ABDÍAS
1. CHIꞌILAXAYO TXꞌOTXꞌ EDOM
(1-14)
1
Haꞌ tzet isye Komam Jahawil tet yaꞌ Abdías, yalni Komam hunteqꞌan tiꞌ yinh txꞌotxꞌ konhobꞌ Edom:«Xajabꞌe tzotiꞌ chihal-laxikꞌo yu Komam Jahawil,
xachejlaxto huneꞌ mak chihalnikꞌo tzotiꞌ tuꞌ xolaj ej txꞌotxꞌ konhobꞌ,
chalni hakaꞌ tiꞌ: “¡Ahojonhwewanoj!
Jiqꞌawekanh kobꞌa howal yinh txꞌotxꞌ konhobꞌ Edom,”a xhi.
2 Nichꞌan konhobꞌnhe kach elkaniko wuhan xol hunteqꞌan ej nime konhobꞌ,
kaw chachilaxkanayo sikꞌlebꞌil.
3 Haꞌ loloꞌal ay yul hawanma, haꞌ kach aqꞌni subꞌchahoj;
yul iskꞌul chꞌen nime chꞌen ayach,
kaw nahat yekanokanh bꞌay ayach, chawalni yinh hawanma:
“¿Mak hunu anma chiqꞌoji winhan hinyinayojan sat txꞌotxꞌ?” kachi.
4 Waxanhka kaw nahat chachahkantoj hakaꞌ noꞌ tꞌiw,
chawatxꞌen hawatut bꞌay ay txꞌumel,
haꞌ bꞌey tuꞌ chachinqꞌojaytijan,» xhi Komam Jahawil.
5 Yalnipaxo Komam: «Ta chul ebꞌnaj elqꞌom tawinh yet aqꞌbꞌalil,
mach sunilo tzet ayach chiyito ebꞌnaj;
taka xin chul ebꞌnaj elqꞌom iqꞌolo sat uva,
chito yakano ebꞌnaj hayebꞌo chayan teꞌ.
Wal ebꞌnaj ayko ishowal tawinh, chul ebꞌnaj,
kat yetanto ebꞌnaj sunil.b
6 ¡Sunil tzet ay naj Esaú elqꞌalaxtoj,
ilaxpaxto tzet ye tuꞌ kaw ay istohol ebꞌabꞌil yu naj!
7 Sunil ebꞌnaj tꞌinhbꞌabꞌil hatzotiꞌ yebꞌi kach yaqꞌ subꞌchaho ebꞌnaj,
kach yanikanto ebꞌnaj bꞌay chikachnakan apno txꞌo txꞌotxꞌ;
haxa ebꞌnaj aqꞌankꞌulal haweh yebꞌi kach yaqꞌ aykꞌayo ebꞌnaj;
haxa ebꞌnaj huneꞌnhe chachwaꞌ yebꞌi yayo ebꞌnaj latzꞌabꞌ tasataj.
Wal xin kaw mach itzꞌato iswiꞌ naj Edom.
8 Haꞌ yinh huneꞌ tzꞌayik tuꞌ,
chiwaqꞌkamojan ebꞌnaj ay isnabꞌal ay bꞌey txꞌotxꞌ Edom,
kat winilojan ishelanil ebꞌnaj ay xolaj witz bꞌey istxꞌotxꞌ naj Esaú.c
9 Haꞌ ebꞌnaj yet howal ay yul konhobꞌ Temán, chixiwkanh ebꞌnaj,
kat istanhtzelaxkanilo sunil ebꞌnaj winaj ay bꞌey witz yet naj Esaú.
10 Yu kach bꞌawa yinh hawuxhta Jacob, yuxin chachokkano yinh txꞌixwilal,
kat hatanhtzelaxkanilo yinh hunelnhe.d
11 Hayet yilaxto issoldado Israel preso yu ebꞌnaj nan konhobꞌal,
yebꞌ yet yokto ebꞌnaj nan konhobꞌal yul ispultahil konhobꞌ Jerusalén yebꞌ yet ispohnikanh ebꞌnaj tzet ay yul konhobꞌ,
yilwen issuertehal ebꞌnaj yinh,
haꞌ hun hach ayachiko xol ebꞌnaj,
lahan xin hawute habꞌa yinh konhobꞌ hakaꞌ yu ebꞌnaj tuꞌ.
12 Ayxikꞌa machi kach tzala yinh huneꞌ tzꞌayik hul yinh hawuxhtaj,
huneꞌ tzꞌayik yet yay isyaꞌtajil yibꞌanh.
