Yalilo Komam Jesús istxꞌojal ebꞌnaj fariseo yebꞌ ebꞌnaj kuywawom yinh ley
23
Lahwi tuꞌ yalni Komam Jesús tet anma yebꞌ tet ebꞌyaꞌ iskuywom:
2 «Ebꞌnaj fariseo yebꞌ ebꞌnaj kuywawom yinh ley,
haꞌ ismunil ebꞌnaj tuꞌ haꞌ ton kexiskuyni yinh isley Moisés.
3 Yuxin sunil tzet chal ebꞌnaj teyet yijewej,
yajaꞌ mach chebꞌeybꞌalnheto tzet chiswatxꞌe ebꞌnaj,
yuto haꞌ tzet chal ebꞌnaj mach chisbꞌeybꞌalnhe ebꞌnaj.
4 Haꞌ kuybꞌanil chaqꞌ ebꞌnaj tet anma,
lahan hakaꞌ hunu ijatz kaw al,
machi mak chiqꞌoji yinikanh.
Wal ebꞌnaj xin nitam hunu yiximal isqꞌabꞌ ebꞌnaj chishitziko yinh.
5 Kꞌul yubꞌ ebꞌnaj,
kaw yijem chute isbꞌa ebꞌnaj,
yajaꞌ yunhe yil-lax ebꞌnaj yu anma.
Kaw nimej chute ebꞌnaj sat noꞌ tzꞌum bꞌay tzꞌibꞌnhebꞌiliko Istzotiꞌ Komam Dios kat yaniko ebꞌnaj noꞌ yinh isqꞌabꞌ,
maka yinh ispalanh.
Chanipaxiko ebꞌnaj hunteqꞌan xil isqꞌap nimej ishojo istiꞌ.
6 Yet chiꞌawtelax ebꞌnaj waꞌo yinh qꞌinh,
haꞌ hunteqꞌan tzꞌonhobꞌal kaw ay yelapnoj haꞌ chismajilo ebꞌnaj,
hak tuꞌ chutepaxo ebꞌnaj yulaj capilla.
7 Hayet chiꞌekꞌpaxo ebꞌnaj yulaj bꞌeh yochebꞌal ebꞌnaj kaw kꞌul chu istioxhli anma tet ebꞌnaj,
yebꞌ xin kaw choche ebꞌnaj yabꞌeꞌ tato chihal-lax kuywawomal yinh ebꞌnaj.
8 »Wal hex tiꞌ xin,
machojabꞌ cheyoche chihal-lax kuywawomal teyinh,
yuto huneꞌnhe mak hekuywawom,
wal xin heyuxhtanhe hebꞌa.
9 Machi hunu mak cheyal hemamo yul sat yibꞌanhqꞌinal tiꞌ,
yuto huneꞌnhechꞌan Hemam,
haꞌ ton Komam Dios ay yul satkanh.
10 Machojabꞌ cheyoche chihal-lax iswiꞌehal teyinh,
yuto huneꞌnhe mak iswiꞌehal yeko teyinh,
haꞌ ton Komam Cristo.
11 Wal xin haꞌ mak ekꞌbꞌal yelapno yehi,
yaqꞌabꞌiko isbꞌa chejabꞌo texol.
12 Yuto haꞌ mak chikanh isbꞌa,
chiꞌilaxayoj,
wal mak chiyiyo isbꞌa xin,
chiꞌilaxkanh.
13 »Hex kuywawom yinh isley yaꞌ Moisés yebꞌ hex fariseo hex tiꞌ,
cheyal hebꞌa kꞌulal,
¡kaw kꞌanchꞌan hex!
yuto chekach yok anma yul isqꞌabꞌ Komam Dios.
Mach cheyako hebꞌa,
machi xin chejepaxo chiꞌok mak choche yaqꞌaꞌko isbꞌa yul isqꞌabꞌ Komam Dios.
14 Hex kuywawom hex tiꞌ yebꞌ hex fariseo hex tiꞌ,
cheyal hebꞌa kꞌulal,
¡kaw kꞌanchꞌan hex!
yuto cheyilo yatut ebꞌix hunix,
chilahwi tuꞌ kaw nimej cheyuteyoj hetxah,
hakaꞌtanhe mach istxꞌojal chewatxꞌe.
Wal xin kaw ekꞌbꞌalto isyaꞌtajil chiꞌay teyibꞌanh.
15 »Hex kuywawom yinh ley yebꞌ xin hex fariseo hex tiꞌ cheyal hebꞌa kꞌulal.
¡Kaw kꞌanchꞌan hex!
yuto sunil yul sat yibꞌanhqꞌinal tiꞌ yebꞌ yibꞌanh haꞌ mar chilahwilo heyekꞌi yunhe hemonteniko anma teyintaj.
