Huneꞌ motx lobꞌehal kaw qꞌan ok yecheloj
8
Isyenipaxo Komam Jahawil huneꞌ tiꞌ wetan: Wilan huneꞌ nichꞌan motx teꞌ lobꞌehal kaw qꞌan. 2 Isqꞌambꞌen Komam wetan:—¿Tzet chawil Amós? xhi.
Intaqꞌwihan:
—Huneꞌ nichꞌan motx teꞌ lobꞌehal kaw qꞌan, kinchihan.
Yalni Komam wetan:
—Mahul islahobꞌal tzꞌayik yibꞌanh inkonhobꞌ Israelan, matxa chiwaqꞌ nimankꞌulalan yinh.
3 Haxa ebꞌnaj bꞌitnom ay yul Watutan, chꞌoqꞌ ebꞌnaj yu bꞌiskꞌulal. Yinh huneꞌ tzꞌayik tuꞌ kaw hantanhekano isnimanil anma kamom, kaw xin tzꞌinan chꞌelkanikoj, kat istirlaxto isnimanil kamom tuꞌ bꞌajxanhetuꞌwalil, hanin Yahawilintiꞌan chiwalan huneꞌ tiꞌ, xhi Komam.
Chitit isyaꞌtajil yibꞌanh anma Israel
4 Yalnipaxo Komam: «Abꞌewe huneꞌ tiꞌ, hex cheyeta anma matzet aya, kat heyaqꞌni tanholo anma mebꞌaꞌ ay sat txꞌo txꞌotxꞌ tiꞌ. 5 Cheyalni hakaꞌ tiꞌ: “¿Bꞌaqꞌinh chiꞌekꞌto qꞌinh yinh unin ixahaw, kat kotxꞌonhni ixim trigo?” kexchi. Cheyalnipaxoj, “¿Bꞌaqꞌinh chꞌekꞌto tzꞌayik xewilal, kat kohajni kꞌunha bꞌay kꞌuwan sat ixim trigo, kat jinilo yaqꞌbꞌil malbꞌal, kat janikanh istohol ixim? Chijaniko leqꞌtiꞌal yu mach tzꞌajano chijute komalbꞌal. 6 Hak tuꞌ xin chikoloqꞌ anma mebꞌaꞌ yinh chꞌen melyu, haxa mak matzet aya, chikoloqꞌ yinh kabꞌebꞌ noꞌ xanhabꞌ, kat kotxonhnipaxto isqꞌal ixim trigo tet anma,” kexchi,» xhi Komam.
7 Yaqꞌ bꞌinaho Komam Jahawil issaqꞌalil yaqꞌ tet yaꞌ Jacob yalni hakaꞌ tiꞌ: «Machi hunu tzet ye tuꞌ tiꞌ iswatxꞌe ebꞌnaj chito nahul wuhan.
8 ¿Machim chiyukxikanh txꞌo txꞌotxꞌ yu sunil hunteqꞌan tiꞌ?
¿Machim xin chꞌok anma ay sat txꞌotxꞌ oqꞌoj?
Chiꞌah sutsun txꞌotxꞌ hakaꞌ chiyu yah ha haꞌ chichꞌibꞌkanh yojomal.
Chꞌah sutsun txꞌotxꞌ, lahwi tuꞌ,
kat ispaxayo hakaꞌ haꞌ Nilo ay bꞌey Egipto,» xhi Komam.
9 Yalnipaxo Komam Jahawil: «Haꞌ yinh huneꞌ tzꞌayik tuꞌ,
matxa chiwaqꞌ mujlojan tzꞌayik yinh chumanil;
chiwayojan qꞌejholo yibꞌanh txꞌo txꞌotxꞌ yet tzꞌayikal.
10 Chinmeltzokojan heqꞌinh yinh oqꞌil; haxa hebꞌit, chinmeltzokojan yinh bꞌiskꞌulal.
Cheyaniko xil heqꞌap yet bꞌiskꞌulal, kat heyinilo sunil xil hewiꞌ.
Sunil mak chꞌoqꞌi, hakaꞌ yoqꞌ hunu mak yinh huneꞌ kꞌitan iskꞌahol chikami,
kaw xin txꞌoj chu hetanhkanoj,» xhi Komam.
11 Yalnipaxo Komam Jahawil: «Yinh kaw yeli chihul tzꞌayik,
bꞌay chiwatijan wahil yibꞌanh anma ay sat txꞌo txꞌotxꞌ tiꞌ.
Yajaꞌ maxhtaj yu wahil iswani ixim pan,
yebꞌ xin maxhtaj tajintiꞌal yu yukꞌni ha haꞌ,
wal xin to yu yabꞌen intzotiꞌan, hanin Yahawilintiꞌan.
12 Haꞌ anma tuꞌ, bꞌatajtuꞌwalxanhe chiꞌekꞌi,
chiꞌichiti bꞌey huneꞌ haꞌ mar masanta bꞌey hunxa haꞌ mar,
chiꞌekꞌpaxo bꞌey norte kat yul yinh yetkꞌulal bꞌay chꞌahilo tzꞌayik,
chꞌekꞌ issayaꞌ istzotiꞌ Komam Jahawil, yajaꞌ matxa chiꞌilcha yu.
13 Haꞌ yinh huneꞌ tiempohal tuꞌ, ebꞌix qꞌopo kaw saqꞌal,
yebꞌ ebꞌnaj tzehtaj, chipáxilo yip yu tajintiꞌal.
14 Haxa mak chaqꞌ bꞌinaho isbꞌi tioxh ay bꞌey Samaria yinh tzet chala, yebꞌ mak chalni:
“Yinh isbꞌi tioxh ay bꞌey Dan,” xhi.
Chalnipaxoj: “Yinh isbꞌi tioxh ay bꞌey Beerseba,” xhi.
Haꞌ anma tuꞌ chiꞌaykꞌayi, matxa xin chꞌahwanoj,» xhi Komam.a