Ananias Na U Chɔ Ndie Tini Haa
5
Bawa blɔ wa, praa u yeeri Ananias na u chɔ Sapphira, na sɛ pe tra ka prɛ.
2 A wre na u chɔ wre na swa kre ka kun mu ndra, mna pan na ki kɔɔn ni bitumblɔ pre yiɛ.
3 A Peter na kna mu yo Ananias pan mbo, “Yira ŋgi ki tia Sutna mu loloŋgo nyi ma hin? A mu tra kre swa ka kun mu ndra, mu pan mbe kala fnɛ Kpra Ŋumu wre pan ŋga hin?
4 Ŋga tra kre naa wa kre, na mu wo maa? A ŋga mu ki prɛ mu kɔ kre chɔɔ, swa kre mu wo yi. Kena ŋgi ki tia mu jawala ŋga nyini wru hin? Leele pan ma mu kee ŋga fnɛ, la, Nyiɛkpɔɔ pan yi.”
5 Ŋga Ananias na loo ma to, a wra to mu ku. Ŋga kra pan ma kre, fiɛrɛ na lenɛɛrɛ mblɛ pra ki loo kro yii.
6 A nyanyjɛbɛɛlɛ pre na yiri mna u tɔ na yira ni, mna u bali mu sɛ u le.
7 Ki kɔkro kie pe nyjila nununu taarɛ kre, u chɔ na pan wa, na u n ŋga ki pe loo.
8 A Peter na kna mu u wie mbo, “Sapphira, kpra yo ni pan. Kena imi e na tra kre prɛ mu shɔɔ?”
A chlɔ wre na yo, “Ɛnhɛɛn, pan o na ki prɛ mu shɔ.”
9 A Peter na kna mu yo u pan mbo, “Ŋgi ki tia e kro nyu pe nunu, mbe paan o Tafun wre Ŋumu pe mbe le ŋga hin? Le, leele mblɛ pe sɛ mu plɔ le kuraa pe paan kre, a pan pie mu wru mna mbe sɛ le na.”
10 Titɛɛ kre nu wa to, a wra to u yiɛ mu ku. Ŋga nyanyjɛbɛɛlɛ pre na pan kre, na chlɔ wre ku na, a pra u wru mna sɛ le u plɔ mbɛɛ na.
11 Ŋga kra pan ma kre, fiɛrɛ na sumifɛɛnlɛ pre, na mblɛ pra kee yire loo pre kro yii.
Kawako Kee Yɛ Pehaa
12 A Nyiɛkpɔɔ na yire bitumblɔ pre na mna kawako kee tataara pe kre tra kre nu. A pe shɔnlifɛɛnlɛ pre kro, na nyu nunu wru, mnaa chaa na fni Solomon bamba kre na.
13 Leele mblɛ pra kro kre nsra sro mbe chaa pe nu, la, pra pe shɔnli kpɔɔ.
14 A praa leele taa tataara mu wɛ fa na, bilɛ na chiɛlɛ na pan mu ya tataara.
15 Hali praa yambla tru na paan na teeri lete na, na pe plɛ sniŋge dɛŋglɛ, na sniyirɛ na, kena na Peter troi, mbe u ndiile to pe na. Mbe pe faŋga ta.
16 Kra tia chiɛ nyjɛ yira wa mbɛɛlɛ na wa kre krɛrɛ leele na pan mu fni Jerusalem na, mnaa paan na yambla, na mblɛ nu ŋumufuɛn nyi ni, a pra pe kro tra kro.
Nyiɛkpɔɔ Na Bitumblɔ Pre Wɔ Nyuŋgo
17 A srawɔfun lopom titi wre, na u wolo pre, na Sadducee leele mblɛ pra nyu ta nunu mu ya u na pre, na yila nyibinyiɛ na,
18 mna sɛ bitumblɔ pre yii mu sɛ le nyuŋgo, lawee ŋga nu praa lewaala leni kre.
19 Bawa Nyiɛkpɔɔ bituŋu na pan wa blee, mna nyuŋgo kre krɔɛ nyaala, mna pe wɔ mu yo pe pan mbo,
20 “E sɛ yire Suminyuŋgo wa, e ŋmaa kre kee yo leele pan.”
Pra Sɛ Nyina Suminyuŋgo Wa
21 Ŋga pra kee kre loo ma kre, ŋga nyiŋge na se bnimi, a pra le Suminyuŋgo wa, na leele nyina Nyiɛkpɔɔ kee kre.
Bawa srawɔfun lopom wre, na mblɛ pra ya u na pre na sɛ fni, mna loplombo kala lifɛɛnlɛ pre, na Israel loplombo pre kro yeeri, mna pan mu fni, mna leele tun na pe sɛ bitumblɔ pre wɔ nyuŋgo wa mbe pan.
