Yet ischejnito Komam Jesús ebꞌyaꞌ iskuywom yalnokꞌo Istzotiꞌ
9
Yet hunel,
yawte Komam Jesús ebꞌyaꞌ 12 (kabꞌlahonhwanh) iskuywom iskꞌatanh.
Yaqꞌnikano Komam ishelanil yebꞌ yip ebꞌyaꞌ yinilo sunil ischejabꞌ naj matzwalil yinh anma,
yebꞌpaxo xin yaqꞌni kawxo ebꞌyaꞌ anma yinh tzettaj yabꞌil ayko yinh.
2 Ischejlaxto ebꞌyaꞌ yu Komam yu ispujbꞌanikꞌo ebꞌyaꞌ yinh tzet chu yok anma yul isqꞌabꞌ Komam Dios,
kat yaqꞌnipaxkano kawxo ebꞌyaꞌ anma yaꞌay.
3 Yalni Komam tet ebꞌyaꞌ:
—Matzet cheyito yinh hebꞌel;
mach cheyiqꞌ heqꞌojoch,
mach cheyiqꞌ hetzꞌispa,
mach cheyiqꞌpaxo heyoch yebꞌ hemelyu,
mach cheyipaxto hehelbꞌal.
4 Haꞌ teꞌ nha bꞌay chexapni wayoj,
hanhe bꞌey tuꞌ xin chexkankanoj,
mach chehel bꞌay chexwayi masanto yet chexto hunuxa konhobꞌ.
5 Yaj ta ay hunu konhobꞌ bꞌay mach chexchahlaxi,
chexel yul huneꞌ konhobꞌ tuꞌ kat hetziknikanilo pojoj yinh heyoj,
hak tuꞌ xin chu heyeniloj ta matxa heyok yinh anma tuꞌ,
ta txꞌoj chꞌeliko yul sat Komam Dios,
xhi Komam Jesús tet ebꞌyaꞌ ischejabꞌ tuꞌ.
6 Lahwi tuꞌ xin isto ebꞌyaꞌ sunil yulajla konhobꞌ yebꞌ yulajla aldea.
Yekꞌ ebꞌyaꞌ ispujbꞌanikꞌo Tzotiꞌ yet kolbꞌanile tet anma.
Yaqꞌnipaxo kawxo ebꞌyaꞌ makta yaꞌay.
Kꞌayilo iskꞌul naj Herodes yabꞌen isqꞌumal Komam Jesús
7 Naj Herodes,
naj yahaw yeko yinh ismajul Galilea,
yabꞌe naj isqꞌumal sunil tzettaj ye tuꞌ iswatxꞌe Komam Jesús,
issomchakanh yul iswiꞌ naj yuto ay anma chalni hakaꞌ tiꞌ:
«Haꞌ huneꞌ naj chiwatxꞌen hunteqꞌan tuꞌ,
haꞌ ton yaꞌ Juan,
anikanh haꞌ iswiꞌ anma,
hulkanh iskꞌul xol kamom,»
xhi anma.
8 Aypaxo anma chihalni:
«Haꞌ yaꞌ Elías chihul isyebꞌ isbꞌa hunelxa,»
xhi anma.
Ay xin anma chalnipaxoj:
—Etza haꞌ hunu ebꞌyaꞌ ischejabꞌ Komam Dios ekꞌlena yet payat,
haꞌ hulkanh iskꞌul xol kamom,
xhi anma.
9 Yalni naj Herodes tuꞌ:
—Yaj hanintiꞌan,
walan yuxin tzokꞌlaxilto iswiꞌ naj Juan tuꞌ.
¿Mak xin anmahil huneꞌ naj chal ebꞌnaj isqꞌumal tuꞌ?
xhi naj.
Wal xin kaw yoche naj Herodes tuꞌ yilaꞌ Komam Jesús.
Yet yaqꞌni waꞌo Komam Jesús howebꞌ mil ebꞌnaj winaj
10 Lahwi ismeltzo ebꞌyaꞌ ischejabꞌ Komam Jesús,
yok ebꞌyaꞌ yalno tet Komam yinh ej tzet ye tuꞌ iswatxꞌe ebꞌyaꞌ.
