JONÁS
1. ISMANHKꞌO YAꞌ JONÁS YINH TZET YAL KOMAM DIOS
(1:1-16)
1
Yal Komam Jahawil, istzotiꞌ tet yaꞌ Jonás, yaꞌ iskꞌahol yaꞌ Amitai, yalni Komam hakaꞌ tiꞌ: 2 «Ahanhwanoj kat hato bꞌey Nínive, huneꞌ konhobꞌ kaw nimajal, kat hawalnikꞌoj ta chintanhtzelojan; yuto sunil istxꞌojal xaꞌiswatxꞌe, xaꞌahilo yinh insatan,» xhi Komam.a3 Wal yaꞌ Jonás, ahwano yaꞌ, yajaꞌ yu yebꞌan isbꞌa sata Komam Jahawil yuxin istxum yaꞌ isto yebꞌano isbꞌa bꞌey konhobꞌ Tarsis, yayapno yaꞌ bꞌey Jope, haꞌ bꞌey tuꞌ xin ilcha huneꞌ teꞌ barco yu yaꞌ, istoxa teꞌ bꞌey konhobꞌ Tarsis; istohlan yaꞌ ispasaje, yokto yaꞌ yul teꞌ isto yaꞌ yinta ebꞌnaj chito bꞌey Tarsis, yunhe ishitzilo yaꞌ bꞌay kaw nahat yinh sat Komam Jahawil. 4 Wal Komam Jahawil yati huneꞌ niman jaqꞌeqꞌ yibꞌanh haꞌ mar, istzabꞌniko yekꞌ huneꞌ niman jaqꞌeqꞌ nhabꞌ yibꞌanh haꞌ, istxumni ebꞌnaj ta kabꞌ chꞌayiko teꞌ barco isqꞌahtoj. 5 Wal ebꞌnaj chimunlakto yul teꞌ barco tuꞌ, kaw xiwkanh ebꞌnaj, yok hunun ebꞌnaj txahlo tet istioxh. Lahwi tuꞌ yok ebꞌnaj isqꞌojnayto yijatz teꞌ xol haꞌ mar yunhe ishanhqꞌo teꞌ.
Wal yaꞌ Jonás ayto yaꞌ yul huneꞌ cuarto ayayto yich teꞌ, haꞌ bꞌey tuꞌ xin ok yaꞌ wayo sikꞌlebꞌil. 6 Haxa naj yahaw yinh teꞌ barco tuꞌ, apni iskꞌatanh yaꞌ Jonás, yalni naj tet yaꞌ: «¿Tzet chawu hach ah wayom? Ahanhwanoj, kat hatxahli tet haDios, chalokaxta istzꞌay iskꞌul jinh, hak tuꞌ xin mach chonhkami,» xhi naj.
7 Wal ebꞌnaj chimunla yul teꞌ xin, yal ebꞌnaj tet hunun hakaꞌ tiꞌ:
«Katawej, okojonhwe jilweꞌ jinhbꞌal, hak tuꞌ xin chu johtanheniloj mak yu yuxin mahul huneꞌ isyaꞌtajil tiꞌ jinh,» xhi ebꞌnaj.
—Hal jetanh tzet yinh xin mahul huneꞌ isyaꞌtajil tiꞌ jibꞌanh, ¿tzet hamunil yebꞌ bꞌaytuꞌwal hapeto? ¿Bꞌaytet txꞌotxꞌ bꞌay titnaj hach, yebꞌ tzet konhobꞌal hach? xhi ebꞌnaj.
9 Istaqꞌwi yaꞌ Jonás, yalni hakaꞌ tiꞌ:
—Hebreo hinan, haꞌ tet Komam Jahawil chiwiyo hinbꞌahan, Komam Yahawil yinh satkanh, Komam watxꞌenhe haꞌ mar yebꞌ txꞌo txꞌotxꞌ, xhi yaꞌ.
10 Hunteqꞌan ebꞌnaj tuꞌ, kaw xiwkanh ebꞌnaj, yalni ebꞌnaj tet yaꞌ Jonás:
—¿Tzet yinh xin hak tiꞌ chawute habꞌa? xhi ebꞌnaj.
Yuto yabꞌe ebꞌnaj ta elkanh yaꞌ Jonás tet Komam Jahawil, yuto hak tuꞌ yu yalni yaꞌ Jonás tuꞌ tet ebꞌnaj.
11 Yajaꞌ yu kaw ip islahniko yip ishowal haꞌ, yuxin isqꞌambꞌe ebꞌnaj tet yaꞌ Jonás hakaꞌ tiꞌ:
—¿Tzet wal kach jutenanh, xin wal chituki haꞌ mar isbꞌili? xhi ebꞌnaj.
12 Istaqꞌwi yaꞌ hakaꞌ tiꞌ:
—Tzabꞌenweyojan, kat kinheqꞌojnaytojan xol haꞌ mar tiꞌ, hak tuꞌ xin chistukbꞌa isbꞌa haꞌ; yuto wohtajan tato wuhan yuxin mahul huneꞌ jaqꞌeqꞌ nhabꞌ kaw how tiꞌ teyibꞌanh, xhi yaꞌ.
13 Ebꞌnaj chimunla yul teꞌ, kaw yaqꞌ yanma ebꞌnaj yinito teꞌ barco bꞌay ay txꞌo txꞌotxꞌ, yajaꞌ mach yu ebꞌnaj, yuto haꞌ mar tuꞌ kaw ip islahniko ishowal yip haꞌ yinh ebꞌnaj. 14 Yah yaw ebꞌnaj tet Komam Jahawil, yalni ebꞌnaj: «Mamin, mach chonhhawaqꞌ kamojanh yu iskamikal huneꞌ naj tiꞌ; tajkato xin machi ismul naj mach chawati iskamikal naj jibꞌanhanh, yuto hach tiꞌ Mam chawatxꞌe hakaꞌ tzet chawoche,» xhi ebꞌnaj.b
15 Lahwi tuꞌ, istzabꞌnayo ebꞌnaj yaꞌ Jonás, isqꞌojnayto ebꞌnaj yaꞌ xol haꞌ mar, yinhnhena tuꞌ istukbꞌan isbꞌa haꞌ isbꞌili. 16 Hayet yilni ebꞌnaj huneꞌ tuꞌ, isxiw ebꞌnaj tet Komam Jahawil yalten ebꞌnaj huneꞌ xahanbꞌal tet Komam, yalni ebꞌnaj tet Komam ta chisyije ebꞌnaj tzet chal Komam.
2. TXAHLI YAꞌ JONÁS TET KOMAM DIOS
(1:17–2:10)
17 Yajaꞌ xin saybꞌilxa huneꞌ noꞌ niman kay yu Komam, isbꞌiqꞌnayto noꞌ yaꞌ Jonás. Oxebꞌ xin tzꞌayik yebꞌ oxebꞌ aqꞌbꞌal ayayto yaꞌ Jonás tuꞌ yul iskꞌul noꞌ.c