48
Yalnipaxo Komam: «Hak tiꞌ isbꞌi hunun majan ebꞌnaj Israel yebꞌ bꞌay chilaekꞌ ismohonal istxꞌotxꞌ hunun majan ebꞌnaj: Haꞌ yaꞌ Dan, chahni hunmajan istxꞌotxꞌ chitaichiti bꞌey yetkꞌulal norte, kat yekꞌ bꞌey isbꞌelal Hetlón, chitaapni bꞌey Hamat yebꞌ bꞌey Hazar-enán, istiꞌla Damasco yinh yetkꞌulal norte. Haꞌ istxꞌotxꞌ yaꞌ tuꞌ chitaichiti ismohonal yinh yetkꞌulal bꞌay chiꞌahilo tzꞌayik masata bꞌay chito tzꞌayik. 2 Haxa istiꞌla ismohonal istxꞌotxꞌ yaꞌ Dan, chischah yaꞌ Aser huneꞌ majan istxꞌotxꞌ chitaichiti bꞌey isqꞌaxepal yinh yetkꞌulal bꞌay chiꞌahilo tzꞌayik masanta isqꞌaxepal istiꞌla haꞌ mar. 3 Haxa istiꞌla ismohonal istxꞌotxꞌ yaꞌ Aser, chischah yaꞌ Neftalí huneꞌ majan istxꞌotxꞌ, chitaichiti yinh isqꞌaxepal yinh yetkꞌulal bꞌay chiꞌahilo tzꞌayik masanta yinh isqꞌaxepal istiꞌla haꞌ mar. 4 Haxa istiꞌla ismohonal istxꞌotxꞌ yaꞌ Neftalí, chischah yaꞌ Manasés huneꞌ majan istxꞌotxꞌ, chitaichiti yinh isqꞌaxepal yinh yetkꞌulal bꞌay chiꞌahilo tzꞌayik masanta yinh isqꞌaxepal istiꞌla haꞌ mar. 5 Haxa istiꞌla ismohonal istxꞌotxꞌ yaꞌ Manasés chischah yaꞌ Efraín huneꞌ majan istxꞌotxꞌ, chitaichiti yinh isqꞌaxepal bꞌay chiꞌahilo tzꞌayik, masanta bꞌey isqꞌaxepal istiꞌla haꞌ mar. 6 Haxa istiꞌla ismohonal istxꞌotxꞌ yaꞌ Efraín, chischah yaꞌ Rubén huneꞌ majan istxꞌotxꞌ chitaichiti bꞌey isqꞌaxepal bꞌay chiꞌahilo tzꞌayik, masanta bꞌey isqꞌaxepal istiꞌla haꞌ mar. 7 Haxa istiꞌla ismohonal istxꞌotxꞌ yaꞌ Rubén chischah yaꞌ Judá huneꞌ majan istxꞌotxꞌ, chitaichiti bꞌey isqꞌaxepal bꞌay chiꞌahilo tzꞌayik, masanta bꞌey isqꞌaxepal istiꞌla haꞌ mar.8 »Haxa istiꞌla ismohonal istxꞌotxꞌ yaꞌ Judá, chikankano txꞌotxꞌ nan chipolaxkaniloj, haꞌ txꞌotxꞌ tuꞌ, chitaichiti txꞌotxꞌ bꞌey isqꞌaxepal yinh yetkꞌulal bꞌay chiꞌahilo tzꞌayik, masanta bꞌey isqꞌaxepal istiꞌla haꞌ mar. Haꞌ txꞌotxꞌ tuꞌ yikta yoxlahonhebꞌ kilómetro sat, haxa ispakꞌul, lahan ismalil hakaꞌ ispakꞌul txꞌotxꞌ yet hunun majan ebꞌnaj Israel, haxa Yatut Komam Jahawil yiktabꞌanil txꞌotxꞌ chikani. 9 Haxa txꞌotxꞌ chepohilo yeto Komam Jahawil, yikta yoxlahonhebꞌ kilómetro ispakꞌul txꞌotxꞌ yok 10 (lahonhebꞌ) kilómetro sat txꞌotxꞌ. 10 Haxa huneꞌ majan txꞌotxꞌ wetan yehi, chikankano tet ebꞌyaꞌ sacerdote, yikta yoxlahonhebꞌ kilómetro ispakꞌul txꞌotxꞌ yinh yetkꞌulal norte, yebꞌ yinh yetkꞌulal sur, yok howebꞌ kilómetro sat txꞌotxꞌ yinh yetkꞌulal bꞌay chito tzꞌayik. Haxa Yatut Komam Jahawil chikankano yiktabꞌanil txꞌotxꞌ tuꞌ. 11 Haꞌ ebꞌyaꞌ sacerdote iskꞌahol yaꞌ Sadoc chimunla yinh ismunil Komam Jahawil, haꞌ ton ebꞌyaꞌ kaw yijem yute isbꞌa tet Komam, mach yako ismul yinta konhobꞌ Israel yebꞌ yinta ebꞌnaj levita. 12 Haꞌ ebꞌyaꞌ tuꞌ, chiyiqꞌ huneꞌ majan txꞌotxꞌ yet Komam Jahawil yehi, haꞌ ton txꞌotxꞌ ayko istiꞌla ismohonal istxꞌotxꞌ ebꞌnaj levita. 13 Haꞌ bꞌey istiꞌla istxꞌotxꞌ ebꞌyaꞌ sacerdote chꞌekꞌ istxꞌotxꞌ ebꞌnaj levita. Haꞌ txꞌotxꞌ tuꞌ, yikta yoxlahonhebꞌ kilómetro ispakꞌul yok howebꞌ kilómetro sat. Haxapaxo txꞌotxꞌ yet Komam Jahawil, yikta yoxlahonhebꞌ kilómetro ispakꞌul yok howebꞌ kilómetro sat. 14 Mach hunu majan txꞌo txꞌotxꞌ tuꞌ chu istxonhlaxi, mach chu ishel-laxpaxtoj, nitam chisje yaqꞌlax tet hunuxa maka, yuto yet Komam Jahawil ye txꞌotxꞌ.
