2
Wal yaꞌ Jonás tuꞌ ok yaꞌ txahlo tet Komam Jahawil, isDiosal, yet ayayto yaꞌ yul iskꞌul noꞌ kay. 2 Yalni yaꞌ:«Hayet ayinikojan yinh isyaꞌtajil intxahlihan tet Komam Jahawil,
yabꞌen Komam intxahan.
Hata bꞌey yich kambꞌal kintxahlihan, hawabꞌen tzet walan.
3 Kinhawaytojan bꞌay kaw nahat yich, xolaj haꞌ mar.
Kinhapichayojan yu haꞌ. Ha haꞌ ekꞌ jobꞌla hawu, ekꞌto haꞌ wibꞌanhan.
4 Walnihan hakaꞌ tiꞌ:
“Chinhawikanilojan yinh hasat; yajaꞌ xin chito wilaꞌan hawatut kaw sajkanoj,” kinchihan.
5 Kaw nohkaniko ha haꞌ winhan sikꞌlebꞌil,
kinishoynayojan xabꞌ, isbꞌeqꞌniko isbꞌa teꞌ alga yinh xil inwiꞌan.
6 Kinayapnojan yichla isxeꞌal hunteqꞌan witz,
kinismajchenkanayojan txꞌo txꞌotxꞌ yinh hunelnhe.
Yajaꞌ hach tiꞌ Mam Wahawil, inDiosalan kinhawihtijan yul kambꞌal.
7 Hayet matxa nino yip wanmahan,
kach innanitijan Mam Wahawil yapni intxahan tasataj bꞌay ay hawatut kaw sajkanoj.
8 Haꞌ ebꞌnaj chiꞌoktzujno yinta tioxh,
matxa chisyije ebꞌnaj tawet.
9 Yajaꞌ wal hinan chachinbꞌitnhehan, chiwaltenan xahanbꞌal tawet.
Chinyijenan tzet xawaltehan tawet.
¡Haꞌ kolbꞌanile, tet Komam Jahawil chitita!» xhi yaꞌ Jonás.
10 Lahwi tuꞌ, ischejni Komam Jahawil noꞌ niman kay, yahilo noꞌ isxayenoti yaꞌ Jonás sat txꞌotxꞌ.