Yilal hebꞌejnikano hetxꞌojal
13
Haꞌ yinh huneꞌ tiempo tuꞌ ay hunteqꞌan ebꞌnaj apni halno tet Komam Jesús yinh tzet yu ispotxꞌlax hunteqꞌan ebꞌnaj ah Galilea yu ischejbꞌanil naj Pilato.
Ismalto ischikꞌil ebꞌnaj xol ischikꞌil no noqꞌ lanhan yaqꞌni xahanbꞌalil tet Komam Dios.
2 Yalni Komam Jesús tet ebꞌnaj:
—¿Ham heyalni ta ekꞌbꞌal ismul ebꞌnaj kam tuꞌ sata hunteqꞌanxa ebꞌnaj ay bꞌey Galilea tuꞌ?
¡Machoj!
3 Wal xin,
chiwalan teyet,
ta mach chenah hebꞌa kat hebꞌejnikano hetxꞌojal,
chexkam hakaꞌ ebꞌnaj tuꞌ.
4 Hakaꞌpaxo ebꞌnaj 18 (waxajlahonhwanh) kam bꞌey Siloé yet yaykꞌay huneꞌ torre yibꞌanh ebꞌnaj,
¿tom kaw ekꞌbꞌal ismul ebꞌnaj tuꞌ sata hunteqꞌanxa anma bꞌey konhobꞌ Jerusalén,
heyalni?
5 ¡Machoj!
Hakexpax tuꞌ hex tiꞌ,
ta mach chexmeltzoko yul isqꞌabꞌ Komam Dios,
chexkampaxoj,
xhi Komam.
Yechel yinh huneꞌ teꞌ higuera mach chisatni
6 Yalni Komam Jesús hunxa yechel tiꞌ tet anma:
«Ay huneꞌ naj,
ay huneꞌ teꞌ higuera sat istxꞌotxꞌ.
Isto naj yilnoj ta ay sat teꞌ,
yajaꞌ haxa yet yapni naj yilno teꞌ,
machi hunu sat teꞌ.
7 Yalni naj tet naj chitanhen istxꞌotxꞌ tuꞌ:
“Oxebꞌxa habꞌil chilan wulikꞌojan wilnojan ta ay sat huneꞌ teꞌ higuera tiꞌ,
yajaꞌ kaw machi hunu sat teꞌ chaqꞌa.
Wal tinanh xin,
tzokꞌkanh teꞌ,
nabꞌanhe majbꞌililo txꞌotxꞌ yu teꞌ,”
xhi naj.
8 Istaqꞌwikanh naj chitanhen istxꞌotxꞌ naj tuꞌ:
“Mamin,
akano teꞌ huneꞌxa habꞌil tiꞌ.
Chintꞌokoꞌan txꞌotxꞌ yich teꞌ,
kat wanikojan yabonohal teꞌ.
9 Ta chiyaqꞌa sat teꞌ,
kꞌul chal tuꞌ,
ta mach xin,
kat hatzokꞌnikanh teꞌ,”
xhi naj,»
xhi Komam.
Yaqꞌ kawxo Komam Jesús huneꞌ ix yinh istzꞌayik xewilal
10 Yinh huneꞌ tzꞌayikal xewilal yet iskuywa Komam yul iscapilla ebꞌnaj Israel,
11 ayikto huneꞌ ix ix 18 (waxajlanhebꞌxa) habꞌil yok huneꞌ yabꞌil yinh yu huneꞌ ischejabꞌ naj matzwalil,
kaw kꞌonhanxa ye ix yu,
maxhtikꞌa xin chu istoholbꞌanhen isbꞌa ix.
12 Hayet yilnito Komam Jesús ix,
yawtenti Komam ix iskꞌatanh,
yalni Komam tet ix:
—Hach tiꞌ miyay,
makaxhkolchalo yul isqꞌabꞌ huneꞌ yabꞌil tiꞌ,
xhi Komam.
13 Lahwi tuꞌ xin yanayo Komam isqꞌabꞌ yibꞌanh ix.
Hak tuꞌ yu istoholbꞌanhen isbꞌa ix.
Yichiko ix yalni kꞌul-la tzotiꞌ yinh Komam Dios.
