45
»”Hayet chepohni txꞌo txꞌotxꞌ yinh suertehal yinh hunun majan ebꞌnaj Israel, yilal hepohnikanilo huneꞌ txꞌotxꞌ yet Komam Jahawil sat txꞌotxꞌ Israel tiꞌ. Haꞌ txꞌotxꞌ chepohilo tet Komam tuꞌ, yikta yoxlahonhebꞌ kilómetro chu hemalen ispakꞌul txꞌotxꞌ, yok 10 (lahonhebꞌ) kilómetro sat, haꞌ sunil txꞌotxꞌ chemalekano tuꞌ yet Komam Jahawil chukaniko txꞌotxꞌ. 2 Haꞌ sat txꞌotxꞌ chepohilo tet Komam tuꞌ, chikankano hanikꞌ txꞌotxꞌ yet Yatut Komam, doscientos cincuenta metro ispakꞌul, yebꞌ xin doscientos cincuenta metro ismalil issat, yuxin lahan ismalil ispakꞌul yebꞌ issat yinh iskanhebꞌal. Haxa yinhla ishoyanil chikanpaxkano hanikꞌ txꞌotxꞌ matzet chiꞌay yibꞌanh, 25 (howebꞌ iskawinaj) metro sat. 3 Haꞌ yul huneꞌ majan txꞌo txꞌotxꞌ chikankano tet Komam Jahawil tuꞌ, chemalepaxo hanikꞌ txꞌotxꞌ, yikta yoxlahonhebꞌ kilómetro ispakꞌul, yok howebꞌ kilómetro sat bꞌay chiꞌah Yatut Komam Jahawil, yebꞌ iscuartohal txahulkanoj. 4 Haꞌ txꞌo txꞌotxꞌ chepohilo tuꞌ yet ebꞌyaꞌ sacerdote chimunla yul Yatut Komam chukaniko txꞌotxꞌ, haꞌ ton ebꞌyaꞌ chihitziko yinh sat Komam Jahawil yu ismunla yinh ismunil. Haꞌ sat txꞌotxꞌ chiyakanh ebꞌyaꞌ yatut yebꞌ bꞌay chiꞌah Yatut Komam. 5 Haktikꞌapax tuꞌ xin, aypaxo hunxa majan txꞌotxꞌ yikta yoxlahonhebꞌ kilómetro ispakꞌul, yok howebꞌ kilómetro sat, haꞌ huneꞌ txꞌotxꞌ tuꞌ yet ebꞌnaj levita chimunla yul Yatut Komam Jahawil chukaniko txꞌotxꞌ; haꞌ bꞌey tuꞌ xin chiswatxꞌeyo iskonhobꞌ ebꞌnaj bꞌay chiꞌehayoj.6 »”Haxa yinh islahobꞌal xin, yilal iskankano hunxa majan txꞌo txꞌotxꞌ sata txꞌotxꞌ yet Yatut Komam Jahawil, yet konhobꞌ xin chukanikoj, haꞌ huneꞌ txꞌotxꞌ tuꞌ yikta yoxlahonhebꞌ kilómetro ispakꞌul, yok yikta yox kilómetro sat. Haꞌ huneꞌ majan txꞌotxꞌ tuꞌ, yet sunil konhobꞌ Israel chukanikoj.
7 »”Wal istxꞌotxꞌ naj yahaw chikankano txꞌotxꞌ yinh ismohonal txꞌotxꞌ hepohilo yeto Yatut Komam Jahawil, haxa hunxa majan txꞌotxꞌ xin chikankano txꞌotxꞌ yinh qꞌaxepxa yinh ismohonal txꞌotxꞌ yet konhobꞌ, yuxin haꞌ huneꞌ majan txꞌotxꞌ chikankano yinh yetkꞌulal bꞌay chito tzꞌayik, haxa hunxa majan txꞌotxꞌ xin chikankano yinh yetkꞌulal bꞌay chiꞌahilo tzꞌayik. Haxa ismalil istxꞌotxꞌ naj tuꞌ lahan hakaꞌ ismalil txꞌotxꞌ chischah huneꞌ majan ebꞌnaj Israel. 8 Haꞌ huneꞌ majan txꞌotxꞌ tuꞌ, haꞌ txꞌotxꞌ yet naj yahaw bꞌey sat txꞌotxꞌ Israel, yebꞌ xin matxa bꞌaqꞌinhal chiꞌetalax iskonhobꞌ Komam Jahawil yu ebꞌnaj yahaw konhobꞌ aqꞌbꞌiliko yinh ismunil yu Komam. Haꞌ konhobꞌ Israel chꞌaqꞌlax istxꞌotxꞌ yu ebꞌnaj yahaw hatatikꞌa isbꞌisil hunun majan ebꞌnaj.
