6. ISTXAH YAꞌ HABACUC
(3:1-19)
3
Huneꞌ tiꞌ istxah yaꞌ Habacuc, ischejabꞌ Komam Dios, lahan isnuqꞌal yebꞌ hunteqꞌan bꞌit chiyij Sigionot:a2 «¡Mam Wahawil,
hayet wabꞌenan sunil tzet xahawatxꞌe kaw kꞌaykanilo inkꞌulan.
Mam Wahawil yubꞌojabꞌ hunteqꞌan tiꞌ yulbꞌal hunteqꞌan tiempo tiꞌ,
hakaꞌ tzet watxꞌebꞌil hawu yet payat; aqꞌ ohtanhelaxo yulbꞌal huneꞌ tiempohal tiꞌ.
Hayet chawanayo hahowal, machojabꞌ chabꞌej istzꞌay hakꞌul!
3 Chitit Komam Dios bꞌey Temán, Komam machi nino istxꞌojal yinh, chitit bꞌey witz Parán.b
»Nohilo yul satkanh yu isqꞌaqꞌal yip Komam,
haxa sunil sat txꞌo txꞌotxꞌ tiꞌ alaxiko ismay Komam.
4 Kaw chitzejla isqꞌaqꞌal Komam hakaꞌ issajilqꞌinal;
chiꞌelti jepla yoj isqꞌaqꞌal kꞌuh yul isqꞌabꞌ,
haꞌ xin chiyenilo yip Komam kꞌuwan yul isqꞌabꞌ.
5 Haꞌ sata Komam bꞌabꞌel isyaꞌtajil chiꞌaqꞌni kamikal,
haxa yinta yoj Komam xin, chiꞌelti tzaqꞌaqꞌ kaj txaltxonhe qꞌaꞌ yinh.
6 Chꞌahwano Komam kat ismalen txꞌo txꞌotxꞌ.
Hayet chitꞌanhxiko Komam yinh ej konhobꞌ kat isxiwkanh anma sata Komam.
Haꞌ xin hunteqꞌan witz kaw payattaxa chipohtoj,
haxa hunteqꞌan wonhan kaw payattaxapaxoj chiꞌaywuynahi;
yajaꞌ wal isbꞌeh Komam xin, aynhetikꞌa yinh sunilbꞌal ej tiempo.
7 Wilnihan anma ay bꞌey Cusán kaw ayko yinh isyaꞌtajil;
haxa anma ay bꞌey txꞌotxꞌ Madián kaw chikꞌuykꞌun yu xiwkilal.
8 Mam Wahawil, ¿maxawiti hahowal yinh ej haꞌ nimeta haꞌ chꞌekꞌ yojomal?
¿Kaw lemanti maxawil yu hahowal yinh haꞌ mar,
yet ayachato yibꞌanh hacheh yebꞌ hacarruaje chiqꞌoji yinh howal?
9 Ayxako halitꞌ yul haqꞌabꞌ, haxa isbꞌaqꞌ halitꞌ tuꞌ xin kaw tꞌinhanxa yehi.
Haꞌ tzet hawalilto yibꞌanh hunun majan anma,
kaw tꞌinhan yijni isbꞌa.
Hawako ishatilal txꞌo txꞌotxꞌ yu ha haꞌ.
10 Hayet kach yilni ej witz isxiwkanh,
istit haꞌ nime yaxnhabꞌ satkanh, yel yaw haꞌ mar kaw nahat yich;
kaw xin nahat ah haꞌ.
11 Haꞌ tzꞌayik yebꞌ ixahaw,
ok linhno yul yehobꞌal yet yilni isjepla yekꞌ isbꞌaqꞌ halitꞌ yebꞌ isjopla isqꞌaqꞌal halanza.
12 Yu sunil hahowal kaxhekꞌ yibꞌanh txꞌo txꞌotxꞌ,
haxanhobꞌtanhenpaxikꞌoj ej nimeta konhobꞌ yinh sunil hahowal.
13 Kach tit yu hakolwa yinh hakonhobꞌ yebꞌ yu hakolwa yinh yaꞌ rey sikꞌbꞌiliko hawu.
Xahawuchkꞌato iswiꞌ yatut ebꞌnaj txꞌojnhetikꞌa tzet chiswatxꞌe,
hawaqꞌni ixtanhwo chꞌen chꞌen bꞌay ayayo xeꞌ iskonhobꞌ ebꞌnaj.
14 Haꞌtikꞌa islitꞌ issoldado ebꞌnaj haꞌ hawaqꞌbꞌalnhe yinh iswiꞌ ebꞌnaj;
yuto tit lemna ebꞌnaj jinhanh hakaꞌ nime jaqꞌeqꞌ, yunhe kosajlemitojanh,
kaw xin chitzala ebꞌnaj hakaꞌ mak chinani ismaqꞌnikamo hunu anma mebꞌaꞌ yinh ewantaj.
15 Kaxhekꞌ yibꞌanh haꞌ mar yebꞌ hacheh,
yibꞌanh ha haꞌ leyantoj, isbꞌile isbꞌa, yahkano ishujuyal.
16 Hayet wabꞌenan sunil hunteqꞌan tuꞌ, isxiwkanh inkꞌulan,
yet wabꞌen tuꞌan isbꞌilikanh xaj intiꞌan;
isbꞌuychakanh sunil inbꞌajilan, ispaxilo wipan.
Yajaꞌ xin yinh sunil inkꞌulan chiwechmahan istzꞌayikal isyaꞌtajil chihul yibꞌanh huneꞌ konhobꞌ chiꞌaniko howal jinhanh.
17 Waxanhka machi xumakli teꞌ higuera yebꞌ mach chaqꞌ sat teꞌ uva,
yebꞌ waxanhka mach chisatnipaxo teꞌ olivo yebꞌ mach chaqꞌpaxo sat tzꞌunubꞌ,
yebꞌ waxanhka chitanhilo sunil noꞌ meꞌ, hak tuꞌ xin matxa istzaꞌ noꞌ chikutxi,
yebꞌ xin matxapaxo noꞌ wakax yul peyabꞌ.
18 Yajaꞌ wal hanintiꞌan chiwaqꞌ tzalaho inkꞌulan yinh Komam Jahawil,
kat inbꞌitnhenan Komam Dios inkolomalan.
19 Haꞌ Komam, Wahawilan, haꞌ chiꞌaqꞌni wipan.
Haꞌ Komam chiꞌaqꞌni ishelanil wojan wekꞌan hakaꞌ noꞌ miꞌe sajche, chinyinikꞌojan bꞌay nahat yekanh, kat inkolchakanojan.