3 Yelto huneꞌ naj winaj tuꞌ bꞌey yetkꞌulal bꞌay chiꞌahilo tzꞌayik, iqꞌbꞌil huneꞌ txꞌanh yul isqꞌabꞌ. Ismalen naj 500 metro, kinyinikꞌtojan naj yul haꞌ, yahilo haꞌ yinh isnuqꞌ wojan. 4 Tzujan tuꞌ ismalenpaxo naj 500 metro, kinyinipaxikꞌtojan naj yul haꞌ, yahilo haꞌ yinh inwitxꞌiꞌan. Lahwi tuꞌ ismalenpaxo naj 500 metroxa, kinyinikꞌtojan naj yul haꞌ, yahilo haꞌ yinh wiktajan. 5 Ismalenpaxo naj hunxa 500 metro, yajaꞌ xin matxa chu wekꞌtojan yul haꞌ yuto nimajalxa yich haꞌ, yuxin ta chikoqꞌaxpo haꞌ kachannhe ta chikomaqꞌ haꞌ. 6 Yalni naj wetan: «Hach iskꞌahol naj winaj, ¿mamtxumchalo hawu yu huneꞌ maxawil tiꞌ?» xhi naj wetan. Lahwi tuꞌ kinyinitojan naj istiꞌla haꞌ niman haꞌ tuꞌ. 7 Wilnihan teꞌ qꞌebꞌtaj kaw nimankano isbꞌisil yinh ej isqꞌaxqꞌepal istiꞌ haꞌ. 8 Yalnipaxo naj wetan: «Haꞌ huneꞌ ha haꞌ tiꞌ chibꞌelwito haꞌ yinh yetkꞌulal bꞌay chiꞌahilo tzꞌayik, kat yekꞌ haꞌ yul ismajul txꞌotxꞌ Arabia, lahwi tuꞌ kat yapnikano haꞌ xol haꞌ mar Kamom, hayet chꞌapni haꞌ xol haꞌ mar tuꞌ xin, kat ischiꞌbꞌilo haꞌ mar tuꞌ yu haꞌ. 9 Bꞌajxanhetuꞌwal chiꞌapni kabꞌebꞌ ha haꞌ tiꞌ kaw kꞌulxa chu yehikꞌo sunil ismajanil no noqꞌ yul haꞌ, kaw chipohchakanh noꞌ kay xol, yuto haꞌ huneꞌ haꞌ tiꞌ chichiꞌbꞌikanh haꞌ mar yu haꞌ, haꞌ sunil no noqꞌ chꞌekꞌ xol ha haꞌ tiꞌ kaw ay yitzital xol haꞌ. 10 Haꞌ bꞌey istiꞌla haꞌ tiꞌ tzetkꞌa ebꞌnaj chꞌapni tzabꞌo kay. Chitaichiti ebꞌnaj islitxꞌbꞌanto ishakꞌ bꞌey En-gadi masanta bꞌey En-eglaim, kaw xin txꞌiꞌal ismajanil noꞌ kay ay xol haꞌ hakaꞌ noꞌ ay xol haꞌ Niman Mar. 11 Yajaꞌ wal bꞌay haꞌla yekꞌ sat txꞌotxꞌ yebꞌ bꞌay panhan haꞌ nixhte haꞌ, mach chichiꞌbꞌi haꞌ, yuto haꞌ tuꞌ chiꞌilaxahti atzꞌam atzꞌam. 12 Haꞌ yinh iskꞌul ha haꞌ tiꞌ yinh qꞌaxqꞌep chichꞌibꞌ sunil ej majanil teꞌ lobꞌehal, haꞌ xaj teꞌ maxhtikꞌa bꞌaqꞌinh chiꞌaykꞌayi yebꞌ xin maxhtikꞌa chisbꞌej teꞌ yaqꞌni sat. Hunun ixahaw isqꞌanbꞌilo sat teꞌ yuto aykanh teꞌ istiꞌla ha haꞌ chꞌelti yul Yatut Komam Dios; haꞌ sat te teꞌ chilolaxi, wal xaj teꞌ xin chiꞌokniko anhil.