Lahwi tuꞌ isto Komam iskawilal konhobꞌ Betsaida,
hanhkꞌanhe xin ebꞌyaꞌ iskuywom Komam tuꞌ yito yintaj.
11 Hayet yabꞌen anma ta to Komam bꞌey tuꞌ,
istopaxo anma iskꞌatanh Komam.
Kaw kꞌul yu ischahlax anma yu Komam,
yok Komam iskuyno anma yinh tzet chu yok anma yul isqꞌabꞌ Komam Dios.
Yaqꞌnipaxo kawxo Komam makta yaꞌay.
12 Hayet lanhanxa isto tzꞌayik xin,
ishitziko ebꞌyaꞌ 12 (kabꞌlahonhwanh) iskꞌatanh Komam,
yalni ebꞌyaꞌ xin:
—Chejto anma tiꞌ issayaꞌ tzet chislo yebꞌ xin bꞌay chiwayi,
tojabꞌ yulaj aldea yebꞌ xin xolaj wayanhbꞌal yuto machi teꞌ nha iskawilal bꞌay ayonh tiꞌ,
xhi ebꞌyaꞌ.
13 Yalni Komam tet ebꞌyaꞌ:
—Aqꞌwe waꞌo anma hex tiꞌ,
xhi Komam.
Yalnipaxo ebꞌyaꞌ xin:
—Yaj hanhechꞌan howebꞌ pan yebꞌ kakꞌonh noꞌ kay koxol tiꞌ.
¿Tom xin chonhtohanh koloqꞌoꞌanh tzet chislo sunil anma tiꞌ?
xhi ebꞌyaꞌ tet Komam.
14 Wal xin aymi howebꞌo mil isbꞌisil ebꞌnaj winaj ayikꞌo bꞌey tuꞌ,
yalni xin Komam Jesús tet ebꞌyaꞌ ischejabꞌ:
—Halwe tet anma ayojabꞌ tzꞌonhno yinh hunta bꞌulan,
50 (lahonhebꞌ yoxkꞌal) isbꞌisil yinh hunun bꞌulan,
xhi Komam tet ebꞌyaꞌ.
15 Hak tuꞌ xin yute ebꞌyaꞌ ischejabꞌ Komam tuꞌ,
yal ebꞌyaꞌ tet sunil anma ta chiꞌay tzꞌonhnoj.
16 Lahwi tuꞌ xin,
yinikanh Komam ixim howebꞌ pan yebꞌ noꞌ kakꞌonh kay,
istꞌanhxikanh Komam satkanh,
yaqꞌni Komam yuchꞌandiosal tet Komam Dios.
Isqꞌaxponayo Komam ixim,
yaqꞌni Komam ixim yebꞌ noꞌ kay tet ebꞌyaꞌ ischejabꞌ tuꞌ.
Yok ebꞌyaꞌ yitxqꞌanto ixim yebꞌ noꞌ kay tuꞌ yinh anma.
17 Sunil anma waꞌi hantatikꞌa yoche iskꞌul.
Lahwi tuꞌ xin yok ebꞌyaꞌ ischejabꞌ Komam tuꞌ iskutxbꞌanokanh ixim matxa lahwi yu anma,
kaw xin 12 (kabꞌlahonhebꞌto) motx ixim matxa lahwi yu anma tuꞌ.
Jesús Alimenta a 5,000
Yal yaꞌ Pedro ta Komam Jesús haꞌ ton Komam Cristo
18 Yet hunel xin ishekꞌilo isbꞌa Komam Jesús yu istxahli,
yet ischukil Komam yebꞌ ebꞌyaꞌ iskuywom tuꞌ xin,
isqꞌambꞌen Komam tet ebꞌyaꞌ:
—¿Mak anmahil hinan yalni anma?
xhi Komam tet ebꞌyaꞌ.
19 Istaqꞌwi ebꞌyaꞌ tet Komam:
—Ay mak chalni ta hach tiꞌ haꞌ ton yaꞌ Juan,
Anikanh haꞌ iswiꞌ Anma,
aypaxo mak chalni tato Elías hach.
