3 Yahwano yaꞌ Jonás, isto yaꞌ bꞌey konhobꞌ Nínive, hakaꞌtikꞌa yu yalni Komam Jahawil tet yaꞌ. Konhobꞌ Nínive tuꞌ, kaw nimajalkanoj, yuxin oxebꞌ tzꞌayik chibꞌeynhelaxi. 4 Istzabꞌniko yaꞌ Jonás yokto yul konhobꞌ tuꞌ. Sunilbꞌal tzꞌayik xin bꞌelwikꞌo yaꞌ, chalnikꞌo yaꞌ istzotiꞌ Komam hakaꞌ tiꞌ: «Yinh 40 (kawinaj) tzꞌayik, konhobꞌ Nínive tiꞌ, chitanhtzelaxiloj,» xhi yaꞌ.

5 Anma ay bꞌey Nínive tuꞌ, yayto yul yanma yinh tzet yal Komam Dios; istaqꞌweniko yibꞌanh ta chꞌok yaqꞌleꞌ wahil, yaniko anma xilqꞌape qꞌaqꞌiꞌ yinh,^a ichiti yinh ichamta anma masanta yinh nixhte unin.^b 6 Hayet yapni isqꞌumal tet naj isreyal konhobꞌ Nínive tuꞌ, yahwano naj yul istzꞌonhobꞌal, yinilo naj xil isqꞌap, yaniko naj xilqꞌape qꞌaqꞌiꞌ yinh, yay tzꞌonhno naj xol tanh. 7 Lahwi tuꞌ, ischejni naj rey yebꞌ ebꞌnaj chimunla yinta naj yal-laxikꞌo huneꞌ chejbꞌanile hakaꞌ tiꞌ: «Sunil anma yebꞌpaxo ej no noqꞌ, noꞌ wakax yebꞌ noꞌ meꞌ, machi aqꞌlax tzet chislo, machi aqꞌlaxpaxo ha haꞌ yukꞌuꞌ. 8 Yaqꞌabꞌiko anma yebꞌ no noqꞌ xilqꞌape qꞌaqꞌiꞌ yet bꞌiskꞌulal, kat xin istxahli anma tet Komam Dios yinh sunil yip, kat isbꞌejnikano istxꞌojal chiswatxꞌe, yebꞌ matxa chaqꞌle howal, yebꞌ matxa chismaqꞌ yet anmahil. 9 Hak tuꞌ xin kꞌuxantaxka yok tukno Komam kat ishelni isnabꞌal, kat xin yekꞌayo isqꞌaqꞌal ishowal Komam jinh; hak tuꞌ xin mach chonhtanhtzelaxiloj,» xhi naj rey tet anma.

10 Hayet yilni Komam Dios ta isbꞌejkano anma ah Nínive iswatxꞌen istxꞌojal, ishelni Komam istxumni yinh isyaꞌtajil yala ta chati yibꞌanh anma, matxa xin iswatxꞌe Komam huneꞌ tuꞌ.