46
»”Hak tiꞌ yalnipaxo Komam Jahawil hakaꞌ tiꞌ: Haꞌ huneꞌ pulta ay bꞌey yamaqꞌil yuliktoj, huneꞌ pulta hakanto yinh yetkꞌulal bꞌay chiꞌahilo tzꞌayik majannhetikꞌa yulbꞌal wajebꞌ tzꞌayik munil, haxa yinh tzꞌayik xewilal chihajlaxi, yebꞌ istzꞌayikal yet unin ixahaw. 2 Hayet chiyaqꞌni naj yahaw konhobꞌ isxahanbꞌal, haꞌ bꞌey pulta ay bꞌey yamaqꞌil pulta tuꞌ chiꞌokto naj, kat yok linhno naj yul ismarcohal pulta yet lanhan isnhusni ebꞌyaꞌ sacerdote isxahanbꞌal naj yebꞌ yet lanhan yalten ebꞌyaꞌ isyebꞌalqꞌabꞌ naj yet aqꞌankꞌulal. Haxa naj yahaw konhobꞌ tuꞌ xin, chꞌok naj yiqꞌayo isbꞌa wetan bꞌey istiꞌ pulta bꞌay linhankanh tuꞌ, lahwi tuꞌ, kat yelti naj bꞌey tuꞌ, machi xin chipebꞌalax pulta masanta yet qꞌejbꞌiyalil chipebꞌalaxkanoj. 3 Hakpax tuꞌ xin konhobꞌ Israel, chꞌok yiqꞌayo isbꞌa wetan sata pulta, yinh istzꞌayikal xewilal yebꞌ yet unin ixahaw. 4 Haꞌ yinh istzꞌayikal xewilal chiyaqꞌ naj yahaw konhobꞌ wajkꞌonh noꞌ yunin meꞌ machi istzakaꞌil chinhuslax xahanbꞌalil, yebꞌpaxo huneꞌ noꞌ icham meꞌ machi istzakaꞌil yinh xahanbꞌalil. 5 Chiyaqꞌnipaxo naj 40 (kawinaj) libra ixim harina yebꞌalqꞌabꞌehal yinta hunun noꞌ meꞌ tuꞌ. Haxa yinta hunun noꞌ yunin meꞌ xin hatatikꞌa tzet chal yanma naj yaqꞌaꞌ, haꞌ chaqꞌ naj. Hayet chiyaqꞌni naj huneꞌ 40 (kawinaj) libra ixim yilal yaqꞌnipaxo naj yikta iskanh litro teꞌ aceite yebꞌalqꞌabꞌehal. 6 Yajaꞌ wal yinh istzꞌayikal yet unin ixahaw, haꞌ hunu noꞌ tzehla wakax machi istzakaꞌil chinhuslax xahanbꞌalil, yok wajkꞌonh noꞌ yunin meꞌ, yok huneꞌ noꞌ icham meꞌ, yajaꞌ noꞌ machi istzakaꞌil aykoj. 7 Haꞌ yinta hunun noꞌ tzehla wakax tuꞌ, chꞌaqꞌlaxpaxo 40 (kawinaj) libra ixim harina yebꞌalqꞌabꞌehal, yebꞌpaxo 40 (kawinaj) libra ixim harina tuꞌ yinta hunun noꞌ icham meꞌ, yajaꞌ wal yebꞌalqꞌabꞌe chiꞌaqꞌlax yinta hunun noꞌ yunin meꞌ xin haꞌtikꞌa tzet chal yanma yaqꞌaꞌ, haꞌ chaqꞌa. Haꞌ yinta hunun 40 (kawinaj) libra ixim harina yilal yaqꞌlax yikta iskanh litro teꞌ aceite yebꞌalqꞌabꞌehal. 8 Hayet chiꞌokto naj yahaw konhobꞌ, haꞌ yul pulta ay bꞌey yamaqꞌil chiꞌokto naj, haꞌtikꞌa bꞌey tuꞌ xin chꞌelpaxti naj.9 »”Yajaꞌ wal yet chiꞌok konhobꞌ yinh insatan, hanin Yahawilintiꞌan yu yaniko inmayan yinh qꞌinh, haꞌ mak chiꞌokto yul pulta ayko yinh yetkꞌulal norte, haxa yul pulta ayko yinh yetkꞌulal sur, haꞌ tuꞌ chꞌeltoj. Haꞌ mak chiꞌokto yul pulta yetkꞌulal sur, haxa pulta yetkꞌulal norte chꞌeltoj. 10 Hayet chꞌokto ebꞌnaj konhobꞌ kat yaniko isbꞌa naj yahaw konhobꞌ xol ebꞌnaj, haxa yet chꞌelpaxti ebꞌnaj, kat yelpaxti naj yintaj ebꞌnaj.
11 »”Haꞌ yinh qꞌinh yebꞌ yet chiskutxbꞌan isbꞌa konhobꞌ yinh tzet kaw ay yelapnoj, chꞌaqꞌlax 40 (kawinaj) libra ixim harina yebꞌalqꞌabꞌehal yinta hunun noꞌ tzehla wakax, yebꞌ xin 40 (kawinaj) libra ixim yinta hunun noꞌ icham meꞌ, haxa yinta hunun noꞌ yunin meꞌ xin hatatikꞌa hanta chꞌel yinh iskꞌul naj chaqꞌa. Cheyaqꞌnipaxo yikta iskanh litro teꞌ aceite yinta hunun 40 (kawinaj) libra ixim harina. 12 Yajaꞌ wal yet chiꞌel yinh iskꞌul naj yahawil konhobꞌ isnhusni no noqꞌ xahanbꞌalil maka chiyaqꞌ yebꞌalqꞌabꞌe yet aqꞌankꞌulal wetan hanin Yahawilintiꞌan yilal ishajlax huneꞌ pulta hakanto yinh yetkꞌulal bꞌay chiꞌahilo tzꞌayik, chisnhusni naj no noqꞌ xahanbꞌalil tuꞌ; chiyalten naj yebꞌalqꞌabꞌe yet aqꞌankꞌulal hakaꞌ yet chꞌekꞌtzelax istzꞌayikal xewilal. Hayet chilahwi yalten naj isxahanbꞌal tuꞌ, kat yelti naj, kat ispebꞌalaxkano pulta tuꞌ.
