NAHÚM
1. CHAYO KOMAM DIOS ISHOWAL YIBꞌANH KONHOBꞌ NÍNIVE
(1:1-14)
1
Hal-laxkano yinh tzet chihul yibꞌanh konhobꞌ Nínive yu Komam Dios, yinh tzet yelax tet yaꞌ Nahúm, yaꞌ ay bꞌey konhobꞌ Elcos.a Yalni yaꞌ Nahúm:2 «Komam Jahawil, kaw Dios, chitit ishowal Komam,
chaqꞌni ispaj tet mak mach chiyijen tzet chala.
Komam Jahawil chaqꞌ isyaꞌtajil ispajo tet mak chiwatxꞌen istxꞌojal,
kaw chitit ishowal Komam, chitak iskꞌul;
chaqꞌni ispaj tet mak ayko ishowal yinh Komam.
3 Komam Jahawil, mach anheho chitit ishowal,
kaw xin aykano yip Komam.
Machi xin chꞌekꞌto yanayo Komam isyaꞌtajil yibꞌanh mak chako ismul.
Komam Jahawil chibꞌelwi xol jaqꞌeqꞌ nhabꞌ, haꞌ xin moyan, ispojojal yoj Komam yehi.
4 Hayet chalni Komam ta chitajkanh haꞌ mar, kat istajkanh haꞌ;
kat xin istanhkanh ha haꞌ chiꞌekꞌ yojomal.
Haꞌ telaj ay bꞌey Basán yebꞌ bꞌey wonhan Carmelo chitajayoj,
kat istajpaxilo isxumakil telaj ay bꞌey txꞌotxꞌ Líbano.
5 Chibꞌilikanh sunil ej witz sata Komam, haxa wonhan xin chiꞌulikanh.
Hayet chilni txꞌo txꞌotxꞌ Komam, kat isbꞌilikanh txꞌotxꞌ,
yebꞌ sunil yul sat yibꞌanhqꞌinal tiꞌ yebꞌ anma ay sat txꞌotxꞌ.
6 ¿Mak hunu tiꞌ chitecha ishowal Komam Dios yu?
¿Mak hunu tiꞌ chikan linhnoj yet chitit ishowal Komam?
Haꞌ ishowal Komam chito lebꞌo hakaꞌ qꞌa qꞌaꞌ,
kat xin isqꞌaxpoto chꞌen nime chꞌen sata Komam.
7 Komam Jahawil kaw kꞌulkanoj, haꞌ Komam chꞌaqꞌni jip yet chul isyaꞌilal jinh,
chikolwa Komam yinh mak chikawxi iskꞌul yinh.
8 Hakaꞌ haꞌ nime elomaꞌ sunil chiyijtoj,
hak tuꞌ chu istanhtzenilo Komam ebꞌnaj ayko ishowal yinh.
Haꞌ qꞌejholo chitokano yibꞌanh ebꞌnaj chichiwa iskꞌul yinh Komam.
9 ¿Tzet chu hetxumnilo yinh Komam Jahawil?
¡Wal xin chistanhtzelo Komam ebꞌnaj ayko ishowal yinh hunelnhe,
hunelchꞌan chispajtze Komam, mach kayeloj!
10 Wal xin lahan ebꞌnaj tuꞌ hakaꞌ teꞌ txꞌix kaw pim isbꞌeqꞌni isbꞌa isqꞌabꞌ,
yebꞌ kamnalo isnabꞌal yu teꞌ ukꞌe,
chitanhtzelaxilo ebꞌnaj hakaꞌ istzꞌato xajtelaj kaw tajin.
11 Tawinh Nínive elti huneꞌ mak txumni iswatxꞌen istxꞌojal yinh Komam Jahawil,
huneꞌ naj ijbꞌalom kaw txꞌojkanoj.b
12 Hak tiꞌ chiyute yalni Komam Jahawil tet iskonhobꞌ:
“Waxanhka kaw ay yip ebꞌnaj asirio, yebꞌ kaw aykanh isbꞌisil ebꞌnaj, yajaꞌ chitanhtzelaxkanilo ebꞌnaj.
Kaw kexwaqꞌ ekꞌo yaꞌan, yajaꞌ xin matxa chexwaqꞌ ekꞌo yaꞌan.
13 Haꞌ tinanh xin chinqꞌahtojan teꞌ yugo ayko yibꞌanh henuqꞌ,
kat inlinhnitojan chꞌen cadena kꞌalbꞌanhe hex,” xhi Komam.
14 Yajaꞌ wal hach tiꞌ isreyal Nínive, haꞌ kaw Komam chalni hakaꞌ tiꞌ:
Matxa hawikꞌal bꞌay chaxhnalaxtij.
Yul yatut hatioxh chintanhtzelojan hunteqꞌan echele yebꞌ tioxh watxꞌebꞌil hawu.
Haꞌ bꞌey tuꞌ xin chaxhinmujan, yuto kaw yahbꞌetaj hach.»
2. CHAL-LAXI TATO CHITANHTZELAXILO KONHOBꞌ NÍNIVE
(1:15–2:12)
15 «¡Ilwekꞌanabꞌi yinh iswiꞌ witz! Yuto chul naj iqꞌnhe tzotiꞌ kꞌul, yebꞌ chalnikꞌo aqꞌankꞌulal.
Konhobꞌ Judá ekꞌtzewe heqꞌinh kat xin heyijen tzet heyalte tet Komam Dios,
yuto matxa bꞌaqꞌinhal chul naj txꞌoj teyinh chexinilo sat hetxꞌotxꞌ,
yuto xatanhtzelaxkanilo naj yinh hunelnhe.