Sunil tzet ewanyehi chiꞌabꞌchaloj
12
Wal xin kaw ismilalxa anma iskutxbꞌa isbꞌa yabꞌen tzet chal Komam Jesús,
toxanhe chistenle isbꞌa anma.
Yalni Komam Jesús tet ebꞌyaꞌ iskuywom:
—Cheyil hebꞌa tet ebꞌnaj fariseo,
yuto chal isbꞌa ebꞌnaj kꞌulal.
Wal xin haꞌ iskuybꞌanil ebꞌnaj lahan hakaꞌ nichꞌan yanhal ixim pan chꞌok xol ixim harina,
sunil ixim chisipkꞌa yu.
2 Yuto sunil tzet ebꞌabꞌil chꞌelo yenhel,
yebꞌpaxo sunil tzet ewanyehi chꞌixtanhwilo sata anma.
3 Yuxin yinh kaw yel chiwalan teyet,
sunil tzet cheyal xol qꞌejholo chiꞌabꞌelaxo yu anma yet tzꞌayikal,
yebꞌpaxo sunil tzotiꞌ chihal-lax yinh nanhkꞌulal yul hunu nha,
chihal-laxo yinh kaw ip istinha.
Hanhkꞌanhehojabꞌ tet Komam Dios chonhxiwi
4 »Wal hex wamigo hextiꞌan,
chiwalan teyet mach chexxiw tet ebꞌnaj chu ispotxꞌnikamo henimanil,
yuto matxa hunuxa tzet wal kexyuten ebꞌnaj.
5 Yaj chiwalan teyet,
mak tet bꞌay wal hexiwi,
haꞌ ton tet Komam Dios,
Komam chu kexyaqꞌni kamoj,
chilahwi tuꞌ aypaxo yip kexyanito xol qꞌa qꞌaꞌ mach istanhbꞌal.
Haꞌ ton tet Komam tuꞌ chexxiwi.
6 »Chisje hetxumnilo yinh noꞌ nixhte chꞌik,
hokꞌonh noꞌ yinh kabꞌ centavo,
yaj machi hunu noꞌ chito nahul yu Komam.
7 Hajxamex hex tiꞌ,
kaw niman heyelapno sata noꞌ.
¿Tom mach cheyohtajoj ta sunil xil hewiꞌ bꞌisbꞌil yinh hununtajil yu Komam?
Yuxin chiwalan teyet,
mach chexxiwi.
Mak mach chitxꞌixwi yinh Komam Jesús sata anma
8 »Chiwalan teyet,
maknhetikꞌa mach chitxꞌixwi yalnilo sata anma ta wetan yehi,
Hanin Aqꞌbꞌilintijan texol yu Komam Dios,
chiwalan ta wetan anma tuꞌ sata ebꞌnaj yángel Komam ay bꞌey satkanh.
9 Yajaꞌ mak chitxꞌixwi yalni sata anma ta wetan yehi,
chiwalpaxojan sata ebꞌnaj yángel Komam Dios tato mach wetojan ye anma tuꞌ.
10 Makta chibꞌuchwahi kat yalni hunu tzotiꞌ txꞌoj winhan,
Haninan Aqꞌbꞌilintijan texol yu Komam Dios,
ayto nimankꞌulal yinh,
yaj mak chihalni txꞌoj tzotiꞌ yinh Komam Espíritu Santo,
matxa nimankꞌulal yinh.
11 »Hayet chexilaxto sata ebꞌnaj yahawil yeko yinh iscapilla ebꞌnaj Israel,
maka sata ebꞌnaj juez,
maka satapaxo ebꞌnaj alkal,
mach chꞌok yinh hekꞌul yinh tzet chu hekolni hebꞌa,
yebꞌ tzet chu hepajtzen istzotiꞌ ebꞌnaj.
12 Yuto hayet chiꞌapni istiempohal heyilaxto sata ebꞌnaj,
haꞌ Komam Espíritu Santo chꞌaqꞌni hehelanil hetzoteli,
xhi Komam tet anma.
