Iskꞌulchꞌanil iskꞌul Komam Jahawil yinh iskonhobꞌ mach yijemoj
2
Halwe tet heyuxhtaj: «Hex tiꞌ, inkonhobꞌan hex,» cheyalni tet heyanabꞌ:«Chitzꞌay inkꞌulan teyinh,» kexchi.
2 ¡Qꞌanwe yinh hemiꞌ, qꞌanwe yinh, yuto matxa wixalojan yehi,
matxa kinyichamilopaxojan! Isbꞌejabꞌkano hemiꞌ tuꞌ iswinajli,
yiqꞌabꞌilo iswinajil yinh istxam iskꞌul.a
3 Ta mach xin chiwilojan tzet aya,
chintꞌilbꞌankanojan kat iskankano tꞌilno hakaꞌ istꞌili yet pitzkꞌahi,
kat ismeltzokaniko hakaꞌ txꞌotxꞌ desierto, txꞌotxꞌ machi yahaw,
hakaꞌ txꞌotxꞌ tajin txꞌotxꞌ, kat waqꞌni kamojan yu tajintiꞌal.
4 Matxa chitzꞌay inkꞌulan yinh yunin ix,
yuto haꞌ yunin ix tuꞌ yuninal yet ix txꞌoj ye iswiꞌ yehi.
5 Haꞌ hemiꞌ tuꞌ, meltzokaniko winajlomal,
haꞌ hemiꞌ bꞌay kexpitzkꞌa tuꞌ, yikanilo ispixan, yuto yal hemiꞌ tuꞌ hakaꞌ tiꞌ:
«Chintohan insayaꞌan ebꞌnaj inwinajan chiꞌaqꞌni tzet chinlohan yebꞌ ha haꞌ wetan,
haꞌ ebꞌnaj chiꞌaqꞌni noꞌ lana yebꞌ qꞌap lino wetan,
yebꞌ teꞌ aceite yebꞌ tzet chiwukꞌan,» xhi hemiꞌ.b
6 Yuxin wal tinanh chinmajchehan isbꞌeh yu teꞌ txꞌix,
chiwanikojan peyabꞌ yinhla ishoyanil,
hak tuꞌ xin matxa bꞌeh bꞌay chꞌoktoj.
7 Chiꞌoktzujno yinta ebꞌnaj iswinaj, yajaꞌ mach chitzujcha ebꞌnaj yu,
chissay ebꞌnaj, yajaꞌ machi ilcha ebꞌnaj yu,
yuxin chal hemiꞌ tuꞌ hakaꞌ tiꞌ: «Chinmeltzohan iskꞌatanh naj bꞌabꞌel wichamilan,
yuto kꞌultikꞌa wehan iskꞌatanh naj sata tinanh,» xhi ix.
8 Yajaꞌ hemiꞌ tuꞌ, mach yohtanheloj ta haninan chiwaqꞌan istrigo isvino yebꞌ yaceite,
waqꞌnipaxojan chꞌen plata yebꞌ chꞌen oro tet yinh kaw niman,
chꞌen yalte tet tioxh Baal yinh xahanbꞌalil.
9 Yuxin chinokan wiqꞌalojan intrigohan yebꞌ invinohan tet yinh istzꞌayikal,
chiwinipaxilojan noꞌ lana yebꞌ qꞌap lino waqꞌan xilo isqꞌap yunhe yaniko yenheloj.
10 Wal tinanh xin chinyelojan istxꞌojal iswiꞌ sata ebꞌnaj iswinaj,
yunhe yel ispixan, machi mak xin chu iskolnilo yul inqꞌabꞌan.
11 Chintanhtzelojan sunil istzalahilal,
chintanhtzelojan qꞌinh chekꞌtze,
matxa chiyekꞌtze qꞌinh yet unin ixahaw yebꞌ tzꞌayik xewilal,
chintanhtzenpaxilojan sunil hunteqꞌanxa qꞌinh chiyekꞌtze.c
12 Yebꞌ xin chintanhtzelojan istzꞌunubꞌ uva yebꞌ teꞌ higo, haꞌ ton yinh bꞌay chala:
«Haꞌ ton tiꞌ intoholan yaqꞌ ebꞌnaj inwinajan wetan,» xhi.