9 »”Hak tiꞌ yalni Komam Jahawil hakaꞌ tiꞌ: ¡Yetzanxa hex yahaw konhobꞌ Israel! Bꞌejwekano howal, bꞌejwe heyetan inkonhobꞌan. Watxꞌewe istoholal yebꞌ isyelal. Hanin Yahawintiꞌan chiwalan: Bꞌejwe heyinilo tzetaj ay inkonhobꞌan.
10 »”Haꞌ malbꞌal chiꞌokniko heyu kaw tzꞌajanojabꞌi. Haꞌ efa yebꞌ bato chiꞌokniko malbꞌalil kaw tzꞌajanojabꞌ cheyute. 11 Haꞌ efa yebꞌ bato lahan ismalil; haꞌ malbꞌal cheqꞌan yinh tzetaj ye tuꞌ issat yehi, haꞌ chiꞌoknipaxiko heyu yet chemalen tzet ye tuꞌ haꞌ yehi. Haꞌ huneꞌ malbꞌal tuꞌ chiyij homer, chiꞌayto doscientos veinte litro yul. Haꞌ homer tuꞌ, haꞌ chiꞌokniko malbꞌalil yinh sunil tzet chemale. Haꞌ huneꞌ homer chiꞌayto 10 (lahonhebꞌ) bato ha haꞌ yul, maka 10 (lahonhebꞌ) efa yinh tzet ye tuꞌ issat yehi. 12 Haꞌ 20 (hunkꞌal) gera, lahan hakaꞌ huneꞌ siclo. Haxa 60 (oxkꞌal) siclo lahan hakaꞌ ismalil huneꞌ mina.
13 »”Haxa hunteqꞌan yebꞌalqꞌabꞌe tiꞌ yilal cheyaqꞌa: Haꞌ ixim trigo yebꞌ ixim cebada cheyiqꞌ yinh hetzꞌunubꞌ, 60 (oxkꞌal) mal cheyuteyoj, yinh tuꞌ xin cheyaqꞌ huneꞌ mal tet Komam. 14 Aypaxo chejbꞌanile yinh teꞌ aceite cheyaqꞌ yebꞌalqꞌabꞌehal, hayet chekutxbꞌan yal aceite, ta ay cien malbꞌal, cheyaqꞌ huneꞌ mal. 15 Haxapaxo yinh hunbꞌulan noꞌ meꞌ, noꞌ kaw bꞌaqꞌich ay sat txꞌotxꞌ Israel, cheyalte huneꞌ noꞌ xahanbꞌalil yinh hunun kabꞌ ciento noꞌ. Hanin Yahawilintiꞌan chiwalan ta haꞌ noꞌ cheyalte yinh xahanbꞌal wetan, yebꞌ xin haꞌ noꞌ chenhusu, yebꞌ noꞌ cheyalte yinh xahanbꞌalil yet aqꞌankꞌulal, yebꞌ xin haꞌ noꞌ cheyaqꞌ xahanbꞌalil wetan yu yaqꞌni tanho ismul konhobꞌ. 16 Sunil konhobꞌ Israel, yilal yaqꞌni hunteqꞌan yebꞌalqꞌabꞌe tet naj yahaw konhobꞌ Israel. 17 Haxa naj yahaw konhobꞌ tuꞌ, chꞌaqꞌni no noqꞌ chinhuslax xahanbꞌalil yebꞌ ofrenda yinh ixim trigo yebꞌ yinh vino yet chꞌekꞌtzelax qꞌinh kaw niman yelapnoj, yebꞌ yet unin ixahaw, yebꞌ yet istzꞌayikal xewilal, yebꞌ yet chꞌekꞌtzelax sunil hunteqꞌanxa qꞌinh bꞌey konhobꞌ Israel. Haꞌ naj yahaw konhobꞌ tuꞌ, yilal yaqꞌni naj no noqꞌ chinhuslax xahanbꞌalil chꞌaqꞌni tanho mule yebꞌ yebꞌalqꞌabꞌe yet aqꞌankꞌulal yebꞌ hunteqꞌanxa yebꞌalqꞌabꞌe yunhe yaqꞌlax tanho ismul konhobꞌ Israel.