Kaw ay ismay ta chijako janma yinh qꞌalomal
13 Xol anma tuꞌ,
ay huneꞌ naj halni tet Komam Jesús hakaꞌ tiꞌ:
—Mam Kuywawom,
hal tet wuxhtatiꞌan inqꞌanaꞌan yaqꞌahabꞌ naj inmajulan yinh tzet aqꞌbꞌilkano jetanh yu komamanh,
xhi naj.
14 Yaj yal Komam tet naj:
—Hach wet anmahil,
hanintiꞌan mach alkalo wekojan texol,
kat inpohnitojan tzet ye tuꞌ teyinh,
xhi Komam.
15 Yalni Komam tet anma xin:
—Nannhe heyu,
kaw cheyil hebꞌa,
mach chetzꞌuniko heyanma yinh qꞌalomal,
yuto isqꞌinal anma mach chipitzkꞌati yinh tzettaj ay yul isqꞌabꞌ,
xhi Komam.
16 Yalni Komam huneꞌ yechel tiꞌ tet anma:
«Ay huneꞌ naj winaj kaw qꞌalom,
kaw niman sat istzꞌunubꞌ yaqꞌa.
17 Yuxinto yal naj qꞌalom tuꞌ ischukil hakaꞌ tiꞌ:
“¿Tzet wal wuten hinbꞌahan?
Kaw matxa chabꞌe bꞌay chinkꞌubꞌahan sat intzꞌunubꞌtiꞌan,”
xhi naj.
18 Istit yinh isnabꞌal naj,
yalni naj hakaꞌ tiꞌ:
“Wohtaxahan tzet chinwatxꞌeꞌan.
Chiwuchkꞌayojan hunteqꞌan inkꞌunhatiꞌan,
kat inwatxꞌenojan hunteqꞌanxa kaw nimej chu,
haxinwal kꞌuxan yokto sunil sat intzꞌunubꞌtiꞌan yul yebꞌ sunil tzet ayinan.
19 Chilahwi tuꞌ xin kat walnihan tet wanmahan hakaꞌ tiꞌ:
Kaw txꞌiꞌal tzet ayach yinh kaw niman tiempo.
Wal tinanh xewanh yebꞌ waꞌanh,
kat hawaqꞌni tzet choche hawanma,
kat hawaqꞌni tzalaho hakꞌul,”
xhi naj tet yanma.
20 »Tzujan tuꞌ xin,
yalni Komam Dios tet naj:
“¡Kaw machi hawiꞌ!
Yinh huneꞌ aqꞌbꞌal tiꞌ chaxhkamoj.
¿Mak tet xin chikanokano hunteqꞌan kꞌubꞌabꞌil hawu tiꞌ hawalni?”
xhi Komam Dios tet naj.
21 »Hakaꞌton huneꞌ naj winaj tiꞌ,
hak tuꞌ ye anma yinhnhetikꞌa qꞌalomal chako yanma,
yuxin yul sat Komam Dios kaw mebꞌaꞌ hunteqꞌan anma tuꞌ,»
xhi Komam.
Anma chꞌaniko Komam Dios yipo yanma Komam chitanheni
22 Lahwi tuꞌ xin,
yalni Komam Jesús tet ebꞌyaꞌ iskuywom:
«Chiwalan teyet,
mach cheyako yinh hekꞌul yinh tzet cheloh yebꞌpaxo yinh bꞌay chitit istohol xil heqꞌap cheyakoj.
23 Heyohtaj tato haꞌ Komam Dios chꞌaqꞌni kokawil,
¿hatokꞌanabꞌ tzet chikolo mach chaqꞌ Komam heyalni?
Haꞌ Komam aqꞌnipaxo huneꞌ konimanil tiꞌ ¿tom mach chaqꞌapaxo Komam xil koqꞌap heyalni?
