Isqꞌan ebꞌnaj fariseo yebꞌ ebꞌnaj saduceo kꞌaybꞌalkꞌule yilaꞌ
16
Ay hunteqꞌan ebꞌnaj fariseo yebꞌ ebꞌnaj saduceo apni ilno Komam Jesús yunhe yilwen ebꞌnaj Komam.
Yalni ebꞌnaj tet Komam ta chisye hunu kꞌaybꞌalkꞌule chiyeniloj tato kaw yeli haꞌ Komam Dios chejnheti Komam Jesús.
2 Istaqꞌwi Komam tet ebꞌnaj:
«Yinh qꞌejbꞌiyalil yet cheyilni istzꞌay moyan,
cheyal hakaꞌ tiꞌ:
“Wal tinanh yeloxa hajan,
yuto lanhan istzꞌay moyan,”
kexchi.
3 Taka yet sakꞌayal xin cheyal hakaꞌ tiꞌ:
“Wal tinanh yokxa haꞌ nhabꞌ yuto kaw qꞌej moyan,”
kexchi.
Hex tiꞌ kaw helan hex hetxumni yinh tzet chute isbꞌa tiempo,
ta chaqꞌ haꞌ nhabꞌ maka machoj.
Yajaꞌ wal yinh huneꞌ tiempo bꞌay ay hex tiꞌ,
mach chitxumchalo heyu.
4 Anma yinh huneꞌ tiempohal tiꞌ,
kaw txꞌojkanoj yebꞌ kaw mach yijemoj.
Chisqꞌan kꞌaybꞌalkꞌule yilaꞌ,
yajaꞌ huneꞌnhechꞌan kꞌaybꞌalkꞌule chiꞌaqꞌlax yilaꞌ,
hakaꞌ huneꞌ isye Komam Dios yinh yaꞌ Jonás,»
xhi Komam Jesús.
Lahwi tuꞌ yel Komam iskꞌatanh ebꞌnaj,
isto Komam.
Tzotel Komam Jesús yibꞌanhilo iskuybꞌanil ebꞌnaj fariseo
5 Yet yekꞌapno Komam Jesús yebꞌ ebꞌyaꞌ iskuywom isqꞌaxebꞌikꞌto haꞌ lago isnahniti ebꞌyaꞌ tato mach yito tzet chislo.
6 Yalni Komam tet ebꞌyaꞌ:
—Cheyil hebꞌa tet yanhal ispan ebꞌnaj fariseo yebꞌ ebꞌnaj saduceo,
xhi Komam.
7 Yet yabꞌen ebꞌyaꞌ huneꞌ tuꞌ,
yichiko ebꞌyaꞌ yalni tet hunun:
—Chal Komam huneꞌ tiꞌ yumi machi majiti tzet chikolo,
xhi ebꞌyaꞌ.
8 Yet yabꞌenilo Komam huneꞌ tuꞌ,
yalni Komam tet ebꞌyaꞌ:
—¿Tzet yinh xin cheyala ta machi hepan iqꞌbꞌil heyu?
Kaw mach chikawxi hekꞌul yinh Komam Dios.
9 ¿Tom mach chinachalo heyu?
yebꞌ ¿tom matxa chitit yul hekꞌul yinh ixim howebꞌ pan yabꞌe yinh howebꞌ mil ebꞌnaj winaj?
Tijabꞌ yinh henabꞌal hayebꞌ motx ixim matxa lahwi yu anma.
10 Yebꞌ xin,
¿tom matxa chenati yinh ixim hujebꞌ pan yabꞌe yinh ebꞌnaj kanhebꞌ mil?
Yebꞌ xin,
¿tom matxa chenapaxtij hayebꞌ motx ixim matxa lahwi yu anma tuꞌ?
11 ¿Tzet yinh xin machi matxumchalo heyu tato maxhtaj yinh ixim pan mantzotelan yet mawalnihan teyet ta cheyil hebꞌa tet yanhal ispan ebꞌnaj fariseo yebꞌ ebꞌnaj saduceo?
xhi Komam.
12 Lahwi tuꞌ istxumnilo ebꞌnaj tato maxhtaj yinh yanhal ixim pan tzotel Komam,
to yinh kuybꞌanile chaqꞌ ebꞌnaj fariseo yebꞌ ebꞌnaj saduceo.
Yal yaꞌ Pedro tato Komam Jesús haꞌ ton Komam Cristo
13 Yet yapni Komam Jesús yebꞌ ebꞌyaꞌ iskuywom bꞌey Cesarea yul ismajul Filipos,
isqꞌambꞌen Komam tet ebꞌyaꞌ hakaꞌ tiꞌ:
—Hanin Aqꞌbꞌilintijan texol yu Komam Dios,
¿mak anmahil hinan yalni anma?
xhi Komam.
14 Istaqꞌwi ebꞌyaꞌ:
—Ay mak chalni ta hach tiꞌ yaꞌ Juan,
anikanh haꞌ iswiꞌ anma,
aypaxo mak chalni tato Elías hach,
aypaxo mak chalni tato hach tiꞌ yaꞌ Jeremías,
makato hunuxa ischejabꞌ Komam Dios ekꞌlena yet payat,
xhi ebꞌyaꞌ.
