—Mam Jahawil, ¿tom maxhtaj huneꞌ tuꞌ walan yet ayinan bꞌey txꞌotxꞌ inkonhobꞌan? Yuxin yinh anhe kintohan webꞌaꞌ hinbꞌahan bꞌey Tarsis, yuto wohtajan tato kaw hunkuentakano hach, yebꞌ ay hanimankꞌulal, mach peto chitit hahowal, wal xin kaw nimankano iskꞌulchꞌanil hakꞌul; chꞌekꞌayo xin hawanayo isyaꞌtajil halbꞌilxa hawu. 3 Yuxin tinanh mam Jahawil chinqꞌanan tawet chawilo inkawilan, yuto ekꞌbꞌalto kꞌul chinkaman sata itzitz hinan, xhi yaꞌ Jonás.

4 Yalni Komam Jahawil tet yaꞌ:

—¿Tom kꞌul chawabꞌe yet chitit hahowal? xhi Komam.

5 Yelto yaꞌ Jonás yul konhobꞌ tuꞌ, yehayo yaꞌ yinh yetkꞌulal bꞌay chiꞌahilo tzꞌayik yinh konhobꞌ tuꞌ, iswatxꞌen yaꞌ huneꞌ lexhpat, yay tzꞌonhno yaꞌ yalanh yenhel teꞌ, yu yilni yaꞌ tzet chꞌeliko konhobꞌ tuꞌ. 6 Wal Komam Jahawil xin, yaqꞌ chꞌibꞌo huneꞌ teꞌ calabacera yibꞌanh yaꞌ Jonás, yu yok teꞌ yenhelo iswiꞌ yaꞌ, hak tuꞌ xin chiꞌaqꞌlo iskꞌul yaꞌ, kaw xin tzalakanh iskꞌul yaꞌ Jonás yinh teꞌ calabacera tuꞌ. 7 Haxa yet issajbꞌilo yinh hunxa tzꞌayik yanito Komam huneꞌ noꞌ tzojoy yinh teꞌ, yok noꞌ iskꞌuxno teꞌ, istajayo teꞌ. 8 Haxa yet yahilo tzꞌayik xin, yaniti Komam Dios huneꞌ jaqꞌeqꞌ kaw chixobꞌxoni, kaw tzꞌato iswiꞌ yaꞌ Jonás yu qꞌaꞌ, ispaxilo yip yaꞌ, kaw xin yoche yaꞌ iskami. Yalni yaꞌ hakaꞌ tiꞌ:

—Ekꞌbꞌalto kꞌul chinkaman sata itzitz hinan, xhi yaꞌ.

9 Yalni Komam Dios tet yaꞌ Jonás:

—Kaw chitit hahowal yu matajilo teꞌ calabacera, xhi Komam. Istaqꞌwi yaꞌ Jonás, yalni yaꞌ:

—Kaw chitit inhowalan, masanto chinelan yul sat yibꞌanhqꞌinal tiꞌ, xhi yaꞌ.

10 Yalni Komam Jahawil:

—Kaw chitzꞌay hakꞌul yinh huneꞌ teꞌ calabacera bꞌay maxhtaj hach kaxhmunlahi, maxhtaj hachpaxo hawaqꞌ chꞌibꞌoj, yulbꞌalnhe huneꞌ aqꞌbꞌal pitzkꞌa teꞌ, yulbꞌalnhe huneꞌ tzꞌayik tajpaxayo teꞌ. 11 ¿Tom xin mach chitzꞌay inkꞌulan yinh konhobꞌ Nínive, huneꞌ niman konhobꞌ bꞌay ay ekꞌbꞌal 120 mil unin maxhto isnabꞌal; mach yohtajoj bꞌaytet iswatxꞌqꞌabꞌ yebꞌ bꞌaytet ismekqꞌabꞌ, yebꞌ xin kaw hantanhekano no noqꞌ? xhi Komam.^a