24 Chisje hetxumni yinh noꞌ hoh,
machi yawal noꞌ chakoj,
mach chihatxꞌwipaxo noꞌ,
machipaxo iskꞌunha noꞌ,
yajaꞌ Komam Dios chiꞌaqꞌni tzet chislo noꞌ.
Hajexxam hex tiꞌ,
to kaw ekꞌbꞌal heyelapno sata noꞌ.
25 ¿Aymi hunujex tiꞌ yu kaw cheyako yinh hekꞌul chihitzto nichꞌanoxa hekawil yul sat yibꞌanhqꞌinal tiꞌ?a
¡Machoj!
26 Yuxin ta mach chexqꞌoji hewatxꞌen tzet ye tuꞌ nixhchꞌan,
¿tzet yinh xin cheyako hunteqꞌanxa yinh hekꞌul?
27 »Ilwekꞌanabꞌ teꞌ kaj,
mach chimunla teꞌ,
mach chichemlipaxo teꞌ,
yaj chiwalan teyet yaꞌ rey Salomón yet payat,
waxanhka kaw qꞌalom yaꞌ,
yajaꞌ machi apni isqꞌaptzen isbꞌa yaꞌ hakaꞌ iskꞌulchꞌanil teꞌ kaj tuꞌ.
28 Walka kaw kꞌulchꞌan jilni isxumakil teꞌ kaj tuꞌ tinanh,
yaj wal yet hekal kabꞌe chinhuslaxto teꞌ yul horno.
Ta chaqꞌ Komam Dios iskꞌulchꞌanil teꞌ kaj,
¿hatokꞌanabꞌ xil heqꞌabꞌ mach chaqꞌ Komam?
hex tiꞌ machi kaw chikawxi hekꞌul yinh Komam.
29 Wal xin mach cheyako yinh hekꞌul bꞌay chikawistit tzet cheloh.
30 Wal anma mach ohtanhe Komam Dios,
kaw chako hunteqꞌan tzet ye tuꞌ tiꞌ yinh iskꞌul,
yajaꞌ wal hex hex tiꞌ,
ay huneꞌ Hemam yohtaxa tzet chꞌokniko heyu.
31 Yuxin aweko heyanma heyijen yinh tzet chal Komam Dios,
haxa hunteqꞌanxa tzet chꞌokniko heyu,
chiꞌaqꞌlaxo teyet,»
xhi Komam Jesús tet ebꞌyaꞌ iskuywom.
Enseñando Sobre Oración y Fe
Jaqꞌaweto koqꞌalomal bꞌey satkanh
32 Yalnipaxo Komam Jesús tet ebꞌyaꞌ iskuywom:
«Mach chexxiw hex xahan ay wuhtiꞌan.
Kaw haywanhexchꞌan,
yajaꞌ xaꞌel yinh iskꞌul Komam Dios kexyaniko yuninaloj.
33 Txonhweto tzet ay hex,
kat heyaqꞌni istohol tet anma matzet aya,
hak tuꞌ chu hewatxꞌen huneꞌ istxꞌuyal heqꞌalomal mach chiqꞌato bꞌey satkanh.
Hunteqꞌan qꞌalomal tuꞌ machi bꞌaqꞌinhal chitanhiloj yuto haꞌ bꞌey tuꞌ machi elqꞌom,
machipaxo noꞌ ih chiꞌetanotoj.
34 Wal xin haꞌ bꞌay ay heqꞌalomal haꞌ tuꞌ ayko heyanma,»
xhi Komam.
Helan chijute kobꞌa
35 Yalnipaxo Komam:
«Kaw helanojabꞌ cheyute hebꞌa,
kaw watxꞌebꞌilojabꞌiko xil heqꞌap,
yebꞌ ayojabꞌpaxiko qꞌaꞌ yinh hekantil.
36 Lahanojabꞌ cheyute hebꞌa hakaꞌ ebꞌnaj chejabꞌ chismaj yul ispatrón chibꞌey yinh hunu mohyilal.
Hayet chꞌapni naj bꞌey yatut kat yahwi naj.
Kaw yinh anhe xin chishaj ebꞌnaj pulta tet naj patrón tuꞌ.