14 Yajaꞌ kaw tit ishowal naj yahawil yinh capilla,
yuto kawxikanh huneꞌ ix tuꞌ yu Komam yinh istzꞌayikal xewilal.
Yalni naj tet anma:
—Kaw wajebꞌ tzꞌayik chonhmunla yul semana,
yuxin yulbꞌal wajebꞌ tzꞌayik tuꞌ hulanhwe heyaqꞌaꞌ anhte hebꞌa,
yaj maxhtaj yinh istzꞌayikal xewilal,
xhi naj.
15 Istaqꞌwikanh Komam:
—Hex cheyal hebꞌa kꞌulal tiꞌ,
ta ay hunu hewakax makato hunu hecheh xekan yinh istzꞌayikal xewilal,
¿tom mach chepuhilo noꞌ,
kat heto heyaqꞌno ukꞌu haꞌ noꞌ?
16 Wal huneꞌ ix ix tiꞌ,
yichmam ix ye icham Abraham,
18 (waxajlanhebꞌxa) habꞌil istzabꞌloti ix yu huneꞌ yabꞌil aqꞌbꞌiliko yu ischejabꞌ naj matzwalil tiꞌ.
¿Tom xin yu istzꞌayikal xewilal yuxin mach chu iskolcha ix yinh huneꞌ isyaꞌtajil ayko yinh tiꞌ,
heyalni?
xhi Komam.
17 Hayet yalni Komam hakaꞌ tuꞌ,
sunil ebꞌnaj ayko ishowal yinh Komam txꞌixwikanh ebꞌnaj yet yabꞌen huneꞌ tuꞌ.
Wal sunil anma xin,
kaw chitzala iskꞌul yilni sunil nimeta kꞌaybꞌalkꞌule iswatxꞌe Komam.
Sanación en el Sabbat
Yechel yinh yinhatil teꞌ mostaza
18 Yalnipaxo Komam Jesús:
—¿Tzet chu ischꞌibꞌ isbꞌisil anma chꞌok yul isqꞌabꞌ Komam Dios,
heyalni?
¿Bꞌaytet yebꞌ kꞌul inlahanbꞌanan?
19 Anma chako isbꞌa yul isqꞌabꞌ Komam Dios,
lahan yebꞌ hunu nichꞌan yinhatil teꞌ mostaza chistzꞌun hunu naj sat istxꞌotxꞌ.
Chichꞌibꞌkanh teꞌ,
kat yok teꞌ nime teꞌal,
hak tuꞌ xin chu yapni noꞌ chꞌik iswatxꞌenoko yatut xol isqꞌabꞌ teꞌ,
xhi Komam.
El Reino de Dios como una Semilla de Mostaza
Yechel yinh yanhal ixim pan
20 Yalnipaxo Komam:
—Chiwalan huneꞌxa yechel tiꞌ teyet yinh tzet chu ischꞌibꞌ isbꞌisil anma chako isbꞌa yul isqꞌabꞌ Komam Dios.
21 Lahan hakaꞌ nichꞌano yanhal ixim pan chako hunu ix ix xol oxebꞌ mal ixim harina.
Kaw xin chisipkꞌakanh sunil ixim yu,
xhi Komam.
Yechel teꞌ pulta txannhe sat
(Mt. 7:13-14, 21-23)
22 Hayet isto Komam Jesús yul bꞌeh chiꞌapni bꞌey Jerusalén,
ay hunteqꞌan konhobꞌ yebꞌ hunteqꞌan aldea bꞌay ekꞌ Komam kuywal.
23 Ay xin huneꞌ naj qꞌambꞌen tet Komam:
—Mamin,
¿tom haywanhchꞌannhe mak chikolchahi?
xhi naj.
Istaqꞌwi Komam:
24 —Aqꞌwe heyanma heyokto yul huneꞌ pulta nichꞌanchꞌan sat.
Wal xin chiwalan teyet,
kaw txꞌiꞌal mak choche chiꞌoktoj,
yaj mach chu yu.
25 Wal xin hanintiꞌan lahan hinan hakaꞌ hunu yahaw nha.
Yet aqꞌbꞌalil xin chinpebꞌaltijan ispultahil teꞌ.