Aypaxo mak xin chalni tato kꞌuxanta hach tiꞌ ischejabꞌ Komam Dios ekꞌlena yet payat tiempo xahulkanh iskꞌul xol kamom,
xhi ebꞌyaꞌ tet Komam.
20 Lahwi tuꞌ xin,
isqꞌambꞌen Komam tet ebꞌyaꞌ:
—Haxaka hex tiꞌ,
¿mak anmahil hinan heyalni?
xhi Komam.
Istaqꞌwi yaꞌ Pedro:
—Hach tiꞌ,
Cristo hach,
aqꞌbꞌil hamunil yu Komam Dios,
xhi yaꞌ.
21 Yaj kaw kam yalkano Komam Jesús tet ebꞌyaꞌ ta machi hunu mak bꞌay chal-lax huneꞌ tzet yal yaꞌ Pedro tuꞌ.
Tzotel Komam Jesús yinh iskamikal
22 Yalnipaxo Komam Jesús tet ebꞌyaꞌ iskuywom:
—Hanin Aqꞌbꞌilintijan texol yu Komam Dios,
kaw yilal chiwilaꞌan isyaꞌtajil,
kat kinyintanhenkaniltojan ebꞌnaj ichamta winaj ijbꞌalom yul konhobꞌ,
yebꞌ xin yu ebꞌnaj yahawil yinh ebꞌnaj sacerdote,
yebꞌpaxo xin ebꞌnaj kuywawom yinh isley yaꞌ Moisés.
Haꞌ ebꞌnaj tuꞌ xin,
chinaqꞌni kamojan,
yajaꞌ yinh yet yoxebꞌ tzꞌayik,
kat witzitzbꞌikanhan,
xhi Komam tet ebꞌyaꞌ.
Pedro Declara a Jesús como Cristo
23 Lahwi tuꞌ xin,
yalni Komam tet sunil anma:
—Ta ay hunu mak chiyoche chiꞌoktzujno wintajan,
kaw yilal ta matxa yeto isbꞌa ischukil.
Hinanojabꞌ yabꞌen isyaꞌtajil yinh sunilbꞌal tiempo,
waxanhka chiꞌalaxiko yinh kamikal.
Ta hinan hakaꞌ tuꞌ,
ekꞌojabꞌ tzujtzun kuywo wintajan.
24 Yuto haꞌ mak mach hinano iskam wintajan yul sat yibꞌanhqꞌinal tiꞌ,
chiskꞌayto isqꞌinal mach istanhbꞌal.
Wal mak hinan iskam wintajan xin chischah isqꞌinal mach istanhbꞌal.
25 Qꞌinalo ta ay mak chiqꞌoji ismajnikꞌo sunil tzet ay yul sat yibꞌanhqꞌinal tiꞌ,
yajaꞌ ta chitokano yanma huneꞌ mak tuꞌ yinh isyaꞌtajil yinh hunelnhe,
¿aymi iskꞌulal chischabꞌ huneꞌ mak tuꞌ?
¡Machoj!
26 Ta ay mak chitxꞌixwi kinischahnihan yul yanma yebꞌ yinh tzet chiwalan,
Hanin Aqꞌbꞌilintijan texol yu Komam Dios,
chintxꞌixwipaxojan yinh anma tuꞌ yet chinhulan Yahawoj yebꞌ isqꞌaqꞌal wipan,
yebꞌ isqꞌaqꞌal yip Inmaman,
yebꞌ xin yip ebꞌnaj yángel Komam Dios.
27 Kaw chiwalkanojan yinh isyelal teyet,
ay haywanh mak texol hex tiꞌ maxhto chikami,
haꞌ chiꞌilni yokkano Komam Dios Yahawiloj,
xhi Komam Jesús.
Ishel isbꞌa yil-lax yinh Komam Jesús
28 Waxajebꞌxa tzꞌayik yalni Komam Jesús hunteqꞌan tuꞌ xin,
yijbꞌanahto Komam yaꞌ Pedro yebꞌ yaꞌ Jacobo yebꞌ yaꞌ Juan iswiꞌ huneꞌ witz yu istxahli tet Komam Dios.