37 Kaw saqꞌal yet ebꞌnaj chejabꞌ elna iswayanh yet chꞌapni ispatrón tuꞌ.
Chiwalan teyet,
kaw yinh anhe chishelilo xil isqꞌap naj patrón,
kat yawten naj ebꞌnaj waꞌo sat mexha;
haꞌ kaw naj chibꞌatxnikꞌo tzet chislo ebꞌnaj tuꞌ.
38 Yuxin waxanhka yinh chuman aqꞌbꞌal,
maka yet lanhanxa issajbꞌiloj,
kat yapni naj patrón tuꞌ,
kaw saqꞌal yet ebꞌnaj chejabꞌ ta elna iswayanh ebꞌnaj.
39 »Nachahojabꞌilo heyu hunteqꞌan tzet chiwaltiꞌan teyet:
Hakaꞌ hunu naj yahaw nha,
qꞌinalo ta yohta naj tzet orahil chꞌapni naj elqꞌom yinh yatut,
kaw chimmajwa naj,
machim chischakto naj naj yul yatut.
40 Hakexpax tuꞌ hex tiꞌ,
helan cheyute hebꞌa.
Hataxka yet mach nano heyu,
kat wulan,
Hanin Aqꞌbꞌilintijan texol yu Komam Dios,»
xhi Komam tet ebꞌyaꞌ iskuywom tuꞌ.
Naj chejabꞌ yijem yebꞌ naj chejabꞌ mach yijemoj
41 Isqꞌambꞌen yaꞌ Pedro tet Komam:
—Mamin,
¿hanhem jetanh chawal huneꞌ yechel tiꞌ,
mato tet sunil anma?
xhi yaꞌ.
42 Yalni Komam:
—Huneꞌ tiꞌ chiwalan yinh huneꞌ naj ilom munil kaw yijem yebꞌ kaw ay isnabꞌal,
aqꞌbꞌiliko yu naj yahaw munil yul yatut yu yaqꞌni tzet chislo ebꞌnaj munlawom hakaꞌ yalni naj yahaw tuꞌ.
43 Kaw saqꞌal yet naj ta lanhan isyijen naj hakaꞌ tzet halbꞌilkano tet yet chꞌapni naj yahaw munil.
44 Yinh kaw isyelal chiwalan teyet:
Naj yahaw munil tuꞌ chako naj naj yijem tuꞌ yahawo yinh sunil tzet aya.
45 Yaj ta chal naj ischukil:
“Wal yaꞌ wahawan,
¿bꞌaqꞌinhtam chul yaꞌ?”
ta xhi naj,
kat yok naj ismaqꞌni ebꞌnaj chejabꞌ yebꞌ ebꞌix chejabꞌ,
yebꞌ xin hanhkꞌanhe yinh waꞌo chako yanma naj,
yebꞌ xin yinh tzet chukꞌ naj,
kat yokkano naj ukꞌu teꞌ.
46 Haxa yet istzꞌayikal mach echmabꞌilo yahaw naj yu kaw tona nahul ay naj,
kat yul lemna naj yahaw tuꞌ,
hak tuꞌ xin kaw chꞌaqꞌlax ekꞌoyaꞌ yanma naj xol isyaꞌtajil kat yalaxto naj xol ebꞌnaj mach yijemo chute isbꞌa.
47 »Qꞌinalo ta ay hunu naj chejabꞌ yohta tzet choche yahaw,
yajaꞌ mach chako naj yinh iskꞌul iswatxꞌeni,
yebꞌ xin mach chisyijepaxo naj tzet chal naj yahaw tuꞌ,
haꞌ huneꞌ naj chejabꞌ tuꞌ niman tzꞌum chꞌaqꞌlax yijaꞌ naj.
48 Walpaxo naj chejabꞌ,
mach yohtajo ta txꞌoj tzet chiswatxꞌe,
haꞌ naj tuꞌ hanikꞌnhechꞌan tzꞌum chꞌaqꞌlax yijaꞌ.