Lahwi tuꞌ,
hex chexkankano istinha chꞌelikto heyaw sat pulta,
cheyalni:
“Mamin,
hajonhiktojanh,”
kexchi.
Yaj chintaqꞌwihan teyet:
“Mach kexwohtajojan,”
kinchihan.
26 »Yet ay hex istinha tuꞌ,
cheyalniktoj:
“Kaw huneꞌnhe konhwaꞌi,
konhhakuynipaxojanh yulajla bꞌeh,”
kexchi.
27 Kat xin intaqꞌwipaxojan teyet:
“Mawalan teyet ta mach kexwohtajojan.
¡Elanhwe inkꞌatanhan hex istxꞌojalnhe chewatxꞌe!”
kinchihan teyet yinh huneꞌ tzꞌayikal tuꞌ.
28 »Hak tuꞌ xin chu heyok oqꞌoj,
kat isnhetxꞌla heyeh yu isyaꞌtajil yet cheyilni yaꞌ Abraham yebꞌ yaꞌ Isaac yebꞌ yaꞌ Jacob yebꞌ sunil ebꞌyaꞌ ischejabꞌ Komam Dios ayko iskꞌatanh Komam.
Wal hex hex tiꞌ,
mach chexchahlaxiktoj.
29 Wal xin chitit anma yulajla konhobꞌ yul sat yibꞌanhqꞌinal tiꞌ,
kat iskutxiko iskꞌatanh Komam Dios,
kat iswaꞌ sat mexha iskꞌatanh Komam Dios Yahawil.
30 Ay mak machi yelapno yul sat anma tinanh,
yaj kaw ay yelapno ye yul sat Komam Dios,
haꞌ kaw kꞌul chꞌelkaniko yet bꞌaqꞌinh.
Aypaxo anma,
kaw ay yelapno ye tinanh yul sat anma,
yaj mach kꞌulo chꞌeloko yet bꞌaqꞌinh,
xhi Komam.
Kaw tzꞌay iskꞌul Komam Jesús yinh anma ay bꞌey Jerusalén
31 Haꞌtikꞌa yinh huneꞌ tzꞌayik tuꞌ,
apni hunteqꞌan ebꞌnaj fariseo iskꞌatanh Komam Jesús,
yalni ebꞌnaj:
—Mamin,
elanh yul kokonhobꞌ tiꞌanh yuto choche naj Herodes kaxhispotxꞌoꞌ,
xhi ebꞌnaj.
32 Istaqꞌwi Komam:
—As halwe tet huneꞌ naj leqꞌtiꞌ tuꞌ hakaꞌ noꞌ wech,
ta huneꞌ tzꞌayik tiꞌ yebꞌpaxo hekal chiwaqꞌ kawxojan anma yaꞌay,
yebꞌpaxo xin chiwilojan ischejabꞌ naj matzwalil yinh anma,
haꞌ to yet kabꞌe chilahwi inmuniltiꞌan.
33 Yuto yilal inlahnihan huneꞌ inbꞌeltiꞌan tinanh yebꞌ hekal,
yet kabꞌe xin chinapnihan bꞌey Jerusalén,
yuto sunil ischejabꞌ Komam Dios yilal iskam bꞌey Jerusalén tuꞌ,
xhi Komam tet ebꞌnaj.
34 Yalnipaxo Komam:
—Hex ah Jerusalén hex tiꞌ,
chepotxꞌkamo ebꞌnaj ischejabꞌ Komam Dios,
cheqꞌojni kamo ebꞌnaj chejbꞌilti texol yu Komam.
Kaw txꞌiꞌal el kexwawtekojan yul inqꞌabꞌan,
hakaꞌ chu yawteniko noꞌ miꞌe chiyo nixhte yunin yalanh xikꞌ,
yajaꞌ machi heje.
35 Wal tinanh chiwalkanojan teyet,
huneꞌ bꞌay ay hex tiꞌ chibꞌejlaxkanoj.
Chiwalnipaxkanojan teyet tato matxa chinheyilan masanto chꞌapni yorahil bꞌay cheyalaꞌ:
“Jalaꞌwe tzotiꞌ kꞌul yinh Mak chul koxol yinh isbꞌi Komam Dios,”
kexchi,
xhi Komam.