29 Hayet lanhan istxahli Komam tuꞌ,
ishelni isbꞌa yil-lax sat Komam,
wal xil isqꞌap Komam xin,
kaw sajhoponhe elikoj,
toxanhe chitzejtzoni.
30 Yinh haꞌmataj isyekanh isbꞌa yaꞌ Moisés yebꞌ yaꞌ Elías,
yok ebꞌyaꞌ tzotelo yebꞌ Komam.
31 Hoyaniko isqꞌaqꞌal yip Komam Dios yinh ebꞌyaꞌ yet chitzotel ebꞌyaꞌ yebꞌ Komam yinh tzet chiyu yijni isbꞌa iskamikal Komam bꞌey Jerusalén.
32 Wal yaꞌ Pedro yebꞌ ebꞌyaꞌ kawanhxa yetbꞌi,
kaw tit iswayanh ebꞌyaꞌ,
yaj yilo ebꞌyaꞌ iswayanh,
yilni ebꞌyaꞌ isqꞌaqꞌal yip Komam yebꞌ kawanh ebꞌyaꞌ ayiko iskꞌatanh Komam tuꞌ.
33 Hayet lanhanxa ishekꞌnilo isbꞌa kawanh ebꞌyaꞌ iskꞌatanh Komam tuꞌ,
yalni yaꞌ Pedro tet Komam:
—Mam kuywawom,
kaw saqꞌal ta wal je bꞌey tiꞌ.
Etza kꞌul ta chikowatxꞌekanhanh oxebꞌo pat.
Hunu hawet,
hunu yet yaꞌ Moisés,
yebꞌ xin hunu yet yaꞌ Elías,
xhi yaꞌ tet Komam.
Yal yaꞌ huneꞌ tuꞌ yuto mach chitxumcha yu yaꞌ tzet chala.
34 Lanhantotikꞌa yalni yaꞌ Pedro huneꞌ tuꞌ,
yul huneꞌ moyan yenhelo ebꞌyaꞌ.
Kaw xiwkanh ebꞌyaꞌ iskuywom Komam tuꞌ yet yok hoyno huneꞌ moyan yinh ebꞌyaꞌ.
35 Haꞌ xol huneꞌ moyan tuꞌ yabꞌe ebꞌyaꞌ hunteqꞌan tzotiꞌ hakaꞌ tiꞌ:
«Haꞌ naj tiꞌ Inkꞌaholan sikꞌbꞌililo wuhan,
abꞌewe tzet chal naj,»
xhi.
36 Lahwi yal-lax huneꞌ tzotiꞌ tuꞌ,
yilni ebꞌyaꞌ ta ischukilxanhe Komam Jesús aykꞌoj.
Yinh huneꞌ tiempohal tuꞌ,
machi mak tet yalilo ebꞌyaꞌ yinh huneꞌ tzet yil tuꞌ.
La Transfiguración
Yilo Komam Jesús ischejabꞌ naj matzwalil yinh huneꞌ naj nichꞌan tzeh
37 Hayet huneꞌxa tzꞌayikal yet ispaxayti ebꞌyaꞌ bꞌey yinh iswiꞌ huneꞌ witz tuꞌ,
kaw tzetkꞌa anma apni chahno Komam Jesús.
38 Haꞌ xol anma tuꞌ xin,
elkanh yaw huneꞌ naj yinh kaw ip,
yalni naj tet Komam:
—Mamin,
chinqꞌanan tawet,
chawil nino tzet ye huneꞌ nichꞌan inkꞌaholtiꞌan,
kaw hunpilanchꞌan naj.
39 Yuto ay huneꞌ ischejabꞌ naj matzwalil chꞌetan naj.
Kaw chiꞌel yaw naj yet chꞌok naj matzwalil yetano naj.
Kaw chitzikobꞌtanhelax naj,
kat istit hujuy yul istiꞌ naj.