Xahanbꞌal maxhtikꞌa chibꞌejlax yaqꞌlax hunun tzꞌayik
13 »”Haꞌ yinh hunun tzꞌayik yet sahabꞌ sakꞌayalil, yilal heyalten hunu noꞌ meꞌ huneꞌ habꞌil machi istzakaꞌil, chinhuslax xahanbꞌalil wetan. 14 Hunun tzꞌayik yinta noꞌ meꞌ chenhus yinh xahanbꞌalil tuꞌ, cheyaqꞌpaxo hujebꞌ libra ixim harina sombꞌil yebꞌ huneꞌ litro aceite yebꞌalqꞌabꞌe wetan, hanin Yahawilintiꞌan. Haꞌ huneꞌ xahanbꞌal tuꞌ xin, yilal heyijen yinh sunilbꞌal ej tiempo. 15 Yuxin sunilbꞌal sakꞌayalil yinh sunilbꞌal ej tiempo, yilal henhusni noꞌ meꞌ tuꞌ xahanbꞌalil, cheyaqꞌnipaxo ixim harina yebꞌ teꞌ aceite cheyalte wetan.
16 »”Hak tiꞌ yalnipaxo Komam Jahawil hakaꞌ tiꞌ: Ta chisato naj yahaw konhobꞌ hanikꞌo ismajul tet ebꞌnaj iskꞌahol, haꞌ txꞌotxꞌ tuꞌ xin, ismajul ebꞌnaj kꞌahole chukaniko txꞌotxꞌ. 17 Yajaꞌ ta chissah naj hanikꞌo txꞌotxꞌ tet hunu ischejabꞌ, hanikꞌnhe tiempo chꞌok txꞌotxꞌ yu naj chejabꞌ tuꞌ, yuto haꞌ ismajul naj yahaw tuꞌ yetnhe ebꞌnaj iskꞌahol naj ye txꞌotxꞌ. 18 Naj yahaw tuꞌ, mach chu yinilo naj txꞌo txꞌotxꞌ ismajul konhobꞌ yehi, yunhe machi ok naj elqꞌomal yinh tzet ye tuꞌ yet konhobꞌ yehi. Wal xin haꞌ tzet yet naj yehi, haꞌ chiyaqꞌ naj ismajulo iskꞌahol, hak tuꞌ xin machi hunu mak ay yul inkonhobꞌan chiꞌilaxilo sat istxꞌotxꞌ,”» xhi Komam.
19 Lahwi tuꞌ xin, kinyinitojan huneꞌ naj winaj tuꞌ bꞌay chonhokapno yul pulta bꞌay ay hunteqꞌan cuarto kaw txahul yet ebꞌyaꞌ sacerdote yehi, haꞌ ton hunteqꞌan cuarto hakanto yinh yetkꞌulal norte wilnihan huneꞌ kusinah yichiktoj ayko yinh yetkꞌulal bꞌay chiꞌahilo tzꞌayik. 20 Yalni naj wetan hakaꞌ tiꞌ: «Haꞌ bꞌey tiꞌ chistxik ebꞌyaꞌ sacerdote no noqꞌ chꞌaqꞌlax yinh xahanbꞌalil chꞌaqꞌni tanho istxꞌojal yebꞌ chitohlan mule. Haꞌ bꞌey tiꞌ chistxik ebꞌyaꞌ noꞌ xahanbꞌal, hak tuꞌ xin mach chiꞌilaxilto noꞌ xahanbꞌal tuꞌ bꞌey yamaqꞌil yintaltoj, yunhe mach chiꞌokkano ismay xahanbꞌal yinh konhobꞌ yu,» xhi naj wetan.
21 Lahwi tuꞌ, kinyiniltojan naj bꞌey amaqꞌ, yintaltoj, kinyinitojan naj bꞌey iskanhebꞌal istxikin amaqꞌ tuꞌ, haꞌ bꞌey hunun istxikin amaqꞌ tuꞌ, aypaxo hunteqꞌanxa amaqꞌ. 22 Haꞌ bꞌey iskanhebꞌal istxikin amaqꞌ tuꞌ, aypaxo hunteqꞌanxa amaqꞌ hoybꞌilayoj, haꞌ hunteqꞌanxa amaqꞌ tuꞌ 20 (hunkꞌal) metro yeko istel yebꞌ xin holanhebꞌ metro sat, lahannhe ismalil iskanhebꞌal. 23 Haꞌ hunteqꞌan amaqꞌ tuꞌ ayleko kꞌubꞌ yinhla ishoyanil iskanhebꞌal, haxa yichla hunteqꞌan kꞌubꞌ tuꞌ, kaj txaltxonhe qꞌa qꞌaꞌ. 24 Yalni naj winaj tuꞌ wetan: «Haꞌ ton bꞌey hunteqꞌan kusinah tiꞌ chistxik ebꞌnaj chimunla yul Yatut Komam Dios no noqꞌ chiyaqꞌ konhobꞌ Israel isxahanbꞌaloj,» xhi naj wetan.