JOEL
1. CHITANHTZELAXILO SUNIL TZꞌUNUBꞌ YU NOꞌ QꞌUL; ISTZꞌAYIKAL KOMAM JAHAWIL
(1:1–2:2a)
Tzotel-laxkano tzet chul yibꞌanh konhobꞌ
1
Hul istzotiꞌ Komam Jahawil tet yaꞌ Joel, iskꞌahol yaꞌ Petuel, yalni Komam hakaꞌ tiꞌ:2 «Hex icham hexxa tiꞌ yahaw yinh konhobꞌ, abꞌewej; yebꞌ xin sunil hex ay hex sat txꞌotxꞌ tiꞌ.
¿Ayxam hunelo cheyil hunteqꞌan tiꞌ yulbꞌal hunteqꞌan tzꞌayik bꞌay ay hex tiꞌ,
maka yilpaxo hemam icham yulbꞌal hunteqꞌan tzꞌayik bꞌay ekꞌi?
3 Haꞌ hunteqꞌan chiyu tiꞌ, cheyalkano tet heyuninal,
kat yalnipaxo heyuninal tuꞌ tet yuninal;
haxa yuninal heyuninal tuꞌ, chalnipaxo tet yuninal chul yinh tzujanilxa.
4 Kanhebꞌ majan noꞌ qꞌul chul kꞌuxnoto tzꞌunubꞌ,
haꞌ tzet mach lahwi yu huneꞌ majan noꞌ, hunxa majan noꞌ kꞌuxnitoj;
chitanhkanilo sunil tzꞌunubꞌ yul konhobꞌ yu noꞌ.a
5 Hex ukꞌum, iwelo hewayanh, kat heyok oqꞌoj,
elojabꞌ heyaw sunil hex cheyukꞌ vino,
yuto xaꞌilaxilo vino yinh hetiꞌ.
6 Yuto mahul hunteqꞌan nimeta majan noꞌ qꞌul kaw ay yip yebꞌ kaw nimankanoj,
machi isbꞌi hanta isbꞌisil, maꞌahapno bꞌey sat intxꞌotxꞌan.
Haꞌ yeh noꞌ, lahan hakaꞌ yeh noꞌ bꞌalam, haxa istxꞌabꞌal hakaꞌpaxo istxꞌabꞌal noꞌ bꞌalam.
7 Isnhulbꞌakano noꞌ teꞌ uva tzꞌunbꞌil wuhan, isqꞌahnikanto noꞌ wiguerahan,
ispatzꞌnikanilo noꞌ istzꞌumal isqꞌabꞌ teꞌ, yetankanto noꞌ teꞌ;
sajpaqꞌpoxanhe yukanto isqꞌabꞌ teꞌ.
8 Oqꞌanhwej hakaꞌ yoqꞌ hunu ix qꞌopo ayko xilqꞌape yet bꞌiskꞌulal yinh,b
yuto kamnaxa yichamil aytoko yinh isqꞌopohal.
9 Matxa ixim pan chꞌaqꞌlax yebꞌalqꞌabꞌehal yul Yatut Komam Jahawil yebꞌ matxapaxo vino.
Ebꞌyaꞌ sacerdote chimunlakto yul Yatut Komam,
kaw bꞌiskꞌulal ye ebꞌyaꞌ.
10 Haꞌ ej tzꞌunubꞌ maꞌetaxkantoj, kaw bꞌiskꞌulal ye txꞌo txꞌotxꞌ,
yuto ixim trigo etaxkanto ixim; matajkanilo teꞌ uva tzꞌunbꞌil,
matanhkanilo teꞌ olivo, matxa teꞌ aceite.
11 Hex munlawom, okanhwe yinh bꞌiskꞌulal,
yebꞌ hex tzꞌunum uva oqꞌanhwej,
yuto matanhkanilo ixim trigo yebꞌ ixim cebada, malahwikanilo sat tzꞌunubꞌ,
yuxin matxa tzet ayko yipo hekꞌul.
12 Matajkanilo teꞌ yoj uva, istanhilo teꞌ higuera,
yebꞌ teꞌ granado, teꞌ coco, yebꞌ teꞌ manzan.
Sunil ej te teꞌ ay sat txꞌo txꞌotxꞌ, matajkanilo teꞌ.
Matxa tzalahilal yinh yanma anma.
13 Hex sacerdote, hex chexmunla yinh yet ismexhahil yet xahanbꞌal,
aweko xil heqꞌap yet bꞌiskꞌulal, kat heyoqꞌi,
kat heyay hilno xol tanh hex ischejabꞌ Komam Dios,
yuto matxa ixim pan chꞌaqꞌlax yebꞌalqꞌabꞌehal yul Yatut Komam Dios,
matxapaxo vino yebꞌ aceite.
14 Kutxbꞌaweko konhobꞌ Israel, yu heyok txahloj yebꞌ mach chexwaꞌi.
Kutxbꞌaweko ebꞌnaj ichamta winaj yebꞌ sunil anma ay yul konhobꞌ yul Yatut Komam Jahawil heDiosal,
yu hetxahli tet Komam Dios.
15 ¡Kaw kꞌanchꞌan anma yuto kawilxa yeti istzꞌayikal bꞌay chayo Komam Jahawil ishowal!
Chul huneꞌ niman isyaꞌtajil yu Komam sunil chisje yu.
16 ¿Tom mach ilaxilo tzet chikolo yinh kosat?
¿Machim ilaxpaxilo tzalahilal jet yet ayonh yul Yatut Komam Dios?
17 Ixim hinhat trigo, maqꞌato ixim yalanh txꞌo txꞌotxꞌ tꞌokbꞌil,
haxa bꞌay chikꞌubꞌalax sat ixim matxa tzet alaxayto yul.
Haꞌ bꞌay chikꞌubꞌalax ixim trigo tonhe etaxtoj, yuto tajayo ixim.
18 ¡Kaw chꞌelkano yaw no noqꞌ! ¡Nanantaxanhe bꞌay chꞌekꞌ bꞌulbꞌun noꞌ wakax,
matxa chitxumcha yu noꞌ tzet chute isbꞌa yuto matxa telaj chislo noꞌ!
Hakpax tuꞌ noꞌ meꞌ, kam noꞌ yu manhtelajil.
19 Tinanh Mam Wahawil, chiꞌahwawan tawet,
yuto xatzꞌato teꞌ telaj yu qꞌa qꞌaꞌ bꞌey txꞌotxꞌ desierto.
Yebꞌ xin laqꞌlaxayo teꞌ qꞌebꞌtaj yu xaj qꞌaꞌ.
20 Haꞌ ej no noqꞌ xoltelajil chꞌelpaxiko yaw noꞌ tawinh,
yuto xatajkanh ha haꞌ chꞌel yojomal, isnhusnilo qꞌaꞌ telaj sat txꞌotxꞌ desierto.