Machi mak chu yelkanh tet isyaꞌtajil chayo Komam Jahawil
9
Wilan Komam Jahawil, linhankanh yibꞌanh ismexhahil xahanbꞌal, yalni hakaꞌ tiꞌ:«Etato yoyal watutan yinh iswiꞌtaj, kat isbꞌilikanh ispultahil; chamaqꞌnipohoj,
kat yaykꞌay yibꞌanh iswiꞌ sunil anma.
Haꞌ mak chito elkanh chiwaqꞌkamojan yu chꞌen espada;
machi hunu mak chu yelkanh, machi hunu mak chu iskolni isbꞌa.
2 Waxanhka chiswatxꞌe ebꞌnaj holan kaw nahat yich bꞌay ay kamom,
haꞌ bꞌey tuꞌ chiwihtijan ebꞌnaj yu inqꞌabꞌan;
yebꞌ waxanhka chiꞌahto ebꞌnaj yul satkanh, haꞌ bꞌey tuꞌ chiwiytijan ebꞌnaj.
3 Yajaꞌ ta xin chito ebꞌnaj yebꞌaꞌ isbꞌa yinh iswiꞌ witz Carmelo,
haꞌ tuꞌ chintohan insayaꞌan ebꞌnaj kat intzabꞌnayojan ebꞌnaj.
Yajaꞌ waxanhka xin chebꞌato isbꞌa ebꞌnaj wetan, kat isto ebꞌnaj yebꞌano isbꞌa yich haꞌ mar,
haꞌ bꞌey tuꞌ chiwatojan noꞌ labꞌa, kat ischilax ebꞌnaj yu noꞌ.
4 Yajaꞌ ta chibꞌabꞌi ebꞌnaj yu ebꞌnaj ayko ishowal yinh, yu yilaxto ebꞌnaj preso,
haꞌ bꞌay ay ebꞌnaj tuꞌ,
chiwatojan chꞌen espada kat ispotxꞌlaxkamo ebꞌnaj yu chꞌen.
Chinok tꞌanhnojan yinh ebꞌnaj, yajaꞌ yu wanayojan isyaꞌtajil yibꞌanh ebꞌnaj,
maxhtaj yu inwatxꞌenan iskꞌulal yinh ebꞌnaj, xhi Komam.
5 Komam Jahawil, Yahawil yinh sunil, chayo isqꞌabꞌ yibꞌanh txꞌo txꞌotxꞌ,
kat yulikanh txꞌotxꞌ, kaw xin chꞌoqꞌ anma ay sat txꞌotxꞌ.
Chichꞌibꞌkanh txꞌotxꞌ hakaꞌ chu ischꞌibꞌkanh haꞌ haꞌ,
lahwi tuꞌ kat ispaxayo txꞌotxꞌ hakaꞌ haꞌ Nilo ay bꞌey Egipto.
6 Iswatxꞌen Komam bꞌay chiꞌehayo satkanh,
lehanto xin satkanh yibꞌanh txꞌo txꞌotxꞌ yu Komam.
Chiyawte Komam ha haꞌ ay yul haꞌ mar,
kat xin istixhnayo Komam haꞌ yibꞌanh sat txꞌo txꞌotxꞌ; Yahawil isbꞌi Komam.
7 Haꞌ kaw Komam Jahawil chalni hakaꞌ tiꞌ: Hex iskꞌahol Israel,
¿tom mach lahano hex yebꞌ ebꞌnaj iskꞌahol ebꞌnaj ah Etiopía yul insatan?
¿Tom maxhtaj hinan wiltijan anma Israel bꞌey txꞌotxꞌ Egipto?
Haxa ebꞌnaj filisteo, ¿tom maxhtaj inpaxojan wiltijan ebꞌnaj bꞌey txꞌotxꞌ Caftor?
Haxapaxo ebꞌnaj arameo, ¿tom maxhtaj bꞌey Kir wiltijan ebꞌnaj?a
8 Yinh kaw yeli, hanin Yahawilintiꞌan tꞌanhan hinan yinh txꞌotxꞌ konhobꞌ mulum yu wanayojan isyaꞌtajil yibꞌanh.
Chiwilojan yinh hunelnhe sat txꞌo txꞌotxꞌ; yajaꞌ anma yikꞌal yaꞌ Jacob,
mach chintanhtzelojan sunil, hanin Yahawilintiꞌan chiwalan huneꞌ tiꞌ.
9 Haninan chinchejan txayelaxo konhobꞌ Israel xol ej konhobꞌ,
hakaꞌ chu istxayelax ixim sat trigo yul txayibꞌ,
machi xin hunu sat ixim chꞌaykꞌay sat txꞌotxꞌ.
10 Sunil anma mulum ay yul inkonhobꞌan,
chipotxꞌlaxkamo yu chꞌen espada, hunteqꞌan anma chalni hakaꞌ tiꞌ:
“Machi hunteqꞌan tuꞌ chihul jinh, machi xin chonhtzujchapaxo yu istxꞌojal,” xhi anma mulum tuꞌ,» xhi Komam.
5. CHꞌILAXPAXOKANH KONHOBꞌ ISRAEL YINH TZUJANILXA
(9:11-15)
11 Yalnipaxo Komam: «Chihul huneꞌ tzꞌayik bꞌay chinwatxꞌekanhan huneꞌ nha mantiado, yatut yaꞌ David uchkꞌanatoj, chinbꞌujnihan bꞌay holan, chiwinikanhan bꞌaytet aykꞌaynaj, kat inwatxꞌenkanhan nha tuꞌ hakaꞌtikꞌa yet yalanhtokanoj. 12 Hak tuꞌ xin, haꞌ tzet chitokankano yinh txꞌotxꞌ Edom yebꞌ hunteqꞌanxa konhobꞌ, chiꞌokkano yu konhobꞌ Israel, anma chꞌaqꞌni bꞌinaho inbꞌihan,» hanin Yahawilintiꞌan chiwalan huneꞌ tiꞌ.
13 Chalnipaxo Komam Jahawil hakaꞌ tiꞌ: «Yinh kaw yeli chihul hunteqꞌan tzꞌayik yet maxhto chilahwi iskꞌuplaxkanh ixim trigo, ipxa chu istꞌokni ebꞌnaj txꞌo txꞌotxꞌ, maxhto xin chilahwi isyatzꞌlax yal teꞌ uva kat istzꞌunlax hunteqꞌanxa teꞌ. Yinh ej witz yebꞌ yinh ej wonhan kaw chaqꞌkano sat teꞌ uva, lahan hakaꞌ yekꞌ yojomal ha haꞌ. 14 Chiwaqꞌ meltzohojan inkonhobꞌ Israelan bꞌay ilaxto preso, kat iswatxꞌenkanh ebꞌnaj konhobꞌ etaxnatoj, kat yehayo ebꞌnaj bꞌey tuꞌ. Chistzꞌunni ebꞌnaj teꞌ uva, kat yukꞌni ebꞌnaj vino chꞌel yinh teꞌ, kat istzꞌunni ebꞌnaj istzꞌunubꞌ, kat islohni ebꞌnaj sat. 15 Chiwayojan ebꞌnaj sat istxꞌotxꞌ waqꞌan tet, matxa bꞌaqꞌinh xin chiꞌilaxilo ebꞌnaj sat istxꞌotxꞌ tuꞌ,» hanin Yahawil inan, chiwalan huneꞌ tiꞌ, xhi Komam.b