DANIEL
1. BꞌABꞌEL MAJAN KUYBꞌANILE: TZOTEBꞌANIL YIBꞌANH YET AY EBꞌNAJ JUDÁ BꞌEY BABILONIA
(1:1–6:28)
Yaꞌ Daniel yebꞌ hunteqꞌanxa yetbꞌi bꞌey Babilonia
1
Hayet oxebꞌxa habꞌil yok yaꞌ Joacim, isreyal Judá, yapni naj Nabucodonosor, isreyal Babilonia bꞌey Jerusalén, ishoynayo naj Jerusalén tuꞌ, yebꞌ issoldado. 2 Yaniko Komam Dios Jahawil, yaꞌ Joacim, isreyal Judá yul isqꞌabꞌ ebꞌnaj Babilonia yebꞌ hunmajan munlabꞌal chiꞌokniko yul Yatut Komam Dios, yinito naj rey Nabucodonosor bꞌey txꞌotxꞌ Sinar, yanikto naj yul yatut istioxh, bꞌay kꞌuwan isqꞌalomal istioxh.a 3 Yalni naj rey Nabucodonosor tet naj Aspenaz, yahawil yinh ebꞌnaj eunuco ta chissayilo naj xol ebꞌnaj iskꞌahol ebꞌnaj Israel, ebꞌnaj tzehtaj yikꞌal ebꞌnaj rey, 4 ebꞌnaj kawla winaj, mach yaꞌo ay, yebꞌ xin kuybꞌil yinh sunil helanilehal, yebꞌ xin kaw ay isnabꞌal, helan ismunla yul ispalacio naj rey. Yalnipaxo naj ta chikuylax ebꞌnaj tzehtaj tuꞌ yinh tzꞌibꞌ yebꞌ xin yinh yabꞌxubꞌal ebꞌnaj caldeo. 5 Yaqꞌnikano naj rey Nabucodonosor chejbꞌanile tet naj Aspenaz ta haꞌ tzet chislo naj rey yebꞌ vino chukꞌ naj, haꞌ chꞌaqꞌlax tet ebꞌnaj tzehtaj hunun tzꞌayik, kat iskuylax ebꞌnaj yulbꞌal oxebꞌ habꞌil; chilahwi tuꞌ kat isyeni isbꞌa ebꞌnaj sata naj rey Nabucodonosor. 6 Haꞌ xol hunteqꞌan ebꞌnaj tzehtaj tuꞌ, ayko yaꞌ Daniel, yaꞌ Ananías, yaꞌ Misael, yebꞌ yaꞌ Azarías, haꞌ ebꞌyaꞌ tiꞌ yikꞌal yaꞌ Judá ye ebꞌyaꞌ. 7 Haꞌ ebꞌyaꞌ tiꞌ, hel-lax isbꞌi yu naj yahawil yinh ebꞌnaj eunuco. Haꞌ yaꞌ Daniel, Beltsasar alaxiko isbꞌiho yaꞌ; haꞌ yaꞌ Ananías, Sadrac alaxiko isbꞌiho yaꞌ; haꞌ yaꞌ Misael, Mesac alaxiko isbꞌiho yaꞌ; haxa yaꞌ Azarías, Abed-nego alaxiko isbꞌiho yaꞌ.8 Wal yaꞌ Daniel, yal yaꞌ yinh isnabꞌal ta mach chetato isbꞌa yaꞌ sata Komam Dios yu tzet chislo naj rey yebꞌ yu vino chukꞌ naj, yuxin isqꞌan yaꞌ tet naj yahawil ebꞌnaj eunuco ta mach chislo yaꞌ tzet chislo naj rey tuꞌ, yunhe mach chiyetato isbꞌa yaꞌ sata Komam Dios.b 9 Yajaꞌ xin kaw chitzala naj yahawil ebꞌnaj eunuco yinh yaꞌ Daniel, yu iskꞌulal Komam yinh yaꞌ Daniel. 10 Yalni naj yahawil ebꞌnaj eunuco tuꞌ tet yaꞌ Daniel:
—Chinxiwan tet yaꞌ rey wahawilan, yuto haꞌ kaw yaꞌ halni tzet cheloh yebꞌ tzet cheyukꞌu; kꞌuxantaxka yet chexyilni yaꞌ ta tzꞌonexxa sata ebꞌnaj heyet tzehal, hak tuꞌ chu ischejni yaꞌ rey tuꞌ inmaqꞌlaxkamojan, xhi naj.