Haꞌ mak chimoncha heyu tuꞌ xin chisomchakanto yul iswiꞌ heyu,
kayel ekꞌbꞌalto chischah isyaꞌtajil xol qꞌa qꞌaꞌ tesataj.
16 »Hex tiꞌ lahan hex hakaꞌ hunu mak mach chu yilni,
yajaꞌ cheyako hebꞌa ijbꞌalomal.
¡Kaw kꞌanchꞌan hex!
Cheyalnipax hakaꞌ tiꞌ:
“Ta ay mak chiꞌaqꞌni bꞌinaho Yatut Komam Dios yet chistaqꞌweniko hunu tzet ye tuꞌ yinh,
mach yilalo chisyije.
Yaj ta isbꞌi chꞌen oro ayikto yul Yatut Komam chaqꞌ bꞌinaho yinh hunu tzet ye tuꞌ,
kaw yilal isyijeni,”
kexchi.
17 ¡Kaw suk hex!
Lahan hex hakaꞌ anma mach chu yilni.
¿Bꞌaytet ekꞌbꞌal yelapno yehi?
¿Tom chꞌen oro mato Yatut Komam Dios?
Wal xin,
yu Yatut Komam Dios yuxin ay yelapno ye chꞌen oro ayikto yul yatut tuꞌ.
18 Cheyalnipaxoj:
“Ta ay hunu mak chiꞌaqꞌni bꞌinaho altar yet chistaqꞌweniko hunu tzet ye tuꞌ yibꞌanh,
mach yilalo chisyije.
Yajaꞌ ta isbꞌi xahanbꞌal ayahto yibꞌanh altar tuꞌ chaqꞌ bꞌinahoj,
kaw yilal chisyije,”
kexchi.
19 ¡Kaw lahan hex yebꞌ anma mutzꞌan sat!
¿Bꞌaytet kaw ekꞌbꞌal yelapno yehi?
¿Tom haꞌ xahanbꞌal ayahto yibꞌanh altar tuꞌ,
mato haꞌ altar huneꞌ chiꞌaniko ismay xahanbꞌal tuꞌ?
20 Wal xin haꞌ mak chiꞌaqꞌni bꞌinaho altar yinh tzet chala,
haꞌ hun tzet ayahto yibꞌanh altar tuꞌ chaqꞌ bꞌinahoj.
21 Hakpax tuꞌ mak chiꞌaqꞌni bꞌinaho Yatut Komam Dios yinh tzet chala,
haꞌ hun Komam Dios ay bꞌey tuꞌ chaqꞌ bꞌinahoj.
22 Hakpax tuꞌ mak chiꞌaqꞌni bꞌinaho satkanh yinh tzet chala,
haꞌ hun istzꞌonhobꞌal Komam Dios chiyaqꞌ bꞌinahoj,
kat yaqꞌnipaxo bꞌinaho Komam tzꞌonhan yul yehobꞌal tuꞌ.
23 »Hex kuywawom yinh isley yaꞌ Moisés yebꞌ hex fariseo hex tiꞌ,
cheyal hebꞌa kꞌulal.
¡Kꞌanchꞌan hex!
cheyaqꞌ isdiezmohal teꞌ alawena,
teꞌ anixh,
yebꞌ teꞌ comino,
yajaꞌ machi kam hekꞌul heyijen chejbꞌanile kaw ay yelapno aykano yu Komam Dios;
haꞌ ton hewatxꞌen istoholal,
yebꞌ istzꞌay hekꞌul yinh heyet anmahil,
yebꞌ xin heyijen tzet chal Komam Dios,
yebꞌ heyaniko heyanma yinh Komam,
haꞌ ton hunteqꞌan tiꞌ yilal heyijeni,
machi xin chebꞌejpaxo heyijen hunteqꞌanxa tuꞌ.
24 ¡Hex tiꞌ lahan hex yebꞌ anma mutzꞌan sat,
yajaꞌ cheyako hebꞌa ijbꞌalomal yinh hunuxa maka.
Hex tiꞌ kaw cheyila tato machi hunu noꞌ nichꞌan us chito xol heyitah,
yajaꞌ mach cheyabꞌe hebꞌiqꞌnito noꞌ camello!
25 »Hex kuywawom yinh isley yaꞌ Moisés yebꞌ hex fariseo hex tiꞌ,
cheyal hebꞌa kꞌulal,
¡kaw kꞌanchꞌan hex!
yuto kaw kꞌul cheyute hetxꞌahni yinta hevaso yebꞌ hesekꞌ,
yajaꞌ wal yul xin,
nohnayto yu istzꞌilal heyeleqꞌ yebꞌ yu heyekꞌnajil.
26 Hex fariseo hex tiꞌ,
lahan hex hakaꞌ hunu mak mutzꞌan issat.
