2 Hak tiꞌ yute yalni Komam, Yahawil yinh Sunil, hakaꞌ tiꞌ: «Huneꞌ konhobꞌ tiꞌ chiyala: “Maxhto chiꞌapni istzꞌayikal bꞌay chiwatxꞌelaxkanh Yatut Komam Jahawil,” xhi,» xhi Komam. 3 Yaqꞌni Komam istzotiꞌ tet ischejabꞌ, haꞌ ton yaꞌ Hageo, yalni hakaꞌ tiꞌ: 4 «Wal hex tiꞌ xin, ¿tom maꞌapni istiempohal heyeh yul heyatut nanxa yok iswatxꞌebꞌanil, yajaꞌ wal watutan xin uchkꞌabꞌiltoj?»^a 5 Wal xin, hanin Yahawil yinh sunil, hankawhinan chiwalan hakaꞌ tiꞌ: «Okanhwe tuknoj, kat kam hetxumni yinh tzet yeko hebꞌeybꞌal. 6 Kaw niman hetzꞌunubꞌ cheyakoj, yaj xin hanikꞌnhe sat cheyikanh; chexwaꞌi, machi xin chinoh hekꞌul; cheyukꞌ tzet cheyukꞌu, yajaꞌ machi linhi istaj hetiꞌ; cheyako xil heqꞌap, yajaꞌ mach chexqꞌaxnakanh. Haxa mak chimunlahi haꞌ istohol chischah yinh tzꞌayik tuꞌ, hakaꞌta yul txꞌuy holan chiyayto istohol tuꞌ,» xhi Komam.^b 7 Hak tiꞌ chute yalnipaxo Komam Yahawil yinh Sunil: «Okanhwe tuknoj, kat hetxumni yinh hebꞌeybꞌal. 8 Ahanhweto iswiꞌ witz, kat heyiniti te teꞌ, kat hewatxꞌenkanh watutan, hak tuꞌ xin chiwaqꞌ tzalaho inkꞌulan yinh, kat inyenilojan isqꞌaqꞌal inmayan,» hak tuꞌ chute yalni Komam Jahawil. 9 Yalnipaxo Komam: «Kaw niman tzet chesayikꞌoj hanikꞌnhe xin chitzujcha apno heyu; haꞌ xin tzet chekꞌubꞌa yul heyatut, haninan chiwaqꞌ sajlemotojan yu xobꞌ intiꞌan. Yajaꞌ ¿tzet yu?» xhi Komam Yahawil yinh Sunil. Yalnipaxo Komam: «Yuto haꞌ watutan etaxnatoj, wal hunun hex xin haꞌ hewatxꞌen heyatut ayko yinh hekꞌul. 10 Yuxin haꞌ satkanh xaꞌismanhkꞌo yaniti nhabꞌ teyibꞌanh, haxa txꞌo txꞌotxꞌ xin matxa chaqꞌ txꞌotxꞌ sat tzꞌunubꞌ. 11 Haninan walan tato ay tajintiꞌal. Matxa chiwatijan nhabꞌ, chitajilo sunil tzet ay sat txꞌo txꞌotxꞌ yebꞌ yibꞌanh ej iswiꞌ witz; chitajilo ixim trigo yebꞌ teꞌ uva yebꞌ teꞌ olivo, yebꞌ sunil tzet chichꞌibꞌ sat txꞌo txꞌotxꞌ. Matxa nhabꞌ chiꞌay teyibꞌanh yebꞌ yibꞌanh ej no noqꞌ yebꞌ yibꞌanh sunil istzꞌunubꞌ anma,» xhi Komam.

12 Wal yaꞌ Zorobabel, iskꞌahol yaꞌ Salatiel yebꞌ yaꞌ Josué yahawil sacerdote, yaꞌ Josué iskꞌahol yaꞌ Josadac, yebꞌ sunil anma, hayet yabꞌen istzotiꞌ Komam Jahawil yal yaꞌ Hageo ischejabꞌ Komam, isxiwkanh anma ay yul konhobꞌ sata Komam Jahawil, isDiosal anma. 13 Yuxin yaꞌ ischejabꞌ Komam Jahawil, yal yaꞌ istzotiꞌ Komam tet anma yul konhobꞌ tuꞌ, yalni yaꞌ: «Komam chalni: “Hanintiꞌan ayinikojan tekꞌatanh,” xhi Komam,» xhi yaꞌ.

14 Hak tuꞌ yu yiptzen Komam Jahawil yaꞌ Zorobabel, yahawil yinh konhobꞌ Judá, yaꞌ Zorobabel iskꞌahol yaꞌ Salatiel; yiptzenpaxo Komam yaꞌ Josué yahawil sacerdote, yaꞌ Josué iskꞌahol yaꞌ Josadac; yiptzenpaxo Komam sunil konhobꞌ. Hak tuꞌ xin yu yicheniko anma ismunla yinh iswatxꞌenkanh Yatut Komam Jahawil, yahawil kaw aykano yip. 15 Yinh 24 (kanhebꞌ iskawinaj) tzꞌayik yinh iswaj ixahaw yet kabꞌxa habꞌil yok naj Darío reyal yichelaxiko iswatxꞌelaxkanh Yatut Komam tuꞌ.