Haꞌ uva yebꞌ higo tuꞌ chinmeltzokanikojan telajbꞌalil, kat islohnito noꞌ xoltelajil noqꞌ.
13 Chitzotelpaxo Komam yibꞌanhilo konhobꞌ Israel, chalni hakaꞌ tiꞌ:
«Hanin Yahawilintiꞌan chiwalan ta chiwayojan isyaꞌtajil yibꞌanh konhobꞌ Israel,
yu chisnhus teꞌ pom tet hunteqꞌan tioxh Baal,
yaniko isjolqꞌabꞌil yebꞌ chꞌen uwe yelawiloj isto yinta ebꞌnaj iswinaj,
kinisnahulnhentojan,» xhi Komam Jahawil.
14 Yajaꞌ xin chiwitijan inkꞌatanhan, chiwanikojan wanmahan yinh,
chiwinitojan bꞌey txꞌotxꞌ desierto,
kat intzotelan tet yanma bꞌey tuꞌ.
15 Chiwaqꞌ meltzohojan istzꞌunubꞌ uva tet hunelxa;
haꞌ akꞌal Acor chimeltzoko yinh isyaxilal, huneꞌ bꞌay chikawxi iskꞌul.
Haꞌ bꞌey tuꞌ chibꞌitni yu tzalahilal hakaꞌ yet qꞌopo,
yebꞌ hakaꞌ yet istzꞌayikal yet yel sat txꞌotxꞌ Egipto.
16 Hanin Yahawilintiꞌan chiwalan ta haꞌ yinh huneꞌ tiempohal tuꞌ,
wichamilan hawehi kachi winhan, matxa bꞌaqꞌinhal xin chawal Baali winhan.
17 Yuto chiwilojan isbꞌi tioxh Baal yinh hatiꞌ,
matxa bꞌaqꞌinhal chawaqꞌ bꞌinaho isbꞌi Baali.d
18 Haꞌ yinh huneꞌ tiempohal tuꞌ chinwatxꞌeyo intzotiꞌan tet noꞌ xoltelajil noqꞌ,
noꞌ chꞌik chꞌekꞌ satkanh, yebꞌ noꞌ labꞌa ay sat txꞌotxꞌ,
hak tuꞌ xin matxa chichiwa noꞌ tawinh,
chiwinilojan teꞌ litꞌ, yebꞌ chꞌen espada yebꞌ howal sat txꞌo txꞌotxꞌ,
hak tuꞌ xin chachway yinh aqꞌankꞌulal.
19 Hex Israel, hakaꞌto chexok wixalojan yinh sunilbꞌal ej tiempo,
chexok wetbꞌihojan yinh istoholal yebꞌ yinh isyelal yuto kꞌul inkꞌulan teyinh yebꞌ xin chitzꞌay inkꞌulan teyinh.
20 Hakaꞌta chexok wixalojan, yajaꞌ yinh kaw isyelal machi etal,
cheyohtanheniloj ta hanintiꞌan Yahawil hinan.
21 Hanin Yahawilintiꞌan chiwalan:
«Haꞌ yinh huneꞌ tiempohal tuꞌ chinpajtzehan teyet bꞌey satkanh,
kat istit haꞌ nhabꞌ yul satkanh yibꞌanh txꞌo txꞌotxꞌ.
22 Haxa txꞌo txꞌotxꞌ chiyaqꞌ txꞌotxꞌ ixim trigo,
teꞌ vino yebꞌ teꞌ aceite, haꞌ hunteqꞌan tiꞌ xin chiꞌaniko ismay Jezreel.e
23 Chintzꞌunan inkonhobꞌan sat txꞌo txꞌotxꞌ wetojan,
xatzꞌay inkꞌulan yinh ix Lo-ruhama,
kat xin walnihan tet naj Lo-ammi hakaꞌ tiꞌ:
“Hach tiꞌ inkonhobꞌan hawehi,” kinchihan, kat yalnipaxo naj winhan:
“inDiosalan Hach,” xhi naj,» xhi Komam Yahawil.f