15 Isqꞌambꞌenpaxo Komam tet ebꞌyaꞌ:
—Haxaka hex tiꞌ,
¿mak anmahil hinan heyalni?
xhi Komam.
16 Istaqꞌwi yaꞌ Simón Pedro:
—Hach tiꞌ,
Cristo hach,
Iskꞌahol Komam Dios itzitz,
xhi yaꞌ.
17 Yalni Komam tet yaꞌ:
—Simón,
iskꞌahol yaꞌ Jonás,
kaw saqꞌal hawet yuto huneꞌ maxawal tiꞌ mach anmaho chiyenilo tawet.
Wal xin to haꞌ Inmaman ay yul satkanh,
haꞌ chiꞌaqꞌni hatxumuꞌ.
18 Hakinpax tuꞌan chiwalan tato Pedro chijkano habꞌi.a
Yibꞌanh huneꞌ chꞌen niman chꞌen tiꞌb chiwakanhan wiglesiahan,c
machi xin chiqꞌoji kamikal istanhtzeniloj.
19 Chiwakanikojan lawe tawet yunhe chu yok anma yul isqꞌabꞌ Komam Dios.
Sunil tzet chakꞌalbꞌa yul sat yibꞌanhqꞌinal tiꞌ chikꞌalbꞌalaxpaxo yul satkanh,
yebꞌpaxo tzet chapuhilo yul sat yibꞌanhqꞌinal tiꞌ,
chipulaxpaxo yul satkanh,
xhi Komam.
20 Lahwi tuꞌ,
yalnikano Komam tet ebꞌyaꞌ iskuywom tato machi bꞌay chalikꞌo ebꞌyaꞌ tato haꞌ Komam Jesús haꞌ ton Cristo.
Yal Komam Jesús yinh tzet chu yaqꞌlax kamoj
21 Haꞌ yinh huneꞌ tiempohal tuꞌ ichiko Komam yalni tet ebꞌyaꞌ iskuywom tato yilal yul isyaꞌtajil yibꞌanh,
yalni Komam hakaꞌ tiꞌ:
—Kaw yilal intohan bꞌey Jerusalén,
kat xin yekꞌyaꞌ wanmahan yu ebꞌnaj ichamta winaj iswiꞌehal konhobꞌ Israel,
yebꞌ yu ebꞌnaj iswiꞌehal sacerdote yebꞌ ebꞌnaj kuywawom yinh isley yaꞌ Moisés.
Chinispotxꞌan ebꞌnaj,
yajaꞌ yinh yox tzꞌayik kat witzitzbꞌikanhan hunelxa,
xhi Komam.
22 Hayet yabꞌen yaꞌ Pedro huneꞌ tuꞌ,
yawtenilo yaꞌ Komam Jesús,
iskachwa yaꞌ yinh Komam hakaꞌ tiꞌ:
—Mamin,
¡haꞌojabꞌ Komam Dios chaxhkolni yinh huneꞌ isyaꞌtajil tuꞌ!
Machojabꞌ chaxhyako yul isqꞌabꞌ,
xhi yaꞌ.
23 Istꞌanhxiko Komam yinh yaꞌ,
yalni Komam:
—Hach matzwalil,
elanh yinh insatan yuto chaxhok kinhawaqꞌaꞌ aykꞌayojan,
wal xin maxhtaj haꞌ tzet nabꞌil yu Komam Dios chiꞌekꞌ yinh hanabꞌal,
wal xin to hakaꞌ tzet chisnah anma,
haꞌ chiꞌekꞌ yinh hanabꞌal,
xhi Komam.
24 Lahwi tuꞌ yalni Komam tet ebꞌyaꞌ iskuywom:
—Tato ay hunu mak choche chiꞌok inkuywomojan,
kaw matxahojabꞌ yeto isbꞌa ischukil,
yebꞌ xin kaw hinanojabꞌ yabꞌen isyaꞌtajil winhan.
Ta hinan yetan yanma hakaꞌ tuꞌ ekꞌojabꞌ tzujtzun wintajan.
25 Yuto haꞌ mak mach hinan iskam winhan yul sat yibꞌanhqꞌinal tiꞌ,
chiskꞌayto isqꞌinal mach istanhbꞌal.
Wal mak chishin isbꞌa iskam winhan xin chischah isqꞌinal yinh hunelnhe.
26 Qꞌinalo ta ay hunu mak chiqꞌoji ismajnilo sunil tzet ay yul sat yibꞌanhqꞌinal tiꞌ,
yaj ta chiskꞌayto isqꞌinal mach istanhbꞌal,
¿tzettaxka chischah huneꞌ mak tuꞌ selelo isqꞌinal chiskꞌayto tuꞌ?
27 Hanin Aqꞌbꞌilintijan texol yu Komam Dios chinhulan yebꞌ isqꞌaqꞌal yip Inmaman yebꞌ ebꞌnaj ángel,
kat waqꞌnihan ispaj selel tet hunun anma,
hatatikꞌa tzet iswatxꞌe.d
28 Yinh kaw yeli,
chiwalan teyet,
ay haywanh mak texol tiꞌ maxhto chikami masanto chiyil wulan kat wokan Yahawoj,
Hanin Aqꞌbꞌilintijan texol yu Komam Dios,
xhi Komam Jesús.