Sumifɛɛnlɛ Wɔhaa
6
Nyjila ŋga nu twanfɛɛnlɛ pre naa nɛɛi na yaa kre, kee ka na pan Greek leele, na Judae pre lalaa. Kee kre kro yi na, pe blenyini yirɛ nyjɛ praa yɔɔlɛ yire, praa pre Greek leele lekuchiɛlɛ pre kuun na waa.
2 A kɛmbɔshiin pre, na twanfɛɛnlɛ pre kro yeeri, a pra pan mu fni, a pra yo pe pan mbo, “Ki n fna mbe o Nyiɛkpɔɔ kee kre yoo ti, mbra sro yɔɔlɛ.
3 Kena e le eyɛ nu, e bilɛ kɔɔnashin mblɛ pe kala chin, a Kpra Ŋumu wree wa pe nu wɔ, mbe o kre tnumu ŋga wru mbe le pe kɛɛ.
4 La, wre we oyɛ wru mbe le nyiɛtalaa, na Nyiɛkpɔɔ kee nyinaa tnumu kre nu.”
5 Kee kre pra yo kre na twanfɛɛnlɛ pre yiɛ nyi, a pra Stephen ŋmba nu Kpra Ŋumu wre na nyi, a u shɔnlie na kpɔɔ wre wɔ, na Philip, na Procorus, na Nicanor, na Timon, na Parmenas, na Nicolas, ŋmba wra yiri Antioch na, mna uyɛ chaa Judae nu wre wɔ mu ya.
6 Pre leele mblɛ ni pra pan mu yire bitumblɔ pre yiɛ, a pra yiri mna kɛnyi taa taa pe na, mna nyiɛtali mu pe ŋga.
7 A Nyiɛkpɔɔ kee kre na nyina kuraa mu sɛ lee, a twanfɛɛnlɛ pre naa nɛɛi na yaa Jerusalem na wa, a Judae srawɔfɛɛnlɛ pre tataara na taa pe kee kre na.
Stephen Yiihaa
8 Bawa Stephen ŋmba wra dwamu, na jaŋga ta wre, na kawako, na kekpɔɛ pe waŋgra kre nu wa.
9 Bawa leele plɛ, pra pe Judae fninyuŋgo ŋga praa yeeri “O oyɛ ta” kre wolo, na pe wolo mblɛ pra yiri Cyrene, na Alexandria, na Cilicia, na Asia tra yire nu, na yiri na nyu kna na Stephen ni.
10 A pe nsra ja mbe Stephen nyu yii, kra yire u kachindɛ, na Kpra Ŋumu wre wraa wa u nu, a wraa paara kre ndra na.
11 A pra yiri wa mna sɛ nyu le na leele plɛ ni, a pra pan mna yo na, “O loo a Stephen jiɛnlɛ kee yo mu Moses, na Nyiɛkpɔɔ taan.”
12 Ki tia pra kanyaa le lenɛɛrɛ pre, na loplombo, na nyinafɛɛnlɛ pre nu, a pra pan mu Stephen tɔ, mna u yii mna sɛ loplombo yiɛ na.
13 A pra kafinɛ dansiɛfɛɛnlɛ ta, a pra sɛ dansiɛrɛ li mu u taan mbo, “Wre blɔ ŋmba, blenyini ŋga, pan u paara na o Suminyuŋgo cheche kre, na mbra yire taanla.
14 O loo a wraa yuu na, Yesu Nazareth wo wre we pan mbe lawee ŋga kla, mbe paala nyjɛ Moses na o nyina yire krɛrɛ tɔ, mbe pan fɔnyi ni.”
15 A leele mblɛ pra fni wa pre kro naa Stephen le komm, mna u nya na u yiɛ pe na Nyiɛkpɔɔ bituŋu yiɛ yi.