11 Yaniko naj Yahawil ebꞌnaj eunuco naj Melsar yilomalo yaꞌ Daniel, yaꞌ Ananías, yaꞌ Misael yebꞌ yaꞌ Azarías, yuxin yal yaꞌ Daniel tet naj Melsar hakaꞌ tiꞌ:
12 —Chinqꞌanan tawet ta chonhhawilwehanh yulbꞌal 10 (lahonhebꞌ) tzꞌayik, chawaqꞌni teꞌ itah kolobꞌanh, yebꞌ chawaqꞌni ha haꞌ jukꞌuꞌanh. 13 Lahwi tuꞌ xin, chonhhalahbꞌananh yebꞌ hunteqꞌanxa ebꞌnaj jet tzehalanh chiloni tzet chislo yaꞌ rey, tzujan tuꞌ chisje hawaqꞌni jetanh tzet chikolohanh hatatikꞌa tzet chu konhhawilnihanh, xhi yaꞌ Daniel.
14 Isyijen naj Melsar yinh tzet isqꞌan yaꞌ Daniel, yilwen naj ebꞌyaꞌ tzehtaj tuꞌ yulbꞌal 10 (lahonhebꞌ) tzꞌayik. 15 Haxa yet istzꞌajnaj 10 (lahonhebꞌ) tzꞌayik tuꞌ yil-laxi ta ekꞌna kaw kꞌul yebꞌ kaw saqꞌal jilni sat ebꞌyaꞌ, sata ebꞌnaj tzehtaj chiloni tzet chislo naj rey, yebꞌ xin kaw ekꞌbꞌal ay yip ebꞌyaꞌ yibꞌanh ebꞌnaj. 16 Yuxin haꞌ tzet chislo ebꞌyaꞌ yalkano naj rey yebꞌ vino chukꞌ ebꞌyaꞌ, haꞌ naj Melsar chiꞌinitoj, chaqꞌni naj teꞌ itah islobꞌ ebꞌyaꞌ.
17 Haꞌ ebꞌyaꞌ kanhwanh tzehtaj tuꞌ yaqꞌ Komam Dios isnabꞌal ebꞌyaꞌ, yebꞌ ishelanil yinh tzꞌibꞌ, yebꞌ yitzꞌatil iswiꞌ yinh sunil tzet aqꞌlax iskuyuꞌ. Wal yaꞌ Daniel xin, kaw ay ishelanil istxumnilo sunil tzet aqꞌlax yilaꞌ, chistxumnipaxilo tzet chal yelapno wayique. 18 Haxa yekꞌto tzꞌayik bꞌay yal naj rey ta chisye isbꞌa sunil ebꞌnaj tzehtaj sataj naj, yinito naj yahawil ebꞌnaj eunuco sunil ebꞌnaj tzehtaj tuꞌ sata naj rey Nabucodonosor. 19 Istzotel naj rey yebꞌ ebꞌnaj tzehtaj tuꞌ, yajaꞌ xin haꞌ xol sunil ebꞌnaj tuꞌ, machi ebꞌnaj hakaꞌ ishelanil yaꞌ Daniel, yebꞌ yaꞌ Ananías, yaꞌ Misael, yebꞌ yaꞌ Azarías, hak tuꞌ yu iskankano ebꞌyaꞌ kanhwanh tuꞌ munil yul ispalacio naj rey Nabucodonosor. 20 Isqꞌambꞌen naj rey tuꞌ tet ebꞌyaꞌ yinh sunil helanile yebꞌ nabꞌale, yilchati yu naj tato haꞌ ebꞌyaꞌ kanhwanh tuꞌ, 10 (lahonhelto) ekꞌbꞌal ishelanil ebꞌyaꞌ yibꞌanh sunil ebꞌnaj ahbꞌelom yebꞌ ebꞌnaj chikuyni yinh tzet yelapno ye txꞌumel, ebꞌnaj ay yul ismajul txꞌotxꞌ Babilonia. 21 Wal yaꞌ Daniel xin kantokano yaꞌ munil yul palacio masanto yinh bꞌabꞌel habꞌil yok naj Ciro reyalil.c