10. HAꞌ YINH ISLAHOBꞌALXA CHIQꞌOJI JERUSALÉN
(14:1-21)
Konhobꞌ Jerusalén yebꞌ hunteqꞌan nime konhobꞌ
14
Chihul istzꞌayikal Komam Jahawil yet chispohnikanh tzetaj ay hex tesataj,hex ay hex yul konhobꞌ Jerusalén.
2 Haꞌ yinh huneꞌ tzꞌayik tuꞌ chiskutxbꞌako Komam Dios Jahawil sunil ej konhobꞌ chaniko howal yinh konhobꞌ Jerusalén.
Hayet chiqꞌoji ebꞌnaj yinh konhobꞌ tuꞌ xin,
kat yilaxilti tzet ay anma yul yatut,
yebꞌ xin chiꞌetalax ebꞌix ix yu ebꞌnaj chꞌaniko ishowal yinh Jerusalén tuꞌ.
Haꞌ yikta anma ay yul konhobꞌ tuꞌ chiꞌilaxto preso,
yajaꞌ haxa yaqꞌbꞌilxa anma xin chikankano yul konhobꞌ.
3 Yajaꞌ xin chiꞌelti Komam Jahawil kat yaniko howal yinh hunteqꞌan konhobꞌ tuꞌ,
hakaꞌ yu isto Komam yinh howal yet yalanhtokanoj.
4 Haꞌ yinh huneꞌ tzꞌayik tuꞌ, chayo yoj Komam yibꞌanh wonhan Olivo,
ayko sata konhobꞌ Jerusalén, yinh yetkꞌulal bꞌay chiꞌahilo tzꞌayik.
Chiqꞌaxpohto wonhan Olivo tuꞌ, kabꞌ chiꞌayikoj, kat ishajcha huneꞌ niman akꞌal,
chiꞌichiti bꞌey yetkꞌulal bꞌay chiꞌahilo tzꞌayik masanta bꞌey bꞌay chito tzꞌayik.
Haꞌ xin qꞌaxep wonhan tuꞌ chitokano yinh yetkꞌulal norte,
haxa qꞌaxepxa chitokano yinh yetkꞌulal sur.
5 Haꞌ sat akꞌal tuꞌ xin chextohi yet chexelkanh,
akꞌal ayko xol kabꞌebꞌ wonhan.
Yuto huneꞌ akꞌal xol wonhan tuꞌ chitaapni bꞌey txꞌotxꞌ Azal.
Chexelkanh hex tiꞌ, hakaꞌ yu yelkanh ebꞌnaj heyichmam yu txixkabꞌ ekꞌ yinh istiempohal yet ayko yaꞌ Uzías reyal yinh Judá.
Kat xin yul Komam Jahawil, koDiosal yebꞌ sunil ebꞌnaj yetxa Komam yehi.
6 Haꞌ yinh huneꞌ tzꞌayik tuꞌ, mach issajilqꞌinal,
mach chewoj, machipaxo chꞌen chew.
7 Machi hunuxa tzꞌayik hakaꞌ huneꞌ tzꞌayik tuꞌ,
mach ixtanhoj ta aqꞌbꞌalil maka ta tzꞌayikal,
wal xin yet chꞌah aqꞌbꞌal sajqꞌinalpaxoj.
Haꞌ huneꞌ tuꞌ, hanhe Komam Dios ohtanhe.
8 Hayet huneꞌ tzꞌayik tuꞌ,
chiꞌelti huneꞌ isnuqꞌ ha haꞌ yul konhobꞌ Jerusalén, mach xin chitajkanh.
Chiꞌekꞌ yojomal haꞌ yinh waresmahil yebꞌ yinh nhabꞌil;
yikta haꞌ chitokano xol haꞌ mar Kamom,
haxa yiktaxa haꞌ xin chitokano xol haꞌ mar Mediterráneo.
9 Haꞌ yinh huneꞌ tzꞌayik tuꞌ, Komam Jahawil chiꞌok yahawilo sunil yul sat yibꞌanhqꞌinal tiꞌ.
Hanhechꞌan Komam Dios, hanhe isbꞌi Komam Jahawil chiꞌaqꞌlax bꞌinahoj.
10 Sunil ej konhobꞌ chiꞌokkano yinh akꞌalil,
chiꞌichiti bꞌey Geba masanta bꞌey Rimón bꞌey sur yinh konhobꞌ Jerusalén.
Haxa konhobꞌ Jerusalén xin nahat chiꞌalaxkanokanh kat yehayo anma yul;
chiꞌichiti bꞌey pulta yet yaꞌ Benjamín,
masanta bꞌey bꞌabꞌel pulta yet payat, bꞌey pulta ayko yinh istxikin konhobꞌ.
Chiꞌichipaxti bꞌey huneꞌ nha nahat yekanh yet naj Hananeel,
masanta chꞌapni bꞌay chiyatzꞌlax yal teꞌ uva yet naj rey.