18 »”Hak tiꞌ yalnipaxo Komam Jahawil: Haꞌ yinh bꞌabꞌel tzꞌayik yinh bꞌabꞌel ixahaw cheyalte hunu noꞌ tzehla wakax machi istzakaꞌil aykoj, chiꞌok xahanbꞌalil yu issajnhenkano watutan. 19 Haxa yaꞌ sacerdote chiꞌinikanh ischikꞌil no noqꞌ chihaltelax yu yaqꞌni tanho mule, chiyaniko yaꞌ ischikꞌil noꞌ yinh yoyal watutan yebꞌ yibꞌanh kanhebꞌ istxikin yich mexha yet xahanbꞌal yebꞌ yinh yoyalil pulta ay bꞌey yamaqꞌil yuliktoj. 20 Haktikꞌapax tuꞌ cheyute yinh ishuj tzꞌayik yul ixahaw cheyalte xahanbꞌalil yu mak chiyako ismul, yaj mach yinh iskꞌul chitita maka mach yohtajo ta yako ismul, cheyaltenpaxo xahanbꞌal chisajnhenkano watutan.
21 »”Hayet kabꞌlahonhebꞌ tzꞌayik yul bꞌabꞌel ixahaw cheyicheko heyekꞌtzen qꞌinh pascua, haꞌ qꞌinh pascua tuꞌ cheyekꞌtze yulbꞌal hujebꞌ tzꞌayik, haꞌ yulbꞌal qꞌinh tuꞌ chewah ixim pan machi yanhal. 22 Haꞌ huneꞌ tzꞌayik tuꞌ, yilal yalten naj yahaw konhobꞌ hunu noꞌ tzehla wakax yinh xahanbꞌalil yinh ismul yebꞌ yinh ismul sunil konhobꞌ Israel. 23 Hayet hunu tzꞌayik yulbꞌal hujebꞌ tzꞌayik qꞌinh tuꞌ, yilal yalten naj yahaw konhobꞌ hujkꞌonh noꞌ tzehla wakax machi istzakaꞌil aykoj, yok hujkꞌonh noꞌ meꞌ winaj machi istzakaꞌil yinh xahanbꞌalil wetan, hanin Yahawilintiꞌan; chiyaltenpaxo naj hunu noꞌ chiw winaj xahanbꞌalil yinh mule hunun tzꞌayik. 24 Haꞌ yinta hunun noꞌ wakax, yebꞌ hunun noꞌ meꞌ cheyaqꞌpaxo kanhebꞌ quintal ixim trigo, yebꞌ yikta iskanh litro teꞌ aceite. 25 Haktikꞌapax tuꞌ yinh qꞌinh chꞌekꞌtzelax yinh 15 (isholahonhebꞌ) tzꞌayik yinh ishuj ixahaw, chiyaltepaxo naj yahaw konhobꞌ xahanbꞌal hakaꞌ xahanbꞌal chꞌaqꞌlax yulbꞌal hujebꞌ tzꞌayik yinh qꞌinh pascua, lahan isbꞌisil no noqꞌ chihaltelax yinh yaqꞌni tanho mule, lahanpaxo isbꞌisil no noqꞌ chinhuslaxi, yebꞌ xin lahanpaxo ismalil ixim trigo yebꞌ teꞌ aceite chꞌaqꞌlax yebꞌalqꞌabꞌehal hakaꞌ yinh qꞌinh pascua.a