MIQUEAS
1. CHIꞌALAXAYO ISYAꞌTAJIL YIBꞌANH ISRAEL YEBꞌ YIBꞌANH JUDÁ YU KOMAM DIOS
(1:1–3:12)
Ok oqꞌil yibꞌanh Samaria yebꞌ yibꞌanh Jerusalén
1
Hul Istzotiꞌ Komam Jahawil tet yaꞌ Miqueas, yaꞌ ay bꞌey konhobꞌ Moreset, yulbꞌal tiempo bꞌay ekꞌlena yaꞌ Jotam, yaꞌ Acaz, yebꞌ yaꞌ Ezequías, ebꞌyaꞌ isreyal Judá; yilni yaꞌ tzet chul yibꞌanh konhobꞌ Samaria yebꞌ yibꞌanh konhobꞌ Jerusalén.a2 Yalni yaꞌ Miqueas hakaꞌ tiꞌ: «Abꞌewe hex konhobꞌ hex tiꞌ,
hajbꞌawe hetxikin hex ay sat txꞌo txꞌotxꞌ.
Haꞌ Komam Jahawil, hata bꞌey yatut kaw sajkanoj,
haꞌ bꞌey tuꞌ chaqꞌ isbꞌa Komam teyinh, chalnilo hetxꞌojal.
3 Wal xin chꞌel Komam yul yehobꞌal,
kat yuli, kat isbꞌelwi yibꞌanh bꞌay nahat yekanh.b
4 Chixin ulikanh hunteqꞌan witz yalanh yoj Komam,
hakaꞌ noꞌ ixkabꞌ chiꞌulito istiꞌ qꞌa qꞌaꞌ;
haxa txꞌotxꞌ akꞌal chihatto txꞌotxꞌ, hakaꞌ xabꞌ bꞌay chꞌekꞌ yojomal ha haꞌ.
5 Hak tuꞌ chꞌeliko yu ismanhkꞌomal yikꞌal yaꞌ Jacob yebꞌ yu ismul ebꞌnaj Israel.
¿Bꞌaytuꞌwal ok ebꞌnaj Israel manhkꞌomal?
¿tom maxhtaj bꞌey konhobꞌ Samaria?
¿Bꞌaytuꞌwal xin yiyo isbꞌa ebꞌnaj Judá tet tioxh?
¿tom maxhtaj bꞌey Jerusalén?» xhi yaꞌ Miqueas.c
6 Yu tuꞌ xin chal Komam hakaꞌ tiꞌ: «Chiwuchkꞌatojan konhobꞌ Samaria,
chiꞌetalaxkanto sunil, chiꞌokkano bꞌay chitzꞌunlax teꞌ uva,
chintirnitojan sat akꞌal chꞌen chꞌen ayko yinh konhobꞌ tuꞌ,
kat yixtanhwati xeꞌ huneꞌ konhobꞌ tuꞌ.
7 Sunil istioxh kokꞌ chiwutekantojan,
haxa hunteqꞌan sabꞌil tet ebꞌix txꞌoj ye iswiꞌ chinnhuskantojan.
Chintanhtzelojan sunil ej istioxh tuꞌ,
yuto loqꞌbꞌil yu chꞌen melyu aqꞌlax yinh ebꞌix ix txꞌoj ye iswiꞌ.
Yajaꞌ hunteqꞌan tuꞌ chikanpaxkano yinh melyuhal aqꞌlax yinh ebꞌix ix txꞌoj ye iswiꞌ,» xhi Komam Jahawil.
8 «Yuxin kaw bꞌiskꞌulal wehan, kat xin woqꞌan, tꞌilan wojan chinekꞌan, machipaxo xil inqꞌapan aykoj,
chixin elwawan hakaꞌ noꞌ nixhte oj, kat woqꞌan hakaꞌ noꞌ avestruz.
9 Yuto haꞌ islahwilal konhobꞌ Samaria kaw ekꞌnaxa isyaꞌil, matxa chiꞌanhchahi,
kaw apni lahwilal yinh konhobꞌ Judá,
yapnipaxo yul ispultahil inkonhobꞌan, haꞌ ton Jerusalén.
10 Mach chexto heyalaꞌ bꞌey konhobꞌ Gat, matxa kaw chexoqꞌi;
wal xin ekꞌanhwe bꞌalbꞌon xol pojoj bꞌey konhobꞌ Bet-le-afra.
11 ¡Anma ay yul konhobꞌ Safir, elojabꞌi,
tꞌilan chitohi kat istopaxo yinh txꞌixwilal!
¡Haxa anma ay yul konhobꞌ Zaanán, mach chiꞌeltoj!
¡Kaw ay oqꞌil bꞌey konhobꞌ Betesel! Matxa xin mak chikolwa yinh.
12 Anma ay bꞌey yul konhobꞌ Marot, haꞌ iskꞌulal yoche ischabꞌ,
yajaꞌ haꞌ isyaꞌtajil ischah yu Komam Jahawil,
masanta apni yul ispultahil konhobꞌ Jerusalén.
13 Hex ay bꞌey konhobꞌ Laquis, aweko chꞌen carruaje yinta noꞌ cheh kaw helan yaqꞌni anhe,
yuto haꞌ bꞌey tuꞌ ichiko yaniko ismul konhobꞌ Sión,
yuto haꞌ bꞌey tuꞌ ok anma Israel manhkꞌomal.
14 Yuxin hunelnhe chextaqꞌlikano tet konhobꞌ Moreset-gat.
Haꞌ konhobꞌ Aczib chꞌok latzꞌabꞌil yinh ebꞌyaꞌ isreyal Israel.»
15 Chalni Komam hakaꞌ tiꞌ: «Hex ay hex bꞌey yul konhobꞌ Maresa,
chiwatojan huneꞌ mak chexinilo yul hekonhobꞌ.
Ebꞌnaj kaw ay yip xol ebꞌnaj Israel, chꞌelkanh ebꞌnaj kat yebꞌan isbꞌa yul chꞌen nhachꞌen bꞌey Adulam.
16 Hex ah Judá, hokꞌwelo xil hewiꞌ,
chekꞌupniloj yu bꞌiskꞌulal yinh heyuninal kaw ochebꞌil heyu,
kanojabꞌ tꞌilno hewiꞌ hakaꞌ noꞌ xulem yuto chiꞌilaxilo heyuninal teyet,
kat yilaxto preso,» xhi Komam.