Prara Kre Dansiɛrɛ Kee
16
“Ni yire kee nyjɛ yo e pan, imi kie pe mbe yaa ndru kro.
2 Nyjila ka paan, mbe pe e wɔ mbe yili pe fninyinyi nu, hali ŋmba we na e kuu kre we na jawa na Nyiɛkpɔɔ tnumu u tuni.
3 Pie yire kee nyjɛ pe e na. Ŋgi na hin? Pe n ni Lɛ wre chin, mbaa yo mi pie chin.
4 La, ni yire kee nyjɛ yuu e pan, na yi nyjila waa da, mbe e sɔɔnri na ndaa yi yo. Ŋga nii wa e jaara kre ki tia ni n klu mu yire kee nyjɛ yo e pan.”
Kpra Ŋumu Wre Tnumu
5 “La, fuŋga ni shie ŋmba u ni tun wre pan, a nde, e wa n ja mu ni wie na, ‘Sena mu shie hin?’
More teaching about the Holy Spirit (John 16:5-33)
6 Fuŋga ni ki yo e pan, a fooro chin mu e yii.
7 La, kpra ni yuu e pan kre, ki nyu mu e ŋga na mbe ndruu sɛ. Ŋgi na hin? Na ni n sɛ, e Yafun wre wa pan. La, na ni sɛ kre, mbe u tun mbe u pan e pan.
8 Na waa pan, we ti waŋgra leele pe sisam nya, mbe kpra kre nya, mbe chin na Nyiɛkpɔɔ we kɔɔ pe kpra kun.
9 Pe sisaa pe, ŋgi na, pe n ni shɔnli.
10 A kpra kre haa kre, pe n chin na ki pe kpra na ni shie ni lɛ wre pan, mbe pia ni nya na.
11 A pimikuɔn na, pe n chin na pe waŋgra ŋga ŋunu wre gbun pimi ni.
12 Kenɛɛrɛɛ wa mbe ni yo e pan, la, yaa jaa yi nɔɔloo fuŋgaami.
13 La, na Kpra Ŋumu wre pan, we yiɛ klu mbe e nyina kpra kro. Wre titi jaŋga ni ma we na paara. Ŋga we loo kre we yo. A we e nyina kee nyjɛ yie pan.
14 We ni ŋga yɛnyiŋge. Ŋgi na hin? Kee ŋga ni chaa mbe yo, kre we wru mbe paan yo e pan.
15 Ni Lɛ yirɛ kro, ni wee yi, kre ki tia ni yo we ni kee wru mbe paan yo e pan kre.”
Foorolie Na Yɛshɔɔrɔ
16 “Ki kro chiɛri na yaa ni nya, a kia mu, ee ndruu ni nya.”
17 U twanfɛɛnlɛ pre plɛ naa peyɛ wie mbo, “Kee ŋgi u yuu o pan ŋga hin? Mbo, ‘ki kro nyjila chiɛri na yaa ni nya, a kia mu ee ndruu ni nya.’ Mu ndru mu yo mbo, ‘ŋga ni shie ni Lɛ pan kre ndra na.’”
18 A pra ndru mu peyɛ wie mbo, “Kena mni kre ‘nyjila chiɛri’ ŋga nyina hin? O n chin kee ŋga u yuu.”
19 Yesu na chin na pe chaa mbe u wie kee kre nɔɔ, kra tia wra kna mu yo pe pan mbo, “Ni yo na ki kro chiɛri mbe yaa ni nya, a kia mu ee ndru mbe ni nya. Kre e eyɛ wie ŋgaa?
20 Kpra na, ni yuu e pan, ee nyɛni mbe gblee le, la, kie pe waŋgra leele pan yɛshɔɔrɔ. Ee fooro li, a e fooro kre we kɔɔ kaari yɛshɔɔrɔ.
21 Na selɛɛ chlɔ yaa kre, u fooro lii, ŋga u kanyana nyjila da kre ndra na. La, na waa pɔ wre se mu kɔ to, mbe u u kanyana kre fɛɛ, mbe u yiɛshɔ na u pɔ se mu pan waŋgra nu.
22 Ki ka nu e nyi fuŋgaami kre. E fooro lii, la, mbe ndruu pan mbe e nya na, mbe e yɛshɔɔrɔ ta. Yɛshɔɔrɔ ŋga ndro wa jaa shɔ e kɛɛ.
23 Na ki ble kre waa da, yaa ni wie kee ka na. Kpra na, ni yuu e pan, na yira ŋga ee ni Lɛ wre tali ni mɛɛ nu kpan, we e ŋga ki yi.
24 E n yaka tali ni mɛɛ nu tun, hali mu pan mu su aŋga. E tali, ee ta, mbe ki ti e yɛshɔɔrɔ ta poŋgo.”
25 Yesu na ndru mu yo mbo, “Yomɛɛlɛ nu ni paara e pan. La, nyjila ka we pan, mbe mba paara e pan yomɛɛlɛ nu na, la, mbe paara chasi, imi kie pe mbe e ni Lɛ kee kre nɔɔloo.
26 Na kre ble kre pan, ee u tali ni mɛɛ nu, ni n yo mi mbe na u tali e pan.
27 Ŋgi na hin? Ni Lɛ wre titi e kori, ŋga e ni kori, mu shɔ mu li na wre Nyiɛkpɔɔ pan ni yiri kre na.
28 Ni Lɛ wre pan ni yiri mu pan. A ni ndru na yilii waŋgra ŋga nu mbe sɛ ni Lɛ wre pan.”
29 A u twanfɛɛnlɛ pre na kna mbo, “Fuŋga rɛ, mu paara chasi. Mu n na paara yomɛɛlɛ nu na.
30 Fuŋga o nya na mu kala kro chin. Ndro n fna mbe mu wie kee ka na. Ki tia o shɔ mu li na mu yiri Nyiɛkpɔɔ pan yɛŋgɛ.”
31 A Yesu na kna mbo, “Fuŋga e shɔ mu lii?
32 Nyjila ka paan, a ki da, na e kro we nyina mbe sɛ e kalonyi nu, mbe mi nunu ti. La, ŋga mi na ni Lɛ wre oo wa nyjila kro nu kre ndra na, kia kro mi nunu fio.
33 Kre na ni kee nyjɛ yuu e pan, mbe e yire ni na mbe wejinyiŋge ta. Waŋgra leele we ti e kala nya, la, e ti mbe e yiɛ shɔ, na waŋgra ŋga jaŋgaa wa ni kɛɛ.”