblɛ pe shie Suminyuŋgo wa pre tali.
3 Ŋga fna wre na Peter, na John nya na pe paan Suminyuŋgo wa kre, a wra pe tali na pe u ŋga swa.
4 A Peter, na John na yiɛ kan blɔ wre na, a Peter na kna mu yo u pan mbo, “Ta o le,”
5 A blɔ wre na kna na pe le. Na aada we yaka nyini ta pe pan.
6 A Peter na kna mbo, “Swa n wa ni pan mbe ni mu ŋga, la, ŋga ni ta mbe mu ŋga ye. Yesu Kristo, Nazareth wo wre mɛɛ nu, yiri mu nyaari.”
7 A Peter na u kalie yii, mu u yire mu yire sholo. Titɛɛ kre nu to, a blɔ wre jenyaarɛɛ, na u sooloe na yire u na.
8 A wraa yeni na tro, a wre na Peter, na John na le Suminyuŋgo wa, a wraa nyaari, na yeni na Nyiɛkpɔɔ kaan mboo.
9 A leele pre kro na u nya, imi na wraa nyaari na Nyiɛkpɔɔ kaan mɛɛ ma kre,
10 pra u chin na wre wra yila talaa na mnaa jiin Suminyuŋgo kre jlonwee nyu ŋga pe yeeri Chichie kre na kre. Kra tia kee kre na pe kro pe kawako, na kefolom kuraa mu tro.
11 A ŋga pra nya na u kun mu mbra Peter na John na ma kre, leele tataara na pan mu fɛ mu pe kun, bamba ŋga praa yeeri Solomon bamba kre lawee, a kra pe pe pan kawako ni mu tro.
12 Ŋga Peter na pe nya ma kre, a wra kna mna yo pe pan mbo, “O wolo Israel leele, yira ŋgi ki tia kee ŋga e pe kawako ni ma ŋga hin? Ndee ŋgi ki tia e na o le haan ma na o jaŋga, ndee o chichie ki tia blɔ ŋmba na nyaari ŋga hin?
13 Abraham, na Isaac, na Jacob Nyiɛkpɔɔ wre, o lɛ Nyiɛkpɔɔ wre, wre u u pɔ Yesu ŋmba e na wɔ mu ŋga, a Pilate na u ŋga tamu, mna chaa mbe u wa, a e na je kre, u yɛnyiŋge ki tia.
14 A e na u sumifun ŋmba u fraka mu pe cheche wre je, mna yo na linkufun e chaa.
15 A ŋmaa ŋgafun wre rɛ, a e na wre gbo. A wre Nyiɛkpɔɔ nyi mu yili kuulo nu kre, a ki dansiɛfɛɛnlɛ lɛ wre.
16 A u mɛɛ kre, na shɔnlie ŋga kii wa u mɛɛ kre nu kre, kre ki blɔ ŋmba e chin ŋmba ŋga faŋga, a e kro u nya mna fuŋgaami ŋga kre. Shɔnlie ŋga kii wa Yesu nu kre, kre ki u ŋga faŋga chiriri e yiɛ ŋga na kre.
17 Kena fuŋgaami, ni wolo, ni chin na chiin e n na chin, imi na e loplombo pre nsra ki chin kre.
18 Kena imi Nyiɛkpɔɔ na yire u keenyanyofɛɛnlɛ pre kro na, mna yo mu tɛɛ kre, ki pan ma yɛŋgɛ na Kristo wre we pan mbe kala nya tataara.
19 Kena e e jawala chinɛ, e ndru e taa u kro, mbe Nyiɛkpɔɔ e sisam pɔ mbe laa e na.
20 Na ki pan ma kre, o Tafun Nyiɛkpɔɔ wre we e ŋga wejinyiŋge tnimu, ŋga kie yiri Kristo wre pan.
21 Wre u fna mbe kro nyjeeri wa, mbe sɛ su nyjila ŋga nu Nyiɛkpɔɔ we u kee nyjɛ wra yire u keenyanyofɛɛnlɛ chechee pre na mna yo mu tɛɛ yire pe fɔnyi.
22 Moses wra yo mbo,
‘Nyiɛkpɔɔ keenyanyofun ŋmba u pe na mi wi,
wre e Tafun Nyiɛkpɔɔ we yire e nu mbe e ŋga.
Wre pan ki fna mbe e ndie tɛɛ.
U kee ŋga we yo e pan kro, mbe e ki loo.
23 A ndro ŋmba u nsraa ndie tɛɛ
wre Nyiɛkpɔɔ kee nyanyofun wre pan kre,
pie ufun wre kla, mbe yili Nyiɛkpɔɔ leele nu.’a
24 Mu yire Nyiɛkpɔɔ kee nyanyofun Samuel na, mu pan mu su u kro wolo mblɛ pra pan pre na, pra yire ble nyjɛ kee yo.
25 A yire lɛ pre Nyiɛkpɔɔ keenyanyofɛɛnlɛ pre, na nyu ŋga Nyiɛkpɔɔ na yo e tolɛɛlɛ pan mu tɛɛ kre biile, imi na wra yo Abraham pan kre mbo,
‘Mu sele ndro na mbe yire
mbe waŋgra ŋga leele kro dwan.’b
26 Kre ndra na, ŋga Nyiɛkpɔɔ na u Sumifun wre nyi kre, a wra klu mu u tun na u paan e ŋga dwamu ŋga kie e kna mbe yili e sisam nu.”