Oseas 1

OSEAS

1. BꞌABꞌEL MAJAN KUYBꞌANILE

(1:1–3:5)

Ix yixal yaꞌ Oseas yebꞌ yuninal yaꞌ

Istzotiꞌ Komam Jahawil hul tet yaꞌ Oseas iskꞌahol yaꞌ Beeri yinh istiempohal yaꞌ Uzías, yaꞌ Jotam, yaꞌ Acaz yebꞌ yaꞌ Ezequías, isreyal Judá, yebꞌ yinh istiempohal yaꞌ Jeroboam iskꞌahol yaꞌ rey Joás isreyal Israel.^a

2 Yichebꞌanil istzotiꞌ Komam Jahawil yalikꞌo yaꞌ Oseas. Yalni Komam tet yaꞌ Oseas hakaꞌ tiꞌ:

«Asiꞌ kat hawiqꞌni huneꞌ ix ix txꞌoj ye iswiꞌ hawixaloj,

ayojabꞌ xin hawuninal yebꞌ ix, haꞌ xin hawuninal tuꞌ,

yunin ix ix txꞌoj ye iswiꞌ chukanikoj,

yuto haꞌ anma Israel txꞌoj ye iswiꞌ,

yuto ispohilo isbꞌa winhan,» xhi Komam Jahawil.

3 Hak tuꞌ yu isto yaꞌ Oseas, yiqꞌni yaꞌ ix Gomer, iskutzꞌin naj Diblaim yixaloj. Lahwi tuꞌ ispitzkꞌati yunin ix, huneꞌ nichꞌan iskꞌahol yaꞌ Oseas tuꞌ. 4 Yalni Komam Jahawil tet yaꞌ Oseas:

«Jezreel chawako isbꞌiho nichꞌan hakꞌahol tiꞌ,

yuto hanikꞌxanhe tiempo chiꞌekꞌtoj,

kat wanayojan isyaꞌtajil yibꞌanh yuninal yaꞌ rey Jehú,

yu anma ispotxꞌkamo yaꞌ bꞌey Jezreel,

chintanhtzenilojan yip txꞌotxꞌ Israel^b yibꞌanh ismajul.

5 Haꞌ yinh huneꞌ tzꞌayik tuꞌ, chinqꞌahtojan islitꞌ ebꞌnaj Israel bꞌey akꞌal Jezreel,» xhi Komam.

6 Ispitzkꞌati huneꞌxa nichꞌan unin yinh ix Gomer tuꞌ hunelxa, ix huneꞌ nichꞌan unin tuꞌ. Yalni Komam Dios tet yaꞌ Oseas:

«Lo-ruhama chawako isbꞌiho nichꞌan hakutzꞌin tiꞌ,

yuto matxa chitzꞌay inkꞌulan yinh anma Israel,

wal xin maqꞌbꞌil intanhtzenilojan sunil, matxa chiwaqꞌ nimankꞌulal yinh.

7 »Walpaxo anma ah Judá chito tzꞌay inkꞌulan yinh, hanin Yahawilintiꞌan, isDiosal. Haninan chinkolilojan ebꞌnaj, yajaꞌ maxhtaj yu teꞌ litꞌ, maxhtaj yu espada, maxhtaj yu howal, maxhtaj yu noꞌ cheh yet howal, maxhtaj yu ebꞌnaj soldado chiyaqꞌ howal yibꞌanh cheh,» xhi Komam.

8 Lahwi tuꞌ, yel ix Lo-ruhama yinh im, ispitzkꞌati hunxa nichꞌan unin yinh ix Gomer, haꞌ huneꞌ nichꞌan yunin ix tuꞌ winaj. 9 Yalni Komam Dios tet yaꞌ Oseas:

«Lo-ammi, chawako isbꞌiho nichꞌan hakꞌahol tiꞌ,

yuto hex tiꞌ matxa inkonhobꞌojan heyehi,

yebꞌ xin matxataj hinan heDiosal,» xhi Komam.

10 Yajaꞌ xin ay huneꞌ tiempohal tiꞌ bꞌay kaw chichꞌibꞌkanokanh isbꞌisil anma Israel,

lahan chiꞌeliko isbꞌisil hakaꞌ yarenahil haꞌ mar,

machi mak chiqꞌoji ismaleni yebꞌ isbꞌisni.

Haꞌ bꞌay hal-lax tet: «Hex tiꞌ mach iskonhobꞌo Komam Dios heyehi,» xhi.

Haꞌtikꞌa bꞌey tuꞌ chihal-laxpaxo tet: «Hex tiꞌ yuninal Komam Dios itzitz, heyehi,» xhi tet.

11 Haꞌ ebꞌnaj yuninal Judá, chiskutxbꞌako isbꞌa ebꞌnaj yebꞌ ebꞌnaj Israel,

hunxanhe xin yahaw ebꞌnaj chisayikoj.

Sunil ebꞌnaj chimeltzo konhobꞌ Jerusalén,

yuto kaw niman yelapno huneꞌ tzꞌayik yet Jezreel tuꞌ.^c