MALAQUÍAS
1. XAHAN AY ANMA ISRAEL YU KOMAM JAHAWIL
(1:1-5)
1
Haꞌ hunteqꞌan tiꞌ, istzotiꞌ Komam Jahawil yaqꞌ tet yaꞌ Malaquías yunhe yalni yaꞌ tet konhobꞌ Israel.a2 Hak tiꞌ chiyute yalni Komam Jahawil:
«Xahan ay hex wuhan, kinchihan teyet; yajaꞌ hex tiꞌ kextaqꞌwi hakaꞌ tiꞌ:
“¿Tzet xin yu konhhaxahannhenanh?” kexchi.
Wal xin chiwalan teyet: “¿Tom mach yuxhtajo isbꞌa naj Esaú yebꞌ yaꞌ Jacob?
Yajaꞌ xin yaꞌ Jacob inxahannhehan.
3 Wintanhekaniltojan naj Esaú; haxa istxꞌotxꞌ naj,
txꞌotxꞌ qꞌebꞌtalaj wakojan txꞌotxꞌ bꞌay matxa tzet chichꞌibꞌi,
haꞌ xin istxꞌotxꞌ naj tuꞌ okkano bꞌay chiꞌekꞌ noꞌ xoltelajil noqꞌ,” xhi Komam Jahawil.
4 Ta chal ebꞌnaj edomita, titna yinh naj Esaú hakaꞌ tiꞌ:
“Xakonhokkano mebꞌaꞌil,
yaj xin chonhokpaxo kowatxꞌekanh kokonhobꞌ uchkꞌabꞌilxato tiꞌ,” xhi ebꞌnaj.
Hak tiꞌ xin chu istaqꞌwi Komam Dios,
Yahawil yinh Sunil hakaꞌ tiꞌ:
“Chiswatxꞌekanh ebꞌnaj iskonhobꞌ tuꞌ hunelxa,
yajaꞌ haninan chiwuchkꞌayojan,” xhi Komam.
Haꞌ xin yinh istxꞌotxꞌ ebꞌnaj tuꞌ chal anma hakaꞌ tiꞌ: “Istxꞌotxꞌ ebꞌnaj txꞌoj,” xhi.
Chalnipaxoj: “Konhobꞌ bꞌay ayti ishowal Komam Dios yinh sunilbꞌal ej tiempo,” xhi anma.
5 Hex Israel, hex kaw hex cheyil huneꞌ tuꞌ, cheyalni hakaꞌ tiꞌ:
“Komam Dios Yahawil, kaw niman yelapnoj,
chitapalkꞌonto yinta bꞌay chiꞌekꞌ ismohonal konhobꞌ Israel,” kexchi.
2. KACHLAX EBꞌYAꞌ SACERDOTE YU KOMAM JAHAWIL
(1:6–2:9)
6 »Komam Dios Yahawil yinh Sunil, chalni tet ebꞌyaꞌ sacerdote hakaꞌ tiꞌ:
“Ebꞌnaj kꞌahole ay yelapno ismam ebꞌnaj yul sat,
haxa ebꞌnaj chejabꞌ aypaxo yelapno yahawil ebꞌnaj yul sat.
Yuxin tato mame hinan teyinh, ¿tzet yinh xin mach welapnojan yul hesat?
Yebꞌ tato heYahawil wehan, ¿tzet yinh xin mach chexxiw wetan?
Hex tiꞌ kinheyintanhekaniltojan, katto xin heyalnipaxoj,
‘¿Bꞌaytet yinh kaxhjintanhekaniltojanh?’ kexchi.
7 Hex tiꞌ cheyiti hepan mach sajoj yibꞌanh inmexhahan yet xahanbꞌal katto xin heyalnipaxoj:
‘¿Tzet chu jinilojanh hapixan?’ kexchi.
Wal xin chetxumu tato haꞌ inmexhahan yet xahanbꞌal matzet chal yelapnoj.
8 Hayet cheyalten noꞌ meꞌ wetan, noꞌ mach chu yilni,
noꞌ tzakaꞌ yehi, ¿tom mach txꞌojo huneꞌ tuꞌ?
Hakpax tuꞌ yet cheyalten noꞌ qꞌahnatoj maka noꞌ tzꞌontanhe,
‘¿tom mach txꞌojoj?’
Iweto noꞌ sabꞌehal tet ebꞌnaj ayko yahawilo teyinh,
¿chimtzalaho ebꞌnaj ischahno noꞌ teyet?”»b hanin Yahawil yinh Sunil, chiwalan hakaꞌ tiꞌ.
9 Chalni anma teyet, hex sacerdote hex tiꞌ, tato chextxahli wetan,
haxinwal chitzꞌay inkꞌulan yinh anma.
«Yajaꞌ ta haꞌ hunteqꞌan yebꞌalqꞌabꞌe tuꞌ cheyaqꞌ wetan,
¿tom chintzalahan yinh hakaꞌ tuꞌ? xhi Komam Yahawil yinh Sunil.
10 Yalnipaxo Komam: “Ayxikꞌa hunu mak texol tiꞌ chipebꞌan ispultahil watutan,
haxinwal mach nabꞌnheho chiꞌalaxiko qꞌaꞌ yinh yibꞌanh ismexhahil xahanbꞌal wetan.
Yuto hanin Yahawil yinh Sunil, mach chintzalahan teyinh,
mach chinchahpaxojan heyebꞌalqꞌabꞌ cheyaqꞌ wetan,” xhi Komam.
11 Chalnipaxo Komam Yahawil kaw Aykano Yip, hakaꞌ tiꞌ:
“Niman yelapno inbꞌihan yul sat ej konhobꞌ ay yinh yetkꞌulal bꞌay chꞌahilo tzꞌayik,
masanta bꞌey bꞌay chitokano tzꞌayik.
Sunil bꞌaya chinhuslax incienso wetan,
chaqꞌnipaxo isyebꞌalqꞌabꞌ kaw saj wetan,
yuto niman yelapno inbꞌihan yul sat sunil konhobꞌ.
12 Wal hex tiꞌ xin cheyilo inpixanan yet cheyalni hakaꞌ tiꞌ,
‘Haꞌ ismexha Komam Dios yet istxꞌojal yehi,’ kexchi.
Cheyalnipaxoj, ‘Haꞌ hunteqꞌan yebꞌalqꞌabꞌe tiꞌ machi yelapnoj.’
13 Hex tiꞌ, cheyalpaxo hakaꞌ tiꞌ: ‘Kaw xatibꞌayo hunteqꞌan tiꞌ juhanh,’ kexchi.
Chinheyintanhekaniltojanh cheyiniti noꞌ meꞌ elqꞌabꞌil heyu xahanbꞌalil wetan,
maka noꞌ qꞌahnatoj, maka noꞌ yaꞌay cheyaqꞌ heyebꞌalqꞌabꞌeho wetan.
¿Tom chinchahan hunteqꞌan tuꞌ teyet cheyute heyalni?”
xhi Komam Yahawil yinh Sunil.
14 Yalnipaxo Komam, “Chiꞌay isyaꞌtajil yibꞌanh mak chiꞌaniko leqꞌtiꞌal,
chalni ta chiyaqꞌ noꞌ winaj meꞌ kaw saqꞌal xol ismeꞌ,
lahwi tuꞌ haxa noꞌ ay istzakaꞌil chiyaqꞌ yinh xahanbꞌalil.
Yuto hanintiꞌan niman Rey hinan,
sunil yul ej txꞌotxꞌ konhobꞌ ay yelapno ye inbꞌihan,”
xhi Komam Dios Yahawil yinh Sunil.