Kaw chichakꞌobꞌtanhelax isnimanil naj,
kat ispaxlona naj xin,
kaw lanhoxanhe chisbꞌejtzokano naj matzwalil tuꞌ naj.
40 Mawaqꞌle walnihan tet ebꞌyaꞌ hakuywom tiꞌ ta chiyilo ebꞌyaꞌ ischejabꞌ naj matzwalil yinh naj,
yajaꞌ machi yu ebꞌyaꞌ,
xhi naj tet Komam.
41 Yalni Komam Jesús:
—Hata hex tiꞌ chijala,
kaw mach cheyako heyanma yinh Komam Dios.
Kaw txꞌoj hexkanoj.
¡Kaw nimanxa tiempo yichi wekꞌan yebꞌ hex!
¿Bꞌaqꞌinhkꞌanabꞌ chexkuychahi?
Kaw chiwabꞌehan isyaꞌil yul wanmahan,
xhi Komam.
Yalni Komam tet naj ay iskꞌahol tuꞌ:
—Iti naj hakꞌahol tuꞌ,
xhi Komam tet naj.
42 Yaj hayet ishitziko naj nichꞌan tuꞌ iskꞌatanh Komam,
isqꞌojlaxayo naj sat txꞌotxꞌ yu ischejabꞌ naj matzwalil ayko yinh naj.
Yichiko islow huneꞌ yaxkamik yinh naj,
yajaꞌ haxa Komam Jesús,
kachwa yinh ischejabꞌ naj matzwalil tuꞌ,
iskawxikanh naj nichꞌan tuꞌ yu Komam.
Yalaxkaniko naj yul isqꞌabꞌ ismam yu Komam.
43 Sunil anma tuꞌ kꞌayilo iskꞌul yilni tato kaw niman yelapno yip Komam Dios.
Jesús sana a un muchacho del espíritu del mal
Yal Komam Jesús iskamikal yinh iskayel
Hayet kꞌayna iskꞌul anma yilni yinh tzet iswatxꞌe Komam Jesús,
yalni Komam tet ebꞌyaꞌ iskuywom:
44 —Kaw cheyabꞌekano yinh tzet chiwalkanojan teyet,
tajka chikꞌayto heyu,
yuto Hanin Aqꞌbꞌilintijan texol yu Komam Dios,
chinalaxikojan yul isqꞌabꞌ anma,
xhi Komam tet ebꞌyaꞌ.
45 Yajaꞌ machi nachalo yu ebꞌyaꞌ yinh tzet yal Komam yuto machi aqꞌlax istxumuꞌ ebꞌyaꞌ,
xiwpaxo ebꞌyaꞌ isqꞌambꞌenilo tet Komam yinh tzet chal yelapnoj.
Yal Komam Jesús yinh mak ekꞌbꞌal yelapno yehi
46 Lahwi tuꞌ xin,
yok ebꞌyaꞌ iskuywom Komam tzotelo yinh mak kaw niman yelapno ye xol ebꞌyaꞌ.
47 Yajaꞌ xin yohta Komam Jesús tzet chiꞌekꞌ yinh isnabꞌal ebꞌyaꞌ,
yuxin isxekti Komam huneꞌ nichꞌan unin iskꞌatanh.
48 Yalni Komam tet ebꞌyaꞌ:
—Haꞌ mak chichahni hunu nichꞌan unin yuto wetan yehi,
Haninan chinischahan.
Hak tuꞌ xin mak chinchahnihan,
chischahpaxo Mak Anheintijan.
Haꞌ mak chiyo isbꞌa texol,
haꞌ ekꞌbꞌal yelapno ye yul insatan,
xhi Komam.
Haꞌ mak mach ayoko ishowal jinh jetbꞌi kobꞌa yebꞌi
49 Yalni yaꞌ Juan tet Komam Jesús:
—Mam kuywawom,
jilanh yinilo huneꞌ naj ischejabꞌ naj matzwalil yinh anma,
habꞌi yawte naj yinh,
yajaꞌ kokachanh naj yuto mach jetbꞌiho naj,
xhi yaꞌ Juan tuꞌ.