15 »Haxa hanikꞌxa txꞌotxꞌ matxa yeto Komam Jahawil yehi, haꞌ txꞌotxꞌ tuꞌ yikta yoxlanhebꞌ kilómetro ispakꞌul, yok yikta yox kilómetro sat. Haꞌ sat txꞌotxꞌ tuꞌ chiꞌehayo anma, yebꞌ xin haꞌ sat txꞌotxꞌ chilow no noqꞌ, haxa yiktabꞌanil txꞌotxꞌ chiwatxꞌelaxayo konhobꞌ. 16 Haꞌ huneꞌ konhobꞌ tuꞌ, 2,250 metro yeko ismalil yinh yetkꞌulal norte yebꞌ yinh yetkꞌulal sur. 2,250 metro yepaxiko ismalil yinh yetkꞌulal bꞌay chiꞌahilo tzꞌayik, yebꞌ bꞌay chito tzꞌayik. 17 Haxa ismalil bꞌay chilalow no noqꞌ yinhla ishoyanil konhobꞌ tuꞌ, 125 metro yeko yinh yetkꞌulal sur yebꞌ yinh yetkꞌulal norte, haktikꞌapax tuꞌ ismalil yinh yetkꞌulal bꞌay chiꞌahilo tzꞌayik yebꞌ yinh yetkꞌulal bꞌay chito tzꞌayik. 18 Haꞌ yinhla ishoyanil konhobꞌ ay huneꞌxa majan txꞌotxꞌ ayko istiꞌla txꞌotxꞌ yet Komam Jahawil yehi. Haꞌ txꞌotxꞌ tuꞌ howebꞌ kilómetro yeko ispakꞌul txꞌotxꞌ yinh yetkꞌulal bꞌay chiꞌahilo tzꞌayik, yok howebꞌ kilómetro ismalil yinh yetkꞌulal bꞌay chito tzꞌayik, haꞌ sat txꞌotxꞌ chꞌel sat tzꞌunubꞌ chislo anma chimunla yul konhobꞌ. 19 Haꞌ ebꞌnaj chimunla yul konhobꞌ tuꞌ, tzijxanhe majanil ebꞌnaj yet Israelal ebꞌnaj chul munil yul konhobꞌ tuꞌ. 20 Haꞌ sunil huneꞌ majan txꞌotxꞌ yet Komam Jahawil yehi, txꞌotxꞌ tuꞌ, yoxlahonhebꞌ kilómetro ismalil txꞌotxꞌ yinh hunun iskanhebꞌal istxikin, haꞌ txꞌotxꞌ tuꞌ xin chikankano yet Yatut Komam Jahawil yebꞌ yeto konhobꞌ.
21 »Haxa istxꞌotxꞌ naj yahaw, chikankano txꞌotxꞌ yinh qꞌaxqꞌep iskꞌul txꞌotxꞌ yet Komam Jahawil yebꞌ yinh qꞌaxqꞌep iskꞌul txꞌotxꞌ yet konhobꞌ, haꞌ ton txꞌotxꞌ ayko sata txꞌotxꞌ yikta yoxlahonhebꞌ kilómetro, chitaapni ismohonal yinh yetkꞌulal bꞌay chiꞌahilo tzꞌayik yebꞌ bꞌay chito tzꞌayik. Haꞌ huneꞌ majan txꞌotxꞌ tiꞌ kaw niman yelapno txꞌotxꞌ, haꞌ yiktabꞌanil txꞌotxꞌ tiꞌ chikankano Yatut Komam Jahawil. 22 Chal yelapnoj, haꞌ istxꞌotxꞌ naj yahaw tuꞌ chitaichiti txꞌotxꞌ istiꞌla istxꞌotxꞌ ebꞌnaj levita yebꞌ istiꞌla istxꞌotxꞌ konhobꞌ ayko xolbꞌal ismohonal txꞌotxꞌ Judá, yebꞌ ismohonal txꞌotxꞌ Benjamín.