Haꞌ mak niman tzet aqꞌbꞌilkano tet,
nimanpaxo chiqꞌanlax tet,
yebꞌpaxo mak niman tzet aqꞌbꞌiliko yul isqꞌabꞌ,
ekꞌbꞌalxa niman chu isqꞌanlaxayo tet,
xhi Komam.
Chiskajlekanh isbꞌa anma yu Komam Jesús
49 Yalnipaxo Komam Jesús:
—Hanintiꞌan hulnajinan waqꞌaꞌkojan huneꞌ hakaꞌ qꞌaꞌ yul yibꞌanhqꞌinal tiꞌ.
Ay walaꞌan ta chiꞌah xaj huneꞌ qꞌaꞌ tuꞌ tinanh.
50 Ay huneꞌ niman isyaꞌtajil chihul wibꞌanhan,
haꞌ ton huneꞌ tuꞌ ayko yinh wanmahan,
kaw xin chꞌekꞌyaꞌ wanmahan masanto chijaꞌ isbꞌa huneꞌ tuꞌ.
51 ¿Ham heyalni ta yu wanikojan aqꞌankꞌulal xol anma yuxin kinhulan?
Machoj,
to yu ispohlen isbꞌa.
52 Wal tinanh istzabꞌloxako huneꞌ tiꞌ xol anma.
Qꞌinalo ta ay howanho yul hunu nha,
oxwanh chꞌok howal yinh kawanh,
haxa kawanh tuꞌ chꞌok howal yinh oxwanh.
53 Naj mame,
chꞌok naj howal yinh iskꞌahol,
naj kꞌahole chꞌok howal yinh ismam,
ix miꞌe chꞌok ix howal yinh yunin,
ix unine chꞌok ix howal yinh ismiꞌ.
Wal ixnam alibꞌe chꞌok ixnam howal yinh yalibꞌ,
kat yokpaxo ix alibꞌe howal yinh ixnam alibꞌe tuꞌ,
xhi Komam.
Yal Komam ta mach chinachalo yu anma yinh huneꞌ tiempo bꞌay aya
54 Yalni Komam Jesús tet anma:
«Hayet cheyilni moyan bꞌay chito tzꞌayik,
kaw anhe chenaloj kat heyalni:
“Chaqꞌaꞌ nhabꞌ tinanh,”
kexchi.
Kaw xin chij isbꞌa tzet cheyala.
55 Hayet cheyabꞌen istit jaqꞌeqꞌ yinh sur,
cheyalpaxoj:
“Kaw chixobꞌxonoj,”
kexchi.
Hak tuꞌ xin chu yijni isbꞌa.
56 Hex cheyal hebꞌa kꞌulal tiꞌ,
kaw helan hex hetxumni yinh tzet chute isbꞌa txꞌo txꞌotxꞌ tiꞌ,
yebꞌ tzet ye tuꞌ cheyil satkanh yet chishelni isbꞌa tiempo,
yaj mach chinacha heyu tzet yelapno ye hunteqꞌan tzꞌayik tiꞌ,»
xhi Komam.
Okanhwe yinh aqꞌankꞌulal yebꞌ anma ayko ishowal teyinh
57 Yalnipaxo Komam:
«¿Tzet yinh yuxin kaw mach chewatxꞌelo hunu tzet ye tuꞌ texol hechukil yinh kaw istoholal?
58 Qꞌinalo ta ay hunu mak chaxhawten sata naj alkal,
haꞌojabꞌ yet lanhan isto naj yul bꞌeh,
kat haqꞌanni nimankꞌulal tawinh tet naj yinh aqꞌankꞌulal.
Ta mach xin,
yet chaxhapni sata naj alkal,
chaxhalaxiko yul isqꞌabꞌ naj mayor,
kat kaxhyanikto naj yul teꞌ preso.
59 Chiwalan tawet mach chaxhelti yul preso tuꞌ tato mach tzꞌajano chawaqꞌ hamulta,»
xhi Komam.