Wal xin txꞌahwe bꞌabꞌel yul hevaso yebꞌ hesekꞌ,
haxinwal saj chiꞌelpaxiko yintaj.
27 »Hex kuywawom hex yinh isley yaꞌ Moisés,
yebꞌ hex fariseo hex tiꞌ,
cheyal hebꞌa kꞌulal.
¡Kaw kꞌanchꞌan hex!
yuto lahan hex hakaꞌ hunu panteón kaw kꞌul yehiko istxohal;
kaw kꞌulchꞌan jilni,
yajaꞌ wal yul xin,
nohna yu isbꞌajil kamom yebꞌ tzꞌil.
28 Hakaꞌ hunteqꞌan panteón tuꞌ hakex tuꞌ.
Hanhe yinh sat anma kaw kꞌul cheyute hebꞌa,
wal heyanma xin nohna yu leqꞌtiꞌal yebꞌ yu istxꞌojal.
29 »Hex kuywawom yinh isley yaꞌ Moisés yebꞌ hex fariseo hex tiꞌ,
cheyal hebꞌa kꞌulal.
¡Kaw kꞌanchꞌan hex!
yuto chekayenhe hetzantenkanh bꞌay mujan ebꞌnaj ischejabꞌ Komam Dios.
Chetzantenpaxo bꞌay mujan ebꞌnaj kꞌul iswatxꞌe,
30 cheyalni hakaꞌ tiꞌ:
“Tato ayonhikꞌo yinh huneꞌ tiempohal yet ispotxꞌlax ebꞌyaꞌ ischejabꞌ Komam Dios yu ebꞌnaj jichmam,
mach chimjako kobꞌa kopotxꞌni ebꞌyaꞌ,”
kexchi.
31 Hayet cheyalni hakaꞌ tuꞌ,
hex kaw hex cheyaliloj tato yinh yuninal ebꞌnaj potxꞌnikamo ebꞌyaꞌ ischejabꞌ Komam tuꞌ kextita.
32 ¡Wal xin haꞌ tzet ichebꞌilxa yu ebꞌnaj heyichmam tuꞌ,
lahwekanoj!
33 »¡Hex tiꞌ,
lahan hex yebꞌ noꞌ labꞌa yuto kaw helan hex yinh istxꞌojal!
¿Tzettaxka chu hekolni hebꞌa tet isyaꞌtajil xol qꞌa qꞌaꞌ mach istanhbꞌal?
34 Chinchejtojan ischejabꞌ Komam Dios texol yebꞌ mak itzꞌat iswiꞌ yinh yet Komam,
yebꞌ ebꞌnaj kuywawom.
Yajaꞌ xin ay ebꞌnaj chepotxꞌ yul hecapilla,
ay ebꞌnaj cheyakanh yinh kulus,
aypaxo ebꞌnaj chemaqꞌ yul hecapilla,
yebꞌ xin ay ebꞌnaj chetzumbꞌekꞌo yul hunun konhobꞌ.
35 Teyibꞌanh xin chititkano isyaꞌtajil yu iskamikal sunil ebꞌnaj potxꞌbꞌil;
ebꞌnaj kꞌul tzet iswatxꞌe chiꞌichiti yinh iskamikal naj Abel masanta yinh iskamikal yaꞌ Zacarías,
iskꞌahol icham Berequías,
potxꞌbꞌil xolbꞌal Yatut Komam Dios yebꞌ bꞌay chiꞌaqꞌlax xahanbꞌal.
36 Yinh kaw yeli chiwalan teyet,
chititkano isyaꞌtajil yibꞌanh anma yinh huneꞌ tiempohal tiꞌ yu iskamikal ebꞌnaj tuꞌ,»
xhi Komam.
Kaw tzꞌay iskꞌul Komam Jesús yinh anma ay bꞌey Jerusalén
37 Yalnipaxo Komam Jesús:
«¡Hex ah Jerusalén tiꞌ chepotxꞌkamo ebꞌyaꞌ ischejabꞌ Komam Dios,
kat heqꞌojnikamo ebꞌyaꞌ ischejti Komam texol!
¡Txꞌiꞌal el kexwawtekojan yul inqꞌabꞌan,
hakaꞌ chu yawteniko noꞌ miꞌe chiyo nixhte yunin yalanh isxikꞌ,
yajaꞌ machi heje!
38 Abꞌewekano tzet chiwaltiꞌan,
huneꞌ hekonhobꞌ tiꞌ chebꞌejaꞌkanoj,
chikankano manh anmahil.
39 Tinanh xin chiwalkanojan teyet tato matxa chinheyilan masanto yet cheyalni hakaꞌ tiꞌ:
“¡Jalaꞌwe kꞌul-la tzotiꞌ yinh mak chul koxol yu Komam Dios!”
kexchi,»
xhi Komam.