Ayxikꞌa mach kach tzalahi yinh istzꞌayikal yet yaqꞌlax kamo ebꞌnaj iskꞌahol yaꞌ Judá;
ayxikꞌa mach kach tzebꞌi yinh istzꞌayikal yet yaqꞌlax ekꞌoyaꞌ yanma ebꞌnaj.
13 Ayxikꞌa mach kach okto yul ispultahil inkonhobꞌan yinh istzꞌayikal yet yuchkꞌalaxtoj.
Ayxikꞌa mach kach tzala yinh istxꞌojal hul yinh,
yet istanhtzelaxiloj.
Ayxikꞌa mach kach ok hawelqꞌato tzet ayah yinh istzꞌayikal yet yul isyaꞌtajil yibꞌanh.
14 Ayxikꞌa mach kach ok linhno bꞌay chiskulusnhe isbꞌa bꞌeh yu hapotxꞌnikamo ebꞌnaj chꞌelkanh.
Haxa ebꞌnaj kantokano yinh istzꞌayikal isyaꞌtajil tuꞌ,
ayxikꞌa mach hawako ebꞌnaj yul isqꞌabꞌ ebꞌnaj ayko ishowal yinh.
2. ISTZꞌAYIKAL YET CHANAYO KOMAM JAHAWIL ISYAꞌTAJIL YIBꞌANH EJ KONHOBꞌ
(15-18)
15 »Wal xin kawilxa yeti tzꞌayik bꞌay chayo Komam Jahawil ishowal yibꞌanh nimeta konhobꞌ.
Hakaꞌ hawute habꞌa yinh anma, hak tuꞌ chachutelaxpaxoj, chiꞌaqꞌlax ispaj selel tawet.e
16 Hakaꞌ iskꞌahil inhowalan heyukꞌ bꞌey wonhan wetan yehi,
hak tuꞌ iskꞌahil inhowalan chiꞌaqꞌlax yukꞌuꞌ hunteqꞌan nimeta konhobꞌ txꞌiꞌal el;
chukꞌ ebꞌnaj, kat isbꞌiqꞌnayto yinh anhe,
kat istanhtzelaxiloj hakaꞌto maxhtikꞌa ehikꞌo ebꞌnaj yul sat yibꞌanhqꞌinal tiꞌ.
17 Yajaꞌ bꞌey huneꞌ wonhan wetan yehi, Sión isbꞌi,
ay haywanh mak chikolchahi, kaw sajkanoj.
Wal anma yikꞌal yaꞌ Jacob, chiꞌokpaxo sat istxꞌotxꞌ hunelxa.
18 Anma yikꞌal yaꞌ Jacob, lahan hakaꞌ qꞌa qꞌaꞌ,
haxa anma yikꞌal yaꞌ José, lahan hakaꞌ xaj qꞌaꞌ,
wal anma yikꞌal naj Esaú, lahan hakaꞌ isteꞌal teꞌ chꞌim;
chixin tzꞌakanto teꞌ chꞌim yu qꞌaꞌ, kat istanhkaniloj.
Machi hunu mak xin chikankano yinh yikꞌal naj Esaú,
hanin Yahawilintiꞌan chalni huneꞌ tiꞌ,»f xhi Komam.
3. CHIꞌALAXIKO YIP KONHOBꞌ ISRAEL
(19-21)
19 Yalnipaxo Komam: «Ebꞌnaj Israel ay bꞌey Neguev, chꞌokkano hunteqꞌan txꞌotxꞌ witz yet naj Esaú yu ebꞌnaj; haxa ebꞌnaj Israel ay bꞌey Sefela, chiꞌok istxꞌotxꞌ ebꞌnaj filisteo yu ebꞌnaj, kat yokpaxo txꞌotxꞌ Efraín yebꞌ txꞌotxꞌ Samaria yu ebꞌnaj. Haxa ebꞌnaj Benjamín, chiꞌok txꞌotxꞌ Galaad yu ebꞌnaj. 20 Haxa hunta bꞌulan iskꞌahol ebꞌnaj Israel ilaxto preso, chiꞌokkano istxꞌotxꞌ ebꞌnaj cananeo yu ebꞌnaj masanta bꞌey konhobꞌ Sarepta; haxa ebꞌnaj ah Jerusalén ilaxto preso bꞌey Sefarad chiꞌokkano hunteqꞌan konhobꞌ Neguev yu ebꞌnaj. 21 Chiꞌahapno ebꞌnaj kolwawom bꞌey wonhan Sión, kat yok ebꞌnaj yilno yinh tzet chiꞌeliko anma ay bꞌey hunteqꞌan wonhan yet naj Esaú. ¡Hayet tuꞌ, haninan chiwaqꞌan yahawilal!» xhi Komam.