50 Istaqꞌwi Komam:
—Mach chekach naj,
yuto haꞌ mak mach ayoko ishowal jinh jetbꞌi kobꞌa yebꞌi,
xhi Komam.
Kachlax yaꞌ Jacobo yebꞌ yaꞌ Juan yu Komam
51 Hayet lanhanxa yapni istiempohal ispaxto Komam Jesús satkanh iskꞌatanh Komam Dios,
yaniko Komam yinh iskꞌul isto bꞌey konhobꞌ Jerusalén.
52 Yulxa bꞌeh ayko Komam xin,
yanito Komam ischejabꞌ yul huneꞌ aldea yul ismajul Samaria isqꞌanno bꞌay chiway Komam.
53 Yajaꞌ machi chahlax ebꞌyaꞌ yu anma ay bꞌey Samaria tuꞌ,
yuto yohta anma tato bꞌey Jerusalén chito Komam.
54 Hayet yilni yaꞌ Jacobo yebꞌ yaꞌ Juan huneꞌ tuꞌ,
yalni ebꞌyaꞌ tet Komam:
—Mam Kuywawom,
¿chimisje hakꞌul chikoqꞌanayti qꞌa qꞌaꞌ satkanh,
kat istanhtzelaxilo hunteqꞌan anma tiꞌ hakaꞌ iswatxꞌe yaꞌ Elías yet payat?
xhi ebꞌyaꞌ tet Komam.
55 Yajaꞌ tꞌanhxiko Komam yinh ebꞌyaꞌ,
iskachlax ebꞌyaꞌ yu Komam.
56 Lahwi tuꞌ xin,
isto Komam yebꞌ ebꞌyaꞌ bꞌey yul huneꞌxa aldea.
Hunteqꞌan mak yoche oko tzujno yinta Komam Jesús
57 Hayet lanhan isbꞌelwito ebꞌyaꞌ yul bꞌeh,
ay huneꞌ naj halni tet Komam Jesús:
—Mamin,
bꞌajxanhetuꞌwal chaxhtohi,
chinok tzujnojan tawintaj,
xhi naj.
58 Yalni Komam tet naj hakaꞌ tiꞌ:
—Noꞌ wech,
ay isnhachꞌen noꞌ bꞌay chiwayi,
yebꞌ xin noꞌ chꞌik,
ay yatut noꞌ,
yajaꞌ wal Hanin Aqꞌbꞌilintijan texol yu Komam Dios,
kaw machi watutan bꞌay chinxewninojan,
xhi Komam tet naj.
59 Lahwi tuꞌ xin,
yalni Komam tet hunxa naj:
—Ekꞌanh tzujtzun wintajan kat hakuywi,
xhi Komam tet naj.
Istaqꞌwi naj tet Komam:
—Mamin,
estam chawaqꞌ inhamanilan,
chito inmujkanto inmaman bꞌabꞌelal,
xhi naj tet Komam.
60 Yalni Komam tet naj xin:
—Haꞌ mak kamom yul sat Komam Dios haꞌ chimujni yet kamomal tuꞌ,
wal hach hach tiꞌ as halikꞌo yinh tzet chu yok anma yalanh ischejbꞌanil Komam Dios,
xhi Komam tet naj.
61 Lahwi tuꞌ xin,
yalni hunxa naj tet Komam:
—Mamin,
chinok tzujnojan tawintaj,
yaj chiwochehan ta chawaqꞌ inhamanilan chintohan taqꞌlokano tet mak ay bꞌey watutan bꞌabꞌel,
lahwi tuꞌ xin kat wok tzujnojan tawintaj,
xhi naj tet Komam.
62 Yalni Komam tet naj:
—Qꞌinalo ta ay hunun mak chimunla yebꞌ noꞌ wakax,
kat yok tzabꞌno yinh te teꞌ nhikꞌbꞌil yu noꞌ bꞌay ayko chꞌen tꞌokom txꞌotxꞌ,
tzujan tuꞌ kat istopaxo tꞌanhno naj yintaj.
Ta ay mak hak tuꞌ,
mach chu yok munil yinh yet Komam Dios,
xhi Komam tet naj.