Peter Na John Yiihaa
4
Ŋga praa paara na leele pre nyina kre, srawɔfɛɛnlɛ loplombo pre, na Suminyuŋgo kre shiefɛɛnlɛ lopom, na Sadducee leele pre na pan pe na.
2 Pe krɔ na kun na Peter, na John leele pre nyina, na Yesu kunnyiɛ kee kre yuu pe pan.
3 A pra pe yii, a na yila kɔ, kra tia pra sɛ pe le nyuŋgo mbe nyiŋge pe se.
4 La, leele mblɛ pra pe kee kre loo kre, tataara na ki shɔnli. Bilɛ mblɛ pra ki shɔnli pre naa kagbenyi kunɔ.
Pe Kee Lihaa
5 Ŋga nyiŋge na se kre, pe ŋulo, na pe loplombo pre, na nyinafɛɛnlɛ pre na pan mu fni Jerusalem na,
6 na srawɔfun lopom Annas, na Caiaphas, na John, na Alexander, na leele mblɛ pra yiri srawɔfun lopom wre katoo wa kro na sɛ fni wa.
7 A pra pan na John, na Peter ni mu yire pe lalaa, mu pe wie mbo, “Ŋmbi jaŋga, ndee ŋmbi mɛɛ ni e tɛɛ mu kre kee ŋga pe hin?”
8 Bawa Peter ŋmba na Kpra Ŋumu wre na wɛ wre na yiri, mna yo pe pan mbo, “Tolɛɛlɛ, na loplombo,
9 aŋga, na e o wie chichie ŋga yaŋu ŋmba ta, na faŋga ŋga u ta ŋga kee waa,
10 ni chaa mbe e kro, na Israel leele kro chin, na Nazareth ndro Yesu Kristo ŋmba e na kan kanyana kumu kaan na wre, ŋmba Nyiɛkpɔɔ na nyi mu yili kuulo nu wre, u mɛɛ nu blɔ ŋmba faŋga ŋga ta.
11 ‘Wre wi dnɛ ŋga yire nyuŋgo sinfɛɛnlɛ
na yo na ki n nyu kre,
a nde kre ki kɔ mu pe
nyuŋgo kre ndra faŋga,’a
12 A ŋmaashɔmu ka n wa ndro wa nu, a mɛɛ fɔŋgɔ ka n wa waŋgra ŋga nu, a kii wa ndro nu, mbe o ŋmaa ta ki nu.”
Pe Wahaa
13 Ŋga pra John na Peter gbunkuuro kre nya ma kre, a pe pe chin na pe n da mu hlɛ tuan, mu pe lewaala plɛ kre, kra ndru mu pe pe kawako ni, a pra chin na pre na Yesu na tni.
14 A ŋga pra blɔ ŋmba pra tra wre nya, na uu wa pe jaara kre, pe nsra kee ka ta mbe yo mbe pe taan.
15 A pra tia pra pe yile fimi na, a pra bɔɔnri mbo,
16 “Kena kee ŋgi oo leele mblɛ pe hin? Kawako kee nyjɛ yi yire pe na mu pe yire krɛrɛ, Jerusalem leele tataara yi nya, a waa jaa kee ka pe mbe yi kaala na.
17 La, ŋga oo pe mbe kee kre pe pini kre wa kro mbra kpali na kre, jaari ki fna mbe o pe jaari, mbe pia Yesu wre mɛɛ tɛɛ mbe paara kuraa mbe ndro nyina na.”
18 A loplombo pre na John na Peter yeeri na, mna yo pe pan na pia shia paara, ndee mbe Yesu mɛɛ yeeri kuraa mbe ndro loo.
19 A Peter na John na kna mu yo pe pan mbo, “Na ki fraka Nyiɛkpɔɔ yiɛ, na ki fna mbe o e nyu kee loo mbe wɛ wre Nyiɛkpɔɔ wo na kre, e ki kpra kun.
20 La, wre rɛ, waa ki ja, fɔna wre ŋga o nya, na ŋga o loo kre kee yo.”
21 A pra pe jaari kpɔɔ, mna pe wa. Lenɛɛrɛ pre ndra na, pe nsra chin imi nyini pie pe pe. Ŋgi na hin? Kee kre pra pe kre na tia lenɛɛrɛ naa Nyiɛkpɔɔ kaan mɛɛ.
22 Na blɔ ŋmba na kre kawako kee kre na pe wre, na u wɛ yɛlɛ fuloe shiin na.
Shɔnlifɛɛnlɛ Pre Nyiɛtalaa
23 Ŋga pra pe wa kre, a pra pan pe wolo pre pan, mna sɛ kee nyjɛ srawɔfɛɛnlɛ loplombo pre, na chia loplombo pre na yo pe pan yire kro yo pe pan.
24 Ŋga pra ki loo kre, pra loloŋgo nunu wru mna yo Nyiɛkpɔɔ pan mbo, “O Tafun, ŋu ŋmba mu nyjeeri na tra gbeele, na epo, na nyjɛ yii wa ki nu kro ni,
25 mna yire Kpra Ŋumu wre na mna tia o tolɛɛ David, mu sumifun wre na yo na,
‘Ŋgi ki tia waŋgra leele na kanyaa leni
na kewɛɛ jawa ŋga hin?
26 Ŋulo mblɛ pee wa waŋgra ŋga nu
yiri mu yire sholo,
a pe loplombo na fni
na nyu pini nunu o Tafun Nyiɛkpɔɔ wre,
na u Kristo ŋmba u wɔ wre na.’b
27 A yɛŋgɛ na, pe fni yɛŋgɛ chia ŋga na, Herod, na Pontius Pilate, na waŋgra leele, na Israel leele kro, pe fni mu nyu ta nunu mu sumifun cheche Yesu ŋmba mu wɔ wre na.
28 Kee nyjɛ mna yire mu jaŋga, na mu kachindɛ na mna yo mu tɛɛ fa, na yie pe yire, yire pe pini kre.
29 Kena o Tafun, pe kee nyjɛ pe pini na o piɛri nyjɛ le, mu mu sumifɛɛnlɛ ŋga faŋga, mbe pe gbun ta mbe mu kee kre yo.
30 Mbe mu mu jaŋga kpɔɔ kre tɛɛ mbe yambla tra, mbe yire mu pɔ cheche Yesu wre mɛɛ na, mbe kawako kee pe.”
31 Ŋga pra nyiɛtali mu kɔ kre, lawee ŋga nu pra fni kre na seeri, a Kpra Ŋumu wre na pan mu pe kro nyi, a pra faŋga ta mnaa Nyiɛkpɔɔ kee kre yuu.
Shɔnlifɛɛnlɛ Pre Koroo
32 Shɔnlifɛɛnlɛ pre kro na jawala nunu, na nyu nunu wru. A wa nsra u krɔyirɛ wru mu pe wre nunu wee, la, pe krɔyirɛ na pe pe kro wee.
33 A bitumblɔ pre na jaŋga kpɔɔ ta, mnaa Yesu kunnyiɛ kre dansiɛrɛ lii. A Nyiɛkpɔɔ na nyu pe na kro.
34 Shianfun nsraa wa pe nu. Ŋgi na hin? Pe mblɛ praa wa na tra, na kalonyi ni kre kro naa yi prɛ, na paan na yi swa ni bitumblɔ pre yiɛ,
35 na yi yɔɔlɛ na peyɛ kaan imi na ki fna.