22 Ŋga leele pre na sɛ, a pe nsra bitumblɔ pre nya nyuŋgo wa kre, a pra ndru mna pan mu yo loplombo pre pan mbo,
23 “O sɛ da na pe nyinyi yire krɔ yire tɔ kama, a yi shiefɛɛnlɛ pree wa mu yire yire yi nyu na, a ŋga o krɔɛ yire nyaala kre, na ndro n wa wa.”
24 Ŋga Suminyuŋgo kre shiefɛɛnlɛ lopom wre, na srawɔfun lopom titi wre na kee kre loo ma kre, pe jawala na kla kee kre na, a praa kawa na ki ni, na mni kie taa hin?
25 Bawa ndro na pan mna yo pe pan mbo, “E le, bilɛ mblɛ e na le nyuŋgo kre, pee wa mu yire Suminyuŋgo wa na leele nyina.”
26 Ŋga pra ki loo ma kre, shiefɛɛnlɛ lopom wre na sumifɛɛnlɛ pre na yiri, mna sɛ bitumblɔ pre yii mu pan, pe nsra ki pe na jaŋga ni, ŋgi na hin? Praa fiɛ na leele pre we pe waari na dnɛ ni.
27 A pra pan na bitumblɔ pre ni mna pan mu yire kala lifɛɛnlɛ pre lalaa. A srawɔfun lopom titi wre na pe wie mbo,
28 “O nsra e jaari na yaa shia mɛɛ ŋga nyini tɛɛ mbe leele nyina kee ka na kree? A e je na kee ŋga kpali Jerusalem na mna kro, na chaa mbe nyina na wre o u kumu kre pimi li.”
29 A Peter na bitumblɔ pre kro na kna mbo, “Kpra na, ki fna mbe o Nyiɛkpɔɔ wo loo mbe wɛ lewo na.
30 O tolɛɛlɛ Nyiɛkpɔɔ wre, na Yesu ŋmba e na kan kaan na wre nyi.
31 Wre Nyiɛkpɔɔ wru mu sɛ tɛɛ u kalie, mu u pe lopom, na ŋmaashɔfun, mbe ki yire kre na mbe Israel leele pe jawala chinɛ, mbe sisam tinkɛɛ ta.
32 A wre na Kpra Ŋumu ŋmba Nyiɛkpɔɔ u kee pefɛɛnlɛ kaan wre, wre lɛ kee kre dansiɛfɛɛnlɛ.”
Gamaliel Jawala Ŋgahaa
33 Ŋga pra kee ŋga loo ma kre, kra pe tɔɔra kpɔɔ, a pra sɛ bɔɔnri na pie bitumblɔ pre gbo.
34 Kre nyjila kre, na Pharisee ndro waa wa kala lifɛɛnlɛ pre nu wa, u mɛɛ naa Gamaliel, a wra pe mbra nyinafɛɛnlɛ pre wa, ŋmba leele pre kro na shɔnli. Wre wra yiri mna tia pra yili na bitumblɔ pre ni mbɛɛ na chiɛri.
35 A wra kna mu yo pe pan mbo, “O wolo Israel leele, e eyɛ le chichie kee ŋga e chaa mbe leele mblɛ pe ŋga na.
36 Kie pe nyjila chiɛri ka yi ŋga, blɔ wa na yiri, u mɛɛ naa Theudas, a wra yiri mna uyɛ pe mbo lekpɔɔ wi, a leele we pe na lafɛɛ jijirɛ, na taa u kro, a pra kɔ mu u gbo, a u kotɔmblɔ pre na nyina, a u kee kre na to.
37 Kre kɔkro kre, Judah ŋmba wra yiri Galilee na wre na yiri nyjila ŋga nu praa leele tɔɔnri kre nu, pan wre na leele ta tataara, a pra taa u kro na chɔɔ, a wre na kɔ mu taa ka na, a u kotɔmblɔ pre na nyina.
38 Kena fuŋgaami kee ŋga ni yuu e pan yi na, yaa leele mblɛ pe yaka, e pe ti mbe pe sɛ. Ŋgi na hin? Na kee nyjɛ pe yuu, ndee tnumu ŋga pe tuni ŋga, na lewo jaŋga ni pe ki pini kre, pie pra.
39 La, na Nyiɛkpɔɔ pan pe jaŋga kre ta, yaa jaa ki kla, mbe kia shia kɔɔ pan na Nyiɛkpɔɔ ni e tuni.”
Bitumblɔ Pre Wahaa
40 A pra u kee kre nɔɔloo, mna tia pra bitumblɔ pre yeeri mu pan, a pra pe frɔ fwɛ ni, mna pe jaari na pia shia Yesu mɛɛ tɛɛ mbe paara na. A pra chin mu pe wa a pra sɛ.