13 »Hak tiꞌ yalni Komam Jahawil hakaꞌ tiꞌ: Haꞌ tiꞌ, ismohonal txꞌo txꞌotxꞌ chipohlax ismajulo kabꞌlahonhebꞌ majan ebꞌnaj Israel. Haꞌ yaꞌ José kabꞌ majan istxꞌotxꞌ yaꞌ chischah. 14 Hanintiꞌan wikanh inqꞌabꞌan waqꞌni bꞌinaho inbꞌihan walnihan ta chiwaqꞌan txꞌotxꞌ tet heyichmam. Lahannhe chu hepohnayo txꞌotxꞌ teyinh, yuto haꞌ huneꞌ txꞌo txꞌotxꞌ tiꞌ, haꞌ txꞌotxꞌ chꞌok hemajuloj.

15 »Haꞌ tiꞌ ismohonal txꞌotxꞌ yinh yetkꞌulal norte, chitaichiti bꞌey haꞌ Niman Mar, kat yekꞌ bꞌey isbꞌelal Hetlón, kat yekꞌ bꞌey Zedad, 16 bꞌey Hamat, bꞌey Berota, bꞌey Sibraim ayko xolbꞌal ismohonal Damasco yebꞌ ismohonal Hamat masanta bꞌey Hazar-haticón, haꞌ ton txꞌotxꞌ ismohon isbꞌa yebꞌ Haurán. 17 Yuxin haꞌ ismohonal txꞌotxꞌ yinh yetkꞌulal norte chitaekꞌ bꞌey istiꞌ haꞌ mar, masanta chiꞌapni bꞌey Hazar-enán kat iskanpax txꞌotxꞌ Damasco yebꞌ txꞌotxꞌ Hamat ismohonalo txꞌotxꞌ yinh yetkꞌulal norte tuꞌ.

18 »Haxa ismohonal yinh yetkꞌulal bꞌay chiꞌahilo tzꞌayik, chꞌekꞌ xolbꞌal Haurán yebꞌ Damasco yebꞌ Galaad yebꞌ txꞌotxꞌ Israel istiꞌla haꞌ Jordán, haꞌ bꞌey tiꞌ chemale ismohonal txꞌotxꞌ yinh yetkꞌulal bꞌay chiꞌahilo tzꞌayik masanta bꞌey haꞌ mar ayko yinh yetkꞌulal bꞌay chiꞌahilo tzꞌayik.

19 »Haxa yinh yetkꞌulal sur, chitaichiti ismohonal txꞌotxꞌ bꞌey Tamar masanta bꞌey isnuqꞌ ha haꞌ, kat yichipaxti bꞌey Cades yebꞌ bꞌey haꞌ nichꞌan haꞌ masanta bꞌey haꞌ Niman Mar, haꞌ ton ismohonal txꞌotxꞌ yinh yetkꞌulal sur.

20 »Haxa yinh yetkꞌulal bꞌay chito tzꞌayik chꞌekꞌ ismohonal txꞌotxꞌ istiꞌla haꞌ Niman Mar masanta satakꞌti bꞌay chonhokapno bꞌey Hamat, haꞌ tuꞌ ismohonal txꞌotxꞌ yinh yetkꞌulal bꞌay chito tzꞌayik.

21 »Haꞌ ton huneꞌ txꞌo txꞌotxꞌ tiꞌ, chipohlaxkanh teyinh hakaꞌtikꞌa hebꞌisil hunun majan hex Israel hex tiꞌ. 22 Chepohkanh txꞌotxꞌ teyinh hatatikꞌa heyinhbꞌal yebꞌ yinh anma nan konhobꞌal ayxa yuninal texol. Haꞌ anma nan konhobꞌal ay texol tuꞌ cheyaqꞌ tet hakaꞌto heyet Israelal hebꞌa yebꞌi. Chepohkanh txꞌotxꞌ hatatikꞌa heyinhbꞌal, hak tuꞌ xin chischah ebꞌnaj tuꞌ ismajul teyintaj hakaꞌ ismalil hunun majan chechah hex Israel hex tiꞌ. 23 Haꞌ anma nan konhobꞌal tuꞌ chischah ismajul yinta hunun majan Israel bꞌay ayah,» xhi Komam Yahawil.