2
»¡Hex ah konhobꞌ Nínive,chꞌapni teyinh mak chextanhtzeniloj!
¡Ahojabꞌto ebꞌnaj hetanhemal yibꞌanh bꞌay nahat yekanh!
¡Aweko istanhemalpaxo ej bꞌeh! ¡Aweko iskꞌalil heyiktaj!
¡Kutxbꞌaweti heyip!
2 Yuto Komam Jahawil chaqꞌ meltzoho yip konhobꞌ Jacob yebꞌ konhobꞌ Israel hunelxa,
yuto yet yalanhtokanoj hul ebꞌnaj ayko ishowal yinh,
yinito ebꞌnaj sunil tzet aya; lahan yutekano ebꞌnaj hakaꞌ teꞌ yoj uva woqꞌlaxilo iswol.a
3 Haꞌ yescudo ebꞌnaj yet howal, kaj txaltxonhe qꞌaꞌ yinh,
haxa xil isqꞌap ebꞌnaj soldado kajpaxo jilni.
Haxa iscarruaje ebꞌnaj chitzejtzoni hakaꞌ tzejtah ayko qꞌaꞌ yinh.
Matxa chislinhbꞌa isbꞌa ischeh ebꞌnaj isto yinh bꞌel.
4 Chꞌen carruaje yet howal, chꞌapni lemna chꞌen bꞌey yul txonhbꞌal,
xanhe chibꞌili yekꞌ chꞌen yulaj bꞌeh,
lahan jilni chꞌen hakaꞌ tzejtah ayko qꞌaꞌ yinh;
hakaꞌ isjepla kꞌuh, hak tuꞌ isyinh anhehal yekꞌ chꞌen.
5 Chawte naj isreyal Nínive ebꞌnaj ischejabꞌ,
yajaꞌ toxanhe chilekta ebꞌnaj yinh hunun istohi,
chislahniko ebꞌnaj isto yinh anhe sat chꞌen kꞌubꞌ,
chiswatxꞌen ebꞌnaj bꞌay chiskol isbꞌa.
6 Haꞌ ispultahil haꞌ nime haꞌ chihajchahi,
kat xin yetalaxkanto ispalacio naj rey yu haꞌ.
7 Haxa ix reina chitzabꞌlaxayo ix, kat yilaxto preso,
tzujan xin ebꞌix ischejabꞌ ix yintaj;
chixin qꞌajwi ebꞌix hakaꞌ noꞌ kuwis,
kat xin istinhni ebꞌix istxam iskꞌul.
8 Hakaꞌ hunu tanque chiꞌelti ha haꞌ yul,
hak tuꞌ chu yelkanh ebꞌnaj ah Nínive,
chixin awi anma tet ebꞌnaj, chalni: “¡Okanhwe linhnoj, linhbꞌawe hebꞌa!” xhi.
Yajaꞌ machi mak chislinhbꞌa isbꞌa.
9 Chihal-lax tet ebꞌnaj chichiwa iskꞌul yinh konhobꞌ Nínive:
“¡Iwelti chꞌen plata! ¡Iwelti chꞌen oro!
¡Yuto kaw ay qꞌalomal, machi bꞌaqꞌinhal xin chilahwi,
ay tzijxanhe tzet ye tuꞌ nanxa islow jilni, yebꞌ kaw ochebꞌil! xhi.
10 Konhobꞌ Nínive matxa anma yul,
yebꞌ uchkꞌabꞌilxatoj, yebꞌ tanhtzebꞌilxaloj;
chipáxilo yip yanma anma, kat xin isbꞌilikanh iswitxꞌiꞌ,
kat xin yabꞌen isyaꞌil yul iskꞌul, sajpaqꞌponhe chiꞌeliko sat yu xiwkilal.
11 ¿Tzet elkaniko isnhachꞌen noꞌ bꞌalam yebꞌ yatut noꞌ nixhte yunin bꞌalam,
bꞌay chixew noꞌ icham bꞌalam yebꞌ noꞌ ismam bꞌalam,
yebꞌ noꞌ nixhte yunin bꞌalam? Yalanhtokanoj machi hunu mak xin chixubꞌten noꞌ.
12 Haꞌ noꞌ bꞌalam tuꞌ, tzetkꞌa no noqꞌ chistzabꞌayo noꞌ yu iskꞌuxni nixhte yunin noꞌ.
Kat istzilnito noꞌ, kat iskꞌuxni noꞌ miꞌe bꞌalam,
kat isnohilo yul isnhachꞌen noꞌ yu chibꞌe.» b
3. CHITANHTZELAXKANILO KONHOBꞌ NÍNIVE HUNELNHE
(2:13–3:19)
13 «Haꞌ Komam Jahawil, kaw aykano yip, chalni hakaꞌ tiꞌ:
“¡Ay hinan lah, intoxahan tawinh;
chinnhustojan hacarruaje, isnhubꞌalxanhe chiꞌahi!
Chinpotxꞌkamojan hawuninal yu chꞌen espada.
Chintanhtzelojan sunil tzet elqꞌabꞌil hawu ay sat hatxꞌotxꞌ,
matxa xin chiꞌabꞌelax yul isnuqꞌ ebꞌnaj hachejabꞌ,” xhi Komam.