11 Chiꞌehayo anma yul konhobꞌ tuꞌ,
matxa xin bꞌaqꞌinh chiꞌay tzꞌaktiꞌ yibꞌanh.
Wal xin chiꞌehayo anma yinh sunil yanma bꞌey konhobꞌ Jerusalén tuꞌ.
12 Haxa hunteqꞌan konhobꞌ chiꞌaniko howal yinh konhobꞌ Jerusalén,
chayo Komam Jahawil hunteqꞌan isyaꞌtajil tiꞌ yibꞌanh:
Itzitzto kat isqꞌato isnimanil; chiqꞌato isbꞌaqꞌ sat kat iskan kꞌobꞌnoj bꞌay ayiktoj; haxa yaqꞌ xin chiqꞌatoj.
13 Haꞌ yinh huneꞌ tzꞌayik tuꞌ,
chiꞌokkano niman xiwkilal xol anma tuꞌ yu Komam Jahawil.
Hunun mak tuꞌ chiꞌoktzabꞌno yinh isqꞌabꞌ hunun,
kat xin ismaqꞌlen isbꞌa.
14 Hakpax tuꞌ ebꞌnaj ah Judá, haꞌ bꞌey Jerusalén chaqꞌ ebꞌnaj howal;
chinilo ebꞌnaj isqꞌalomal anma ay yul ej konhobꞌ ayko yinhla ishoyanil Jerusalén;
hantanhe chꞌen oro,
chꞌen plata yebꞌ xilqꞌape chiskutxbꞌakaniko ebꞌnaj.
15 Hakaꞌtikꞌa isyaꞌtajil chiꞌay yibꞌanh anma, hak tuꞌ isyaꞌtajil chiꞌaypaxo yibꞌanh noꞌ cheh, noꞌ mula, noꞌ camello, noꞌ burro yebꞌ yibꞌanh sunil no noqꞌ ay yul iscampamento ebꞌnaj ayko ishowal yinh konhobꞌ Jerusalén.
16 Tzujan tuꞌ xin, haꞌ anma chitokankano yul hunteqꞌan konhobꞌ yaqꞌ howal yinh konhobꞌ Jerusalén,
chihul hunun habꞌil yekꞌtze huneꞌ qꞌinh chal-lax Lexhpat yu yinayo isbꞌa tet Komam Rey,
haꞌ ton Komam Dios Yahawil kaw Aykano Yip.
17 Tato ay hunu konhobꞌ yul sat yibꞌanhqꞌinal tiꞌ, mach chul yul konhobꞌ Jerusalén yiqꞌayo isbꞌa tet Komam Dios Yahawil kaw Aykano Yip, huneꞌ konhobꞌ tuꞌ matxa chiyaqꞌ haꞌ nhabꞌ yibꞌanh. 18 Yebꞌpaxoj tato mach chul konhobꞌ Egipto yekꞌtze qꞌinh Lexhpat mach chaqꞌpaxo haꞌ nhabꞌ yibꞌanh, wal xin chul isyaꞌtajil yinh, hakaꞌ chaqꞌ Komam Jahawil tet hunteqꞌan konhobꞌ mach chiꞌapni. 19 Haꞌ ton hunteqꞌan isyaꞌtajil tuꞌ chiꞌay yibꞌanh Egipto yebꞌ yibꞌanh hunteqꞌan konhobꞌ mach chul yekꞌtze qꞌinh Lexhpat.
20 Hayet huneꞌ tzꞌayik tuꞌ, haꞌ yinh chꞌen nixhte chꞌen chiqꞌanhiko yinh isxhila noꞌ cheh, tzꞌibꞌnhebꞌiliko hakaꞌ tiꞌ: «Yetxa Komam Dios Jahawil yehi,» xhi. Yebꞌpaxo xin txꞌotxꞌ xi chiꞌokniko bꞌey Yatut Komam Jahawil bꞌay chitxiklax noꞌ chibꞌe yetpaxo Komam yehi, hakaꞌ ye hunteqꞌan nime sekꞌ chiꞌokniko yibꞌanh ismexhahil yet xahanbꞌal. 21 Sunil txꞌotxꞌ xi bꞌey Jerusalén, yebꞌ bꞌey Judá yetxa Komam Jahawil yehi, Komam Dios Yahawil yinh Sunil. Haxa mak chul yalteꞌ isxahanbꞌal, haꞌ hunteqꞌan xi tuꞌ chiꞌokniko yu bꞌay chistxik noꞌ chibꞌe chaqꞌ yinh xahanbꞌalil. Haꞌ yinh huneꞌ tzꞌayik tuꞌ, matxa ebꞌnaj txonhom chiꞌil-lax bꞌey Yatut Komam Dios, Yahawil yinh Sunil.