23 »Haxa hunteqꞌanxa majan ebꞌnaj Israel xin, chischahpaxo ebꞌnaj istxꞌotxꞌ. Haꞌ yaꞌ Benjamín, chischah yaꞌ txꞌotxꞌ chiꞌichiti bꞌey isqꞌaxepal yinh yetkꞌulal bꞌay chiꞌahilo tzꞌayik, masanta isqꞌaxepal istiꞌla haꞌ mar, haꞌ tuꞌ chischah yaꞌ huneꞌ majan istxꞌotxꞌ. 24 Haꞌ istiꞌla ismohonal istxꞌotxꞌ yaꞌ Benjamín, chischah yaꞌ Simeón huneꞌ majan istxꞌotxꞌ, chitaichiti bꞌey isqꞌaxepal yinh yetkꞌulal bꞌay chiꞌahilo tzꞌayik, masanta yinh isqꞌaxepal istiꞌ haꞌ mar. 25 Haxa istiꞌla ismohonal istxꞌotxꞌ yaꞌ Simeón, chischah yaꞌ Isacar huneꞌ majan istxꞌotxꞌ, chitaichiti bꞌey isqꞌaxepal yetkꞌulal bꞌay chiꞌahilo tzꞌayik, masanta isqꞌaxebꞌikꞌto istiꞌ haꞌ mar. 26 Haxa istiꞌla ismohonal istxꞌotxꞌ yaꞌ Isacar, chischah yaꞌ Zabulón huneꞌ majan istxꞌotxꞌ, chitaichiti bꞌey isqꞌaxepal yetkꞌulal bꞌay chiꞌahilo tzꞌayik, masanta bꞌey isqꞌaxepal istiꞌla haꞌ mar. 27 Haxa istiꞌla ismohonal istxꞌotxꞌ yaꞌ Zabulón, chischah yaꞌ Gad huneꞌ majan istxꞌotxꞌ, chitaichiti bꞌey isqꞌaxepal yetkꞌulal bꞌay chiꞌahilo tzꞌayik, masanta bꞌey isqꞌaxepal istiꞌla haꞌ mar. 28 Haꞌ bꞌey yetkꞌulal sur, haꞌ tuꞌ ay istxꞌotxꞌ yaꞌ Gad, haꞌ ismohonal chꞌapni bꞌey Tamar, masanta bꞌey isnuqꞌ ha haꞌ, bꞌey Cades yebꞌ bꞌay ay haꞌ nichꞌan haꞌ sat mohon Egipto, masanta bꞌey haꞌ Niman Mar. 29 Haꞌ ton txꞌo txꞌotxꞌ tuꞌ chischah hunun majan ebꞌnaj Israel ismajulo, yinh suertehal, yebꞌ xin hak tuꞌ chu ispohlaxkanh txꞌotxꞌ yinh,» xhi Komam Jahawil.
Teꞌ pulta yebꞌ isbꞌi Jerusalén
30 «Haꞌ huneꞌ konhobꞌ ay sat txꞌo txꞌotxꞌ tuꞌ txꞌiꞌal ispultahil, yebꞌ xin ayko iskꞌubꞌal yinhla ishoyanil. Haꞌ yinh yetkꞌulal norte, 2,250 metro yeko kꞌubꞌ tuꞌ. 31 Haꞌ yinh hunun ispultahil konhobꞌ tuꞌ, chibꞌina isbꞌi hunun majan ebꞌnaj Israel. Haꞌ yinh oxebꞌ pulta ayko yinh yetkꞌulal norte: Ispulta yaꞌ Rubén, ispulta yaꞌ Judá, yebꞌ ispulta yaꞌ Leví. 32 Haxa yinh yetkꞌulal bꞌay chiꞌahilo tzꞌayik, 2,250 metro yeko kꞌubꞌ tuꞌ, ay xin oxebꞌ pulta: Ispulta yaꞌ José, ispulta yaꞌ Benjamín, yebꞌ ispulta yaꞌ Dan. 33 Haxa yinh yetkꞌulal sur, 2,250 metro yeko kꞌubꞌ tuꞌ, aypaxo xin oxebꞌ pulta: Ispulta yaꞌ Simeón, ispulta yaꞌ Isacar, ispulta yaꞌ Zabulón. 34 Haxa yinh yetkꞌulal bꞌay chito tzꞌayik, 2,250 metro yeko kꞌubꞌ tuꞌ, aypaxo oxebꞌ pulta: ispulta yaꞌ Gad, ispulta yaꞌ Aser, yebꞌ ispulta yaꞌ Neftalí. 35 Haꞌ huneꞌ kꞌubꞌ tuꞌ, 9 mil metro yeko yinhla ishoyanil konhobꞌ tuꞌ; hak tiꞌ xin chihal-lax yinh huneꞌ konhobꞌ tuꞌ yinh tzꞌayik chito kosataj tiꞌ: Komam Jahawil ay bꞌey tiꞌ, hak tuꞌ yijkano isbꞌi.»