SOFONÍAS
1. ISTZꞌAYIKAL BꞌAY CHAYO KOMAM JAHAWIL ISHOWAL YIBꞌANH ANMA
(1:1-18)
1
Haꞌ hunteqꞌan tzotiꞌ tiꞌ yal Komam Jahawil tet yaꞌ Sofonías, yulbꞌal hunteqꞌan habꞌil yet ayko yaꞌ Josías iskꞌahol yaꞌ Amón reyal yinh Judá. Yaꞌ Sofonías tuꞌ iskꞌahol yaꞌ Cusi, haxa yaꞌ Cusi iskꞌahol yaꞌ Gedalías, haxa yaꞌ Gedalías iskꞌahol yaꞌ Amarías; haxa yaꞌ Amarías, iskꞌahol yaꞌ Ezequías.2 Komam Jahawil halni hakaꞌ tiꞌ:
«Chintanhtzelojan sunil tzet ye tuꞌ ay sat txꞌo txꞌotxꞌ yinh hunelnhe.
3 Chintanhtzelojan anma yebꞌ ej no noqꞌ;
kat intanhtzenpaxilojan noꞌ chꞌik chiꞌekꞌ purla satkanh,
yebꞌ xin ej noꞌ kay ay xol haꞌ mar;
kat waqꞌnikano kamojan ebꞌnaj txꞌoj kat winikanilojan anma sat txꞌo txꞌotxꞌ, xhi Komam.a
4 Chiwayojan isyaꞌtajil yibꞌanh konhobꞌ Judá,
yebꞌ yibꞌanh sunil anma ay bꞌey Jerusalén;
kat intanhtzenkanilojan bꞌay ekꞌlena tioxh Baal yul konhobꞌ tiꞌ,
kat intanhtzenilojan isbꞌi ebꞌnaj chejabꞌ yinh tioxh tuꞌ yebꞌ ebꞌnaj issacerdote ebꞌnaj.
5 Chintanhtzelojan ebꞌnaj chiꞌahto yibꞌanh yakꞌalil nha,
kat yay jahno tet ej txꞌumel ay yul satkanh,
yebꞌ ebꞌnaj chiꞌay jahnoj chaqꞌni bꞌinaho inbꞌihan,
kat yaqꞌnipaxo bꞌinaho isbꞌi tioxh Milcom.b
6 Chintanhtzepaxilojan ebꞌnaj chispohilo isbꞌa winhan,
hanin Yahawilintiꞌan, ebꞌnaj mach chinsaynikojan,
yebꞌ ebꞌnaj mach chul isqꞌanaꞌ yitzꞌatil iswiꞌ wetan.
7 Okanhwe tukno hinsatajan, hanin Yahawilintiꞌan, yebꞌ kaw ay welapnojan,
yuto kawilxa yeti istzꞌayikal bꞌay chiwayo inhowalan,
yuto watxꞌebꞌilxa xahanbꞌal wuhan.c
Sikꞌbꞌilxapaxilo mak awtebꞌil.
8 Haꞌ yinh istzꞌayikal xahanbꞌal tuꞌ,
chiwayojan isyaꞌtajil yibꞌanh ebꞌnaj ayko yahawilal,
yebꞌ yibꞌanh ebꞌnaj iskꞌahol naj rey,
yebꞌ yibꞌanh sunil ebꞌnaj chiꞌaniko xilqꞌape yet anma nan konhobꞌal.
9 Haꞌ yinh huneꞌ tzꞌayik tuꞌ,
chiwapaxayojan isyaꞌtajil yibꞌanh ebꞌnaj chitꞌujwato yibꞌanh ispultahil nha,
yebꞌ ebꞌnaj chiyaqꞌ noho yatut yahaw yu qꞌalomal chiyiqꞌ yinh eleqꞌ,
yebꞌ yaqꞌni subꞌchaho anma,» xhi Komam.
10 Yalnipaxo Komam: «Haꞌ yinh huneꞌ tzꞌayik tuꞌ,
chiꞌabꞌelax yel aw bꞌey teꞌ pulta yet noꞌ kay,
yawxanhepaxo anma bꞌey iskabꞌ majan konhobꞌ,
xanhe chibꞌilipaxo istzilmoto wonhan.
11 Elojabꞌ yaw anma ay yul konhobꞌ Mactes,
yuto sunil anma txonhom yul konhobꞌ tuꞌ chitanhtzelaxiloj,
chitanhtzenpaxilo Komam ebꞌnaj chihelni chꞌen melyu.
12 Haꞌ yinh huneꞌ tzꞌayik tuꞌ, kaw kam chinsayikꞌojan yu chꞌen linterna yul konhobꞌ Jerusalén,
kat wanayojan isyaꞌtajil yibꞌanh anma machi nino tzet chal iskꞌul,
lahan hakaꞌ teꞌ vino tonhe etxan.
Chalni ebꞌnaj yinh yanma hakaꞌ tiꞌ:
“Komam Jahawil machi iskꞌulal chiswatxꞌe,
machi istxꞌojal chiswatxꞌepaxo jinh,” xhi ebꞌnaj.
13 Yuxin chiꞌelqꞌalaxilo tzet ay ebꞌnaj, kat yetalaxto yatut ebꞌnaj.
Chiyakanh ebꞌnaj yatut, yajaꞌ maxhtaj ebꞌnaj chiꞌeyiko yul; chistzꞌun ebꞌnaj teꞌ uva,
yajaꞌ matxa chiyukꞌ ebꞌnaj vino chꞌel yinh teꞌ, xhi Komam.
14 ¡Kawilxa yeti istzꞌayikal ishowal Komam Jahawil,
tzꞌayik niman yelapnoj! ¡Kawilxa yetij,
kaw toxa chuli! Kaw nanxa islow yel aw yinh istzꞌayikal bꞌay chul Komam.
Ebꞌnaj winaj kaw ay yip yanma chꞌel yaw ebꞌnaj.d
15 Haꞌ huneꞌ tzꞌayik tuꞌ, tzꞌayik bꞌay chayo Komam ishowal, tzꞌayik yet bꞌiskꞌulal,
yebꞌ yabꞌen anma isyaꞌtajil; haꞌ yinh huneꞌ tzꞌayik tuꞌ chꞌah wejna sunil,
kat istanhtzelaxkanilo konhobꞌ.
Haꞌ huneꞌ tzꞌayik tuꞌ, tzꞌayik bꞌay chul qꞌejholo,
kaw qꞌej chukaniloj, huneꞌ tzꞌayik tuꞌ kaw moyantanhe,
kat isqꞌejbꞌilo yu moyan.
16 Haꞌ yinh huneꞌ tzꞌayik tuꞌ, tzꞌayik yet chiꞌoqꞌtzelax chꞌen trompeta,
yebꞌ chꞌel yaw ebꞌnaj chiꞌaniko howal yinh konhobꞌ ayko iskꞌubꞌal yebꞌ yinh istorrehal.
17 Chiyalni Komam: Chiwakojan anma yinh isyaꞌtajil; hakaꞌ anma mach chu yilni,
hakxa tuꞌ chu yekꞌi, yuto yako anma ismul wetan, hanin Yahawilintiꞌan.
Chimalikꞌo ischikꞌil anma hakaꞌ pojoj,
haxa isnimanil chiꞌah tennoj hakaꞌ istzaꞌ no noqꞌ,» xhi Komam.
18 Haꞌ isplata anma yebꞌ chꞌen oro,
machi kolcha yinh istzꞌayikal bꞌay chayo Komam ishowal yibꞌanh anma,
yuto haꞌ isqꞌaqꞌal ishowal Komam chisnhusto sunil tzet ay sat txꞌo txꞌotxꞌ.
Yuto yinh kaw isyelal chistanhtzelo Komam anma ay yul sat yibꞌanhqꞌinal tiꞌ yinhnhechꞌan hunep.