Yesu Nyiɛtali Mu U Twanfɛɛnlɛ Ŋga
17
Ŋga Yesu na yire kee nyjɛ yo mu kɔ kre, a wra yiɛ wa nyjeeri mna yo mbo,
“Ndoo, nyjila kre da. Mu Biblɔ ŋga yɛnyiŋge, mbe mu Biblɔ wre mu ŋga yɛnyiŋge.
2 Ŋgi na hin? Ŋu mu u ŋga jaŋga, a ki wɛ leele kro wo na, imi kie pe mbe u mblɛ mu u ŋga pre ŋga blenyini ŋmaa.
Jesus prays for his followers (John 17:1-26)
3 A blenyini ŋmaa kre taara yi na pie chin na ŋu chiin wi Nyiɛkpɔɔ kprafun wre, mbe pe Yesu Kristo ŋmba mu tun wre chin.
4 Ni mu yɛnyiŋge kre nyina tra, a tnumu ŋga mu le ni kɛɛ kre, ni ki tun mu kɔ.
5 Kena, Ndoo, ŋga ni yire mu yiɛ ŋga, ni ŋga yɛnyiŋge, yɛnyiŋge ŋga kraa wa ni pan, a waŋgra na chin mu pe kre.”
Yesu Nyiɛtali Mu U Twanfɛɛnlɛ Ŋga
6 Yesu na yo mbo, “Leele mblɛ mu wɔ waŋgra ŋga nu mu ni ŋga kre, ni tia pe mu chin. Mu wolo lɛ, a mu ni ŋga pe lɛ, a pe li mu kee kre na.
7 A fuŋga pe chin na yirɛ nyjɛ mu ni ŋga yire kro, ŋu pan yi yiri.
8 Ni pe ŋga mu kee ŋga mna ni ŋga kre, a pe ki shɔ. Pe chin na ŋu pan wa ni yiri mu pan yɛŋgɛ, mu shɔ mu li na ŋu mu ni tun.
9 Pre ni nyiɛtali na kaan. Ni n na tali mbe waŋgra kro ŋga. La, mblɛ mu ni ŋga kre, pre ni nyiɛtali na kaan. Ŋgi na hin? Mu wolo lɛ.
10 Nyjɛ ni ta kro, mu wee yi, a nyjɛ ŋu ta kro, mi wee yi, a pre lɛ ni yɛnyiŋge.
11 A fuŋga ni paan mu pan, ni n wa waŋgra nu na, la, pree wa waŋgra nu. Ndoo, ŋu mu pe Cheche. Mu mɛɛ ŋga mu ni ŋga kre jaŋga tɛɛ mu kɛ tɔ pe na, mbe ki ti pe pe nunu, imi na mi na ŋu pe nunu kre.
12 Ŋga mi na pre naa wa kre, ndaa pe tɛɛ mu jaŋga mɛɛ ŋga mna ni ŋga kre nu. Ndaa kɛ tɔ pe na, a wa nsra fun pe nu, fɔna ŋmba ki fna u fun wre bɔkɔ, imi kie pe, mbe Nyiɛkpɔɔ kee ŋga pe nyunɔ mu tɛɛ kre pe yɛŋgɛ.
13 A fuŋga ni paan mu pan, a ni yire kee nyjɛ yuu waŋgra nu, imi kie pe mbe ni yɛshɔɔrɔ kre tni pe nu poŋgo.
14 Ni mu kee kre yo pe pan, a waŋgra leele pe pra. Ŋgi na hin? Pe n pe waŋgra ŋga wolo, imi na mi titi n yiri waŋgra ŋga nu kre.
15 Ni n na yuu na mu pe wɔ mbe yili waŋgra nu, la, ni tali na mu kɛ tɔ pe na, mbe Sutna wre wa jaa pe pe yaka.
16 Pe n pe waŋgra ŋga wolo, imi na ni n pe waŋgra ŋga wo kre.
17 Yire mu kpra kolo kre na, mu pe wɔ mbe pe pe mu wolo.
18 Imi na mu ni tun waŋgra nu kre, pan ni pe tuni waŋgra nu na.
19 Pre ndra na, ni niyɛ wru mu mu ŋga, imi kie pe mbe pre titi peyɛ wru mbe mu ŋga kpra kolo na.
Yesu Na Nyiɛtali Mu Mbakɔ Shɔnlifɛɛnlɛ Ŋga
20 Pre chiin ma ni tali na kaan, la, mblɛ pie kɔɔ pe kee kre loo, mbe ni shɔ mbe li pre kro ni tali na kaan.
21 Ni tali na pe kro we pe nunu, imi na ŋu Ndoo wa mu tni ni nu, a mii wa mu tni mu nu na kre, mbe pe tni o nu ma na. Imi kie pe mbe waŋgra leele shɔ mbe li na ŋu mu ni tun yɛŋgɛ.
22 Ni pe ŋga yɛnyiŋge imi na mu ni ŋga kre, mbe pe pe nunu, imi mi na ŋu pe nunu kre.
23 Nii wa pe nu, a muu wa ni nu, imi kie pe mbe pe pe nunu titi, mbe waŋgra leele ja mbe chin na ŋu mu ni tun, a mu pe kori imi na mu ni kori kre.
24 Ndoo, ni chaa mbe mblɛ mu ni ŋga pre pan mbe mi na pre tni titɛɛ. Imi kie pe mbe pe ni yɛnyiŋge ŋga mu ni ŋga kre nya. Ŋgi na hin? Mu ni kori mu chin mu waŋgra gbeele.
25 Ni Lɛ Kprafun, waŋgra leele n mu chin, la, mi mu chin, a mblɛ mu ni ŋga pre chin na ŋu mu ni tun.
26 Ni tia pe mu chin, a mba mu nyinaa ti, kre kie ti koroo ŋga mu ni kori kre tni pe nu, mbe